مش مبالغة لما نقول أن الفرجة على قطع الأثاث والأنتريهات والصالونات والسراير والدواليب، وأثاث غرف الأطفال، والكنب فى حد ذاتها ممكن تكون متعة، أو ترويح عن النفس، أو تغيير للحالة المزاجية خصوصًا لما يكون فيه تنوع فى التصميمات، والألوان، والأحجام، والأشكال، وده اللى هـ تلاقيه لما تزور فرع محل هابيتات فى مدينة العبور.

هابيتات العبور بقاله 10 سنين، مساحته كبيرة قوى لدرجة أن الواحد ممكن يأخذ يوم بحاله علشان يقدر يتفرج بمزاج على قطع الأثاث الموجودة والمتنوعة ما بين المودرن والستيل، وكمان موقع المكان فى حد ذاته مريح تقدر تركن بسهولة لو معاك عربية. أول ما تدخله هـ تراودك فكرة تغيير الأثاث اللى عندك.

بالنسبة لغرف النوم، فهى مختلفة يعنى فيه غرف النوم الفاتحة وألوانها الأبيض والبيج والأوف وايت، فيه منها المرصع بالكريستال كزينة للسرير وللدولاب، وفيه منها المكتفية بشريط فيه قطع كريستال صغيرة لامعة فى السرير والدولاب والتسريحة، وفيه دولاب له باب جرار، واللى بابه بـ يتقفل بالمفاتيح. فى قسم غرف النوم دائمًا بـ تلاقى مع قطع الأثاث قطع ديكور زى مثلاً تابلوهات وأباجورات ودي بـ تبقى غير معروضة للبيع، كمان أهم حاجة ممكن تلفت نظرك أن قطع أثاث البيت ممكن تكون طقم واحد يعنى أثاث غرفة النوم ممكن تبقى نفسها أثاث غرفة الأطفال نفس الشكل ومقسمة إلى 2 سرير.

من ضمن غرف النوم الموجودة غرف نوم لها شكل جديد هـ تلاقيها مبطنة بالجلد وده فى التسريحة وأدراجها والشوفنيرة والسرير. وغرف الأطفال لوحدها قصة ثانية، يعنى فيه غرف الأطفال البناتى المرسوم عليها صور لبنات، وغرف أطفال ولادى مصممة على شكل كرة القدم، مقدمة السرير عبارة عن كرة، والدولاب فيه الدوائر المجسمة لشكل الكورة، وفيه غرف الأطفال المحايدة اللى تنفع للجنسين.

قطع الأثاث ممكن تُباع بالواحدة، يعنى مثلاً سراير الأطفال الواحد سعره يتراوح بين 3 إلى 4 الآف جنيه، والغرفة على بعضها مع الكومود والتسريحة 16 ألف جنيه، بالنسبة لغرف النوم فيه اللى بـ 35 آلاف جنيه، وغرف مكونة من سرير ودولاب فقط بـ 38 ألف جنيه، ونوعية الخشب اسمهmdf  ممكن يتدهن باللون الميتاليك. ركنات البيت بـ تبدأ من 3500 جنيه وتختلف أسعارها حسب أشكالها، أما المراتب بـ تبدأ أسعارها من 1000 لفوق.

قطع أثاث هابيتات مستوردة من الصين، وفيه كمان الأنتريهات السبور، وأنتريهات غرف المعيشة مستوردة من أمريكا عليها علامة "أمريكان فيرنتشر كرافت"، طبعًا فيه قطع أثاث مفردة زى الشيزلونج، و"الليزى بوى"، والمرجيحة المنزلية، والمرايا اللى لها إطار مذهب، والمرايا اللى بـ تتقلب.

وبما أن هابيتات بـ يعرض أثاث غرف النوم، كان لازم يعرض مكملات لأثاث غرف النوم، زى المراتب واللى بـ يسميها مراتب الأحلام وهى مقسمة لأشكال تناسب شكل السراير يعنى ممكن تلاقى المراتب اللى تناسب السراير الدائرية، والسراير الضخمة، والصغيرة فى الحجم. هابيتات بـ يضمن عدم شعورك بأى اهتزازات وأنت نائم على المراتب، وبـ يضمن لك برضه حرية الحركة والتقلب بسهولة وأنت نائم والقضاء على أى آلام فى منطقة الظهر، ومش مراتب فقط لأ فيه كمان المخدات، ومن ضمنها المخدات الملكية المصنوعة من أجود أنواع القطن المصرى، ومخدات ثانية لها ارتفاعات وخامات ثانية كلهم بـ يضمنوا نوم هانئ.