بقى لنا فترة بـ نمر أمام فروع كثير للمحل ده في مصر الجديدة وفي شارع محيي الدين أبو العز في المهندسين وحتى في مول العرب في مدينة 6 أكتوبر، وبـ نبقى عاوزين ندخل نتفرج على معروضاته ونكتب عنه لكن لازم تحصل حاجة تمنعنا وتخلينا نأجلها ليوم ثاني. أخيرًا سمحت الظروف من يومين ودخلنا الفرع الموجود في عمارات العبور في طريق العروبة. له لوجو ضخم باللون البرتقالي هـ تشوفه من بعيد وهو وسط منافسيه الشرسين «أور» و«دانيل هيشتير» وغيرهم من أسماء المحلات الكبيرة الموجودة في الصف ده. «يو- تِرن – U Turn» محل ملابس رجالي مكون من طابقين؛ الطابق الأرضي مخصص للملابس الكاجوال والعلوي للبدل والملابس الكلاسيكية.
فيه حاجة غير تقليدية في المحل ده، بالرغم من أنه بـ يعرض عدد من الموديلات المقلدة من ماركات عالمية، بس تقليد ممتاز جدًا أو high copy زي ما بـ يسموه، لكن له فروع كثيرة وأصبح له اسم في عالم الأزياء الرجالي مؤخرًا كأنه بـ يقدم اسمه الخاص على منتجاته أو كأن له مصانع في مصر زي المحلات الثانية المنتشرة بنفس الكثافة. لكن الحقيقة أن «يو- تِرن» بـ يعتمد على الملابس المستوردة من تركيا، وفيه عدد من الماركات المصرية عالية الجودة زي قمصان «نجا أوم» السليم فيت المميزة والظريف أن الموديلات اللي عنده أسعارها أقل منها نفسها في محلات «نجا أوم».
في الجينز هـ تلاقي ماركات زي "بول أند شارك" و"بولو" بأسعار 350 جنيه وألوانها الكحلي والأزرق، وخاماتها سميكة وقصاتها شيك جدًا. طبعًا مش محتاجين نقول أنها high copy لأن الأصلي منها بـ يوصل لـ 1000 و1500 جنيه، لكن في نفس الوقت بـ نؤكد لكم أنك مش هـ تقدر تفرق بينها وبين الأصلية إلا باختبار DNA. نفس الكلام على التي شيرت والقميص من نفس الماركات بأسعار من 100 لحد 200 جنيه، وفيه قمصان من ماركات مختلفة لكنها أصلية من تركيا ودي سعرها بـ يوصل لـ 250 جنيه بس موديلاتها غير مألوفة ومناسبة جدًا لو كنت بـ تدور على حاجة ما حدش ثاني ممكن يبقى لابس زيها "بص على صف القمصان الكاروهات اللي على شمالك أول ما تدخل المحل" وكمان فيه عدد من الجاكيتات الجلد والصوف والفرو المبطنة بأسعار وهمية بـ تبدأ من 450 جنيه وآخرها 600 جنيه، وتقريبًا هنا أول مكان نزل ملابس شتوية وجاكيتات وبول أوﭭر. جاكيت عجبنا جدًا كان نفس الموجود حاليًا في «زارا» لكن سعره أقل النصف تقريبًا ومنزوع عنه أي تيكيت يدل على هويته، مش عارفين هو فعلًا زارا ولا لأ، بس المهم أنه حلو وشكله فريد وسعره مغري.
في الدور العلوي البِدل كانت مفاجأة في شكلها وألوانها وموديلاتها وأسعارها. أسعار بـ تتراوح بين 900 لـ 1900 جنيه، قصات إيطالية بس التصنيع تركي، وهـ تلاقي كل اللي نفسك فيه من موديلات الـ Slim Fit لو كنت بـ تدور عليها ولقيتها بأسعار خيالية في «سرار» أو «آزارو». هنا ممكن تجيب بدلة كاملة وقميص ماركة «نجا أوم» وكرافتة slim برضه وحذاء وشراب كمان وتدفع 1300 جنيه وتأكد أنك هـ تحس أنك أشيك واحد في مصر. فيه كمان بليزرات بـ تباع بشكل منفصل، تمشي كاجوال وكلاسيك، وفيه ألوان جميلة زي الأزرق الزهري والقطيفة الكاكي والأسعار من 400 لـ 600 جنيه.
الأحذية الكاجوال ما شدتناش قوي والتشكيلة الموجودة أصلًا مش كبيرة لكن من باب العلم بالشيء هـ نقولك أن أسعارها من 300 جنيه وأزيَّد شوية. الخدمة هنا جيدة جدًا والبائعين شاطرين وهـ يفرجوك على كل حاجة لكن من غير ما يخنقوك، وهـ يفرجوك على حاجات ممكن تبقى مش واخد بالك منها لأن المعروضات في المحل فعلًا كثير ومتنوعة وعاوزة وقت طويل، وكل ركن هـ تلاقي فيه حاجة لُقطة هـ تحب تجربها أو تشوف شكلها عليك. حاول ما تتأخرش زينا عن زيارة «يو- تِرن».