"كاو - Cow" مكانه موجود قبل شارع لبنان الزحمة، وأكيد مش لايق مع الخلفية العامة بواجهته المشرقة المفعمة بالحيوية وشباك العرض اللى على شكل زهرة عباد الشمس. الانطباع الأول اللطيف ده بـ يعطيك فكرة عن الكنوز الموجودة فى الداخل.
أول ما فتحنا الباب قابلتنا الروائح الجميلة اللى طالعة من فواحات سعرها يبدأ من 20 جنيه، وصابون حمام أنيق يضمن لك أن ضيوفك يحسدوك عليه.
بعد ما تطلع شوية سلالم، وعلى عكس الإحساس الخادع من الخارج أن المكان صغير، "كاو" من الداخل يشبه مغارة علاء الدين الواسعة اللى مليانة أشكال وألوان من القطع.
المحل مُنظم على شكل أقسام، كل قسم فيهم بـ يقدم حاجة مختلفة. على سبيل المثال، قسم العرسان فيه تقريبًا كل حاجة ممكن تحتاجها فى أهم يوم من أيام حياتك. تكلفة دعوات الفرح تتراوح بين 9: 12 جنيه للواحدة، بس مافيش مانع أنهم يتكلموا فى السعر لو كنت عاوز كمية وبـ تُنفذ كويس. شجرة رسائل Message Tree متوسطة وشكلها مودرن سعرها 350 جنيه أما الحجم الأكبر والأكثر جمالاً هـ يكلفك 450 جنيه.
عندهم بجانب إكسسوارات الزفاف قسم خاص بهدايا الخطوبة، وده مليان عدد مهول من القطع اللامعة والأحجار الكريمة، والقسم ده ما نقدرش نقول أنه لهدايا الخطوبة بس، علشان فى رأينا أن تقليد لماسة ضخمة لونها وردى (75جنيه) أو إطار صورة مرصع بالألماس (110 جنيه) ممكن يبقى هدية حلوة لمناسبات مختلفة.
"كاو" كمان بـ يقدم هدايا لحفلات ولادة الأطفال، ألعاب صغيرة وهدايا تهنئة، وهدايا حفلات عيد ميلاد، وهدايا رومانسية، وفى وقت زيارتنا كان فيه أزياء للهالويين وديكورات مخيفة، وده بـ يقول أنهم بـ يقدموا المنتجات المناسبة فى الوقت المناسب.
عندهم كمان منتجات منزلية متعددة، إكسسوارات للترابيزات والمطابخ، ودباديب، وكام جدار مخصصينه لعرض مجموعتهم من الميداليات والساعات. منبه بسيط سعره 24 جنيه أكيد هـ يؤدى الغرض منه.
لسه مكملين مع الخريف، "كاو" عنده مصابيح مظللة مطبوع عليها صور حيوانات روشة (150 جنيه)، ومخدات وعلب تخزين (105 جنيه) يقدروا بمنتهى السهولة يخلوا أى بيت فى منتهى البهجة.
على طول الحائط الموجود فى آخر المحل قسم كامل مخصص لكروت التهنئة وخيارات لف الهدايا تنفع لأى مناسبة ممكنة؛ بـ يتدرجوا من المفعمين بالنشاط والألوان الزاهية لغاية البساطة والرقة. معظم الأسعار تعتبر معقولة، بس رغم كده، حسينا أن فيه حاجات ما تستحقش السعر المطلوب فيها.
الموظفين سابونا لوحدنا وبالتالى استمتعنا بتجربة تسوق مريحة وقدرنا نستكشف المكان بدون الإحساس بضغط من أحد. لما كنا بـ ننبهر بالمجموعة الموجودة كانوا موجودين وبـ يعرضوا أنهم يساعدوا بمنتهى الأدب. وإحنا بـ نستعد أننا ندفع ثمن الحاجات اللى اختارناها بمنتهى الحرص، أخذنا بالنا من مجموعة غير تقليدية من طرق التغليف الغالية عند الكاشير لو عاوز تجيب حاجة مميزة.
سواء كنت بـ تدور على هدية، عندك مناسبة خاصة أو عاوزة تدلعى نفسك شوية، كاو مش هـ يحبطك. يمكن الموضوع يأخذ منك وقت علشان تلاقى طلبك، وإحنا بـ نراهن على أنك مش بس هـ تلاقيه، ده ممكن كمان تعجبك حاجة مختلفة خالص. امسك محفظتك كويس علشان ما تقعش تحت إغراء شراء حاجات مش هـ تحتاجها أصلاً.