دي أول مرة ندخل فرع من فروع «تيوليب» اللي لاحظنا بعد ما أخذنا الكارت الخاص بالمحل أنها كثير ومنتشرة في أحياء القاهرة والإسكندرية. ما نقدرش نوصفه بأقل من أنه علامة مضيئة ومميزة بين محلات أدوات المطبخ والمائدة، وواجهة كل واحد أو واحدة بـ تجهز بيت جديد أو بـ تدور على أي حاجة جديدة في عالم الأدوات المنزلية اللي هو "عالم" فعلًا مليان اختراعات وحاجات ما تخطرش على بالك ومش هـ تتخيل أنها موجودة إلا لو زرت المكان ده، او كنت متابع جيد لقناة "فتافيت" وبرامج الشيف شربيني علشان تشوف هم بـ يستخدموا إيه في مطابخهم وتروح تجيبها من هناك.
زيارتنا لفرع «تيوليب» اللي في صن سيتي مول كانت من باب الفضول ورغبتنا في استكشاف المكان من الداخل، المحل الشيك اللي في الدور الرابع اللي عارض عدد من أطقم الشاي الصيني والأركوبال في الفاترينة الداخلية وتخيلنا أن الموضوع مش هـ يزيد عن مجموعة إضافية من أطقم الشاي والحلل في الداخل، لكن بمجرد ما دخلنا لقينا نفسنا في "العالم" اللي بـ نقول لكم عليه ولفت نظرنا جملة "صنع في تركيا" على أغلب المعروضات وعرفنا أن المحل متخصص في البضائع التركية عالية الجودة، وعالية السعر برضه.
بالإضافة لكل الأدوات المعروفة اللي ممكن تشوفها في أي محل أدوات منزلية زي علب الثلاجة والفناجين والبرادات والحلل والطاسات الموجودة هناك، هـ نقول لكم على بعض المعروضات اللي عجبتنا وحسيناها فريدة وهـ نقول لكم على أسعارها. فيه طقم شاي باللون الأبيض ومنقط بالأزرق مكون من 38 قطعة بـ 850 جنيه، فيه طقم ثاني أصغر شوية عليه عرض خاص بـ 350 جنيه. وعجبنا كمان مجّات أركوبال من ماركة bodum محاطة بكاوتشوك عازل علشان الحرارة (49 جنيه للقطعتين)، وفيه طاسات تيفال بأقطار مختلفة (20، 24، 26، 28 سم) وبألوان عجيبة زي الأخضر والوردي واللبني بأسعار من 90 لـ 135 جنيه، فيه حلة ضغط كبيرة "بريستو" بـ 380 جنيه، وتوستر بـ 430 جنيه، وفيه شنط حفظ مأكولات للأطفال وزمزميات بأشكال رائعة بأسعار 35 و40 جنيه، وساعة حائط ببندول بـ 140 جنيه.
لحد هنا والحاجات تبدو تقليدية، لكن اللي كان مش تقليدي بالنسبة كان الأشكال والألوان المختلفة من المساكات والقطَّاعات وقشارات الخضروات والفاكهة والمكسرات ومجَّات صناعة القهوة وطحن البن وفرشات دهان المأكولات بعد ملأها بالسائل المراد الدهان به، ورغم إعجابنا الشديد بالقسم ده بالذات من المحل إلا أننا استغلينا بعض الأدوات دي اللي أسعارها أقل حاجة منها كان بـ يوصل لـ 50 جنيه فما فوق. لكن طبعًا الغاوي هـ يلاقي متعة غير عادية وسط كل الاختراعات دي.
عدد لانهائي بقى من أطقم الكاسات وأطباق التقديم لكل أنواع الأكلات، معظمها تركية الصنع وفيه المصنوع في كوريا، الموديلات جديدة وشكلها غير مألوف، وكأنها معمولة خصيصًا لهواة اقتناء الحاجات الغريبة، هنا هـ تلاقي دائمًا أدوات فريدة بـ تعبر عن شخصيتك في مطبخك وعلى سفرتك.
الخدمة جيدة وبسيطة داخل المحل، ومش هـ تلاقي حد من الموظفين جنبك إلا لو طلبت ده، بس يفضل عدم لمس المعروضات بالذات المغرية منها إلا في وجود الموظف المختص، وده مكتوب على لافتات داخل المحل. «تيوليب» باختصار هو جنة مجانين المطبخ والأدوات المنزلية المميزة، ودي صفحتهم على الفيسبوك.