ينقسم "أوتسايد إن – Outside In" الموجود فى شارع متفرع من شارع النزهة الهادئ بمنطقة هليوبوليس لدورين. المحل الصغير ده بـ ينفذ حرفيًا معنى اسمه، بـ يجذب الناس من الخارج للداخل. مجموعة جميلة متعددة الألوان من الورود الصناعية شديدة الشبه من الطبيعية بـ تزين حوائط المكان ومرتبة فى فازات شيك جودتها عالية.
الورد بـ يمثل عنصر مهم فى كل بيت، بس طرق عرضه المبهرة عادة بـ تبقى مكلفة ومؤقتة. أوتسايد إن بـ يقدم لعشاق تزيين البيوت بالورد بديل عن الورود الطبيعية اللي بـ تذبل بسرعة. شكل الورود البلاستيكية، والحريرية واللى شكلها مرشوشة بالمياه قريب جدًا من الحقيقيين وموجودين بمجموعة مختلفة من الأنواع، والأحجام والألوان. ورغم أن الورد عديم الرائحة، بس المحل نفسه له رائحة عطرية مشجعة وكمان مجموعة موظفين مريحين.
الورد ممكن يُباع بالواحدة أو مجموعة، وبفازة أو من غير. اتشدينا فورًا لمجموعة من زهور التيوليب لونهم وردى (25 جنيه للباقة)، وورود لونها أحمر غامق (25 جنيه للباقة) وكمان زهور ليلى صفراء كبيرة عجبتنا سعرها 85 جنيه للباقة. اشترينا وردة ضخمة لونها بنفسجى غامق لها شوك بـ 40 جنيه. عندهم كمان ورود أكبر لأماكن العرض العملاقة زى زهور هيدرينجيس الدائرية وأشكال ثانية كبيرة ومش تقليدية تشبه المخروط.
"أوتسايد إن" عنده مجموعة متنوعة من الفازات بكل الأشكال والأحجام، يعني فى الغالب هـ تلاقى واحدة ترضى كل الأذواق. فازة صغيرة أفقية على شكل مركب لونها ذهبى سعرها من غير الورد 750 جنيه، فى حين أن فازة ثقيلة مدورة من الزجاج لونها أزرق فاتح بـ 280 جنيه. فازة طويلة شكلها معتاد هـ تكلفك 70 جنيه وفازة من السلك المعدنى من نفس الحجم سعرها 360 جنيه. أحواض زرع داخلية فضية مبهجة تبدأ من 300 جنيه، وأصيص طويل لتزيين المكان من الخارج شكله مودرن وسعره حوالى 600 جنيه. شدتنا فازة مبتكرة لونها وردى فاتح على شكل الصبار ثمنها 250 جنيه. عندهم كمان تشكيلة قصيص زرع بأحجام صغيرة تبدأ من 50 جنيه.
الأحجار المستخدمة فى تعبئة الفازات كبديل للنباتات وكمان كشكل ديكورى موجودة باللون الأبيض، والشفاف والأسود (10جنيه للكيلو). وعندهم كمان نباتات موسمية فى أوقات طرحها، زى أشجار الصنوبر وقت الكريسماس. مجلات البيت والورود برضه موجودة فى المحل علشان تستمد منهم الإلهام وكمان الموظفة تقدر تساعدك فى عمل بوكيه ممتاز يعيش العمر كله.
أوتسايد إن يقدر يشتغل مع منظمى الحفلات، والأفراح ومصممى الديكور علشان يمدهم بأجمل ورد صناعى دائم الإشراق علشان يجمل أى مكان ولأى مناسبة.