مفكو حلوان: أثاث متوسط الجودة في عدة فروع بالقاهرة - تسوق Feature - كايرو 360
 







مفكو حلوان: أثاث متوسط الجودة في عدة فروع بالقاهرة
مفكو حلوان: أثاث متوسط الجودة في عدة فروع بالقاهرة
اصدرت في: 07/05/2013

ما كناش نعرف أن فيه حاجة اسمها "مفكو حلوان - Mffco" لحد ما شوفنا عربيات مقفلة وشكلها نظيف ماشية في أحد شوارع المهندسين وقفت عند بيت نزلت موبيليا بطريقة شيك، والموبيليا كانت ملفوفة تمامًا وبنظافة شديدة، والعمال بـ يتعاملوا معاها برفق، بصينا على اسم الشركة وعملنا عنها بحث وبدأنا نعرف أكثر عن المكان ده اللي هو ملك الدولة زي ما فهمنا.

"مفكو حلوان" عبارة عن سلسلة محلات لبيع الأثاث بمختلف أشكاله، سواء كان للمكاتب، أو للبيت، معارض كبيرة وتصميمات موحدة ومتنوعة في كل الفروع: المهندسين، ومدينة نصر، والهرم، والمعادي، ووسط البلد، اتبسطنا لما شوفناه، لأنه حل معادلة صعبة كانت بـ تضايقنا في كثير من الأوقات وكأنها قاعدة، الموبيليا المتينة شكلها وحش، والموبيليا الحلوة خشبها سيء... مفكو مسك العصاية من النصف، خشب متوسط الجودة، وتصميمات مرضية للناس اللي بـ تحب تشتري حاجة شكلها حلو، في نفس الوقت سعرها مناسب.

أول فرع دخلناه كان اللي في المهندسين، فرع مش كبير قوي، ومش صغير برضه، التصميمات كان لا بأس بها، لفت نظرنا غرفة نوم اسمها فيولا سعرها 13 ألف ونصف، الغرفة اسمها مش ماشي مع شكلها، لأن تصميمها عربي أصيل، فيها شغل زخرفة بالأبيض في الخشب البني، حسينا أنه طراز مغربي أكثر.

المميز عند مفكو غير وسطيته في كل حاجة، إمكانية الاختيار من بين نماذج كثير، الشركة لها خطوط إنتاج من أشكال معينة من الأثاث، صحيح بـ تتغير لكن بـ تأخذ وقت عقبال ما تتغير التصميمات لذلك فيه عنصر أمان.

زرنا فرع ثاني أكبر وأجمل في الهرم، كبير فعلاً، وفيه اختيارات كثير جدًا، عجبتنا هناك حاجات كثير، عجبنا أن فيه اهتمام خاص بالغرفة الثانية في البيت واللي ممكن البعض يسميها غرفة الأطفال، وفي رواية ثانية غرفة المسافرين، المهم أنهم عاملين غرف كثير جدًا متكاملة من دولاب وكومود وسرير أو اثنين بتصميمات وأشكال كثير، كمان فيه تصميمات لسراير الأطفال مميزة، في الفرع ده كمان شوفنا سراير منفردة للناس اللي عاوزة تجيب سرير واحد لفرد بألوان زاهية كثير، وشوفنا كمان ركنات وصالونات بس لفت نظرنا الأسعار العالية جدًا لبعض غرف الصالون، واللي ما كناش حاسين أنها تستاهل الأرقام المكتوبة عليها، يعني مثلاً بعض غرف الصالون بـ تعدي 18 ألف وأحيانًا 20 ألف ودي أرقام غريبة لأن نفس الصالونات بنفس الخشب بـ تكون معروضة في أماكن ثانية بأسعار أقل جدًا.

الركنات عند مفكو بـ تتراوح بين 15 لـ 13 ألف، لكن لفت نظرنا أن مكان الجلوس فيها جاف جدًا، مش مريح ولين زي الأنتريهات والركنات العادية، قلنا يمكن ده شكل من أشكال المتانة؟! مش عارفين لكن اللي عارفينه أنه أكثر حاجة عجبتنا هناك هي غرف النوم سواء الكبيرة أو الصغيرة اللي أسعارها بـ تتراوح بين 8.500 و10 آلاف للصغيرة وبـ توصل لـ 18 ألف في الكبيرة وأحيانًا بـ تعدي المبلغ ده.. المهم أن مفكو في رأينا مناسب للناس اللي عاوزة تنزل تشتري عفش وما عندهاش وقت تلف ولا عارفة تسافر دمياط تختار، الخشب لا بأس به، والتصميمات كمان.

لما أخذنا رأي معارف في مفكو لاقيناها من النقيض للنقيض، البعض كان فرحان جدًا بالمكان وقال أنه مناسب وأنه ساعدهم في الشراء بسرعة وبأمان، والبعض الثاني كان مستاء جدًا ونخص بالذكر صديقة اشترت من عندهم مكتبة وبعد فترة قصيرة نقرت. مش عارفين العيب في العفش نفسه ولا في الاستعمال... على كل ندعوكم تروحوا وتحكموا بنفسكم على المكان.

العمل في جميع الفروع طوال أيام الأسبوع من الساعة 10 صباحًا إلى 10 مساءً، ماعدا الجمعة من الساعة 2 ظهرًا لحد الساعة 10 مساءً.

مزيد من الصور
  • مفكو حلوان: أثاث متوسط الجودة في عدة فروع بالقاهرة
  • مفكو حلوان: أثاث متوسط الجودة في عدة فروع بالقاهرة
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
07/05/2013
-