هايبر وان: ساحة للتسوق والمتعة عند مدخل الشيخ زايد - تسوق Feature - كايرو 360
 







هايبر وان: ساحة للتسوق والمتعة عند مدخل الشيخ زايد
هايبر وان: ساحة للتسوق والمتعة عند مدخل الشيخ زايد
اصدرت في: 22/05/2013

فى مكان بعيد نسبيًا عن العاصمة بدأت الكثافة السكانية تنتقل إليه شوية بشوية لغاية ما أصبح مركز كثافة سكانية زى العاصمة وأكثر، المكان ده هو مدينة 6 أكتوبر، طبعًا لازم يكون فيه أسواق ومولات تلبى احتياجات السكان فى المدينة وبالفعل بدأت المولات تكثر وتنتشر بشكل كبير، لكن من أهم المولات اللى لها شعبية كبيرة عند السكان "هايبر وان" وهو بالضبط عند المدخل الأول لمدينة الشيخ زايد ومساحته تبلغ تقريبًا أربعين ألف متر مربع وبـ يعتبر أول هايبر ماركت مصرى مؤسسيه مصريين.

"وهايبر وان" بـ يضم جراج كبير وواسع محاط بسياج من الحديد وسهل جدًا أنك تركن عربيتك بدون مضايقات لكن فى المواسم و المناسبات ممكن يكون زحمة.

بـ يتكون هايبر وان من طابقين فيهم كل شيء ممكن تتخيله يعنى لو عريس وعروسة بـ يجهزوا ممكن يجهزوا بيتهم من غير ما يخرجوا بره الهايبر لأن فيه كل حاجة من الأبرة للصاروخ زى ما بـ يقولوا.

فى الطابق الأرضى جميع منتجات الأطعمة والمنظفات، أول ما بـ تدخل بـ تلاقى على أيدك اليمين محل لإكسسوارات الكمبيوتر وعلى الشمال "فور باى فور كوفى" علشان لو جاى من مكان بعيد ممكن قبل التسوق تشرب حاجة أو ترتاح شوية، بعد كده بـ تلاقى فى المقابل قسم كبير للحوم والدواجن ومقسم لعدة أركان فيها منتجات متنوعة، على يمين قسم اللحوم هـ تلاقى قسم للمواد التموينية زى السكر والزيت والسمن، على اليمين قسم كبير جدًا للمنظفات وهـ تلاقى فيه كل أنواع المنظفات.

ولسه الدور الأرضى ما خلصش، فيه كمان صيدلية كبيرة اسمها "المراد" وقسم كبير للفاكهة والخضار، وقسم كبير للحلويات الشرقية والغربية، وحاجة كمان تفاجئنا بها وما شوفناهاش فى أى مول هى محل لتصليح الأحذية والشنط، أه ده حقيقى، وياما بـ تحصل مواقف بـ نكون محتاجين فيها لمحل زى ده.

فى الطابق الثانى بـ ينقسم إلى ثلاثة أقسام: فى القسم الأول على اليمين محل أدوات التجميل، ودائمًا بـ تبقى عاملة عروض وتخفيضات خاصة كل شهر وبالجوار قسم كبير للعطور والماكياج بـ يضم جميع الماركات العالمية، وفى الشمال قسم للملابس والأحذية و الشنط، وكمان قسم للأجهزة الكهربائية والأجهزة الرياضية.

على الجانب الآخر فيه قسم لملابس وألعاب الأطفال وكمان فيه ملاهى صغيرة علشان لو معاك أطفال ممكن يستمتعوا بوقتهم أثناء التسوق.

وجنب قسم الأطفال فيه قسم خاص للأثاث وفيه عدد من المحلات منها للأثاث Outdoor وIndoor وللمفروشات.

وفى الجانب الآخر جنب ملاهى الأطفال بـ نلاقى مكان الفوود كورت وفيه عدد من المطاعم المشهورة زي "كنتاكى" و"كوك دور" و"بيتزا وان" و"أيس كريم وان" و"مؤمن" وحول كل مطعم من المطاعم دى مساحة كبيرة للاستمتاع بشكل كبير خاصة فى المساحة الموجودة بجوار مطعم كنتاكى بعيدة عن الضوضاء وبـ تطل على الشارع وهادئة أكثر من غيرها.

ومع كل التنوع اللى بـ يقدمه "هايبر وان" فى السلع والمنتجات واللى بـ يوفر للمستهلك حوالى 60000 سلعة، كمان فيه عروض وتخفيضات شهرية على جميع السلع باختلاف الشركات المنتجة لها.

الموظفين متعاونين ومهمتهم أنهم يرشدوك لأى حاجة أنت عاوزها علشان تختصر الوقت وما تدورش كثير. وفيه مكتب اسمه مكتب "خدمة العملاء" فيه موظفين مهمتهم أنهم يحلوا لك أى مشكلة تواجهك. وعلشان نكون مطمئنين فيه هناك كمان أكثر من ماكينة صرافة لأكثر من بنك.

بالرغم أن هايبر وان فى الشيخ زايد لكن الوصول سهل جدًا لأن فى أى مكان فى مصر فيه مواصلة لمدينة 6 أكتوبر ولازم بـ تعدى على هايبر وان لأنه فى أول الشيخ زايد وكمان فيه أمام الهايبر مباشرة مواصلات لأى مكان ولو معاك عربية فالدائرى أسهل طريق لو أنت مش من سكان أكتوبر.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
سماح ناجح
حرر بواسطة:
سماح ناجح
تاريخ النشر:
22/05/2013
بـ تحب القراءة جدًا وبـ تكتب شعر فصحى بس مش زى اللى كان فى كتاب المدرسة، كائن نشيط بس مش بمزاجها علشان بـ تودى أنس ابنها الحضانة ووقتها بـ تستغل الفرصة وتقرأ علشان تكتب عن الكتب اللى بـ تقرأوها على الموقع.