حمام التلات: أطقم أطباق وأواني بأسعار خيالية في الأزهر
حمام التلات: أطقم أطباق وأواني بأسعار خيالية في الأزهر
اصدرت في: 02/10/2013

لما تسمعي اسم "حمام التلات" ممكن ييجي في بالك أنه مكان له علاقة بالحمام المغربي أو التجميل أو حاجة قريبة من كده، لكن في الحقيقة "حمام التلات" اللي بـ نتكلم عنه المرة دي مالوش علاقة بالكلام ده خالص. "حمام التلات" اللي رحناه مكان في منطقة الأزهر مشهور بمحلات الأواني والأطباق وغيرها من الاحتياجات المنزلية زي منتجات البلاستيك من شماعات ومشابك وحاجات ثانية متنوعة.

أول ما سمعنا عن المكان فكرنا أنه غالبًا مستوى الأذواق والجودة هناك هـ يكون قليل وأننا مش هـ نلاقي حاجة مميزة تستاهل الشراء، لكن لما أكثر من حد قال لنا أن فيه حاجات كويسة هناك قررنا نغامر ونروح نشوف بنفسنا إيه اللي بـ يميز المكان ده. وفعلاً لقينا أنه يستحق المغامرة.

"حمام التلات" عبارة عن مجموعة شوارع متقاطعة أشهرهم شارع اسمه "درب سعادة"، والشوارع دي كلها محلات أواني وأدوات منزلية جنب بعض، عدد المحلات هناك كبير ومافيش فاصل بين محل والثاني غير يا دوب الحائط اللي بينهم. وعلشان نكتشف كل إللي هناك دخلنا عدد مهول من المحلات لدرجة أننا في الآخر اتلخبطنا. مستوى الجودة في المحلات دي معقول جدًا، خصوصًا في أطقم الأطباق والكاسات وغيرها من أواني تقديم الطعام. أغلب المحلات بـ تعرض نفس الحاجات بنفس الأشكال لكن فيه محلين بالذات كان فيهم حاجات مميزة ومختلفة برغم أسمائهم الغريبة وهما "أبو سريع" و"سنتر الهلال"، ودول هـ تلاقي فيهم أطقم أطباق بجودة عالية وأشكال جديدة مختلفة عن التقليدي وأطقم كاسات وكوبايات لطيفة جدًا.

أهم حاجة بـ تميز "حمام التلات" هي أسعاره، لأن فعلاً فيه فرق شاسع بينها وبين الأماكن الثانية، مثلاً أطقم الصيني أسعارها ما بين 900: 3000 جنيه، وإحنا عجبنا طقمين في "سنتر الهلال" واحد كان 136 قطعة شكل أطباقه مربعة ومزينة بشريط عريض من الزخارف الجميلة لونها لبني في ذهبي وكان سعره 1350 جنيه. والطقم الثاني كان 60 قطعة ومزخرف بشريط فضي وورود رقيقة من نفس لون الأطباق الأبيض سعره 1000 جنيه. أما في "أبو سريع" لقينا طقم صيني مميز جدًا بأطباق شكلها ما بين المربع والمدور وشريط الزخرفة بتاعه مقسوم نصفين ما بين نقاط بيضاء وورود كبيرة بني في ذهبي، وده كان سعره 1600 جنيه.  

عجبتنا كمان كاسات بشريط ذهبي عليه رسمة ورد لطيفة منه الطويل والقصير وكاسات الآيس كريم، وسعر الطقم المكون من 6 كاسات كان بـ 250 جنيه -على فكرة الأطقم اللي زيه بالضبط في محل معروف بـ 450 جنيه- وكان فيه صواني تقديم جميلة جدًا عليها زخارف عربية سعرها كان 120 جنيه للصينيتين.

الخدمة في "حمام التلات" بـ تختلف طبعًا من محل للتاني، أغلب المحلات بـ يرحبوا بكِ  وبـ يجيبوا لك كرسي تقعدي عليه كمان علشان يفرجوكي على المعروضات، لكن فيه محلات بـ تواجهي فيها صعوبة أنك تفهمي البائع أنت عاوزة إيه، ومحلات ثانية الخدمة فيها سيئة جدًا.

لو أنت عروسة وبـ تشتري جهازك أو لو حابة تجددي طقم العشاء بتاعك أو تشتري حاجات جديدة لبيتك أمامك اختيار من اثنين، يا إما تروحي المحلات المعروفة واللي أسعارها بقيت فعلاً فلكية، خصوصًا أسعار أطقم الصيني اللي وصلت لـ 16,000  جنيه في بعض الأماكن الشهيرة، يا إما تغامري وتنزلي الأماكن اللي زي "حمام التلات" ولو ناوية تعملي ده عندنا لك كام نصيحة: لو هـ تشتري طقم صيني أحسن نوعين هما "البولندي" و"المصري الألماني"، وابعدي تمامًا عن التايواني و الفلبيني، ثاني حاجة حاولي تفاصلي في السعر على قد ما تقدري علشان ممكن تنزلي فيه جامد، وبلاش تشتري حلل وأدوات طبخ من هناك لأن أغلبها تقليد بجودة قليلة، وأخيرًا ما تزهقيش من اللف وتكرار المعروضات لأنك لو دورتي كفاية أكيد هـ تلاقي حاجات مميزة بأسعار كويسة جدًا.

الأسعار فعلاً هايلة، لكن الشوارع ضيقة ولو رحتي بالليل هـ تبقى زحمة جدًا، ولازم تدققي في كل قطعة قبل ما تشتري علشان ساعات بـ يبقى فيها خدش أو غلطة.

مزيد من الصور
  • حمام التلات: أطقم أطباق وأواني بأسعار خيالية في الأزهر
  • حمام التلات: أطقم أطباق وأواني بأسعار خيالية في الأزهر
  • حمام التلات: أطقم أطباق وأواني بأسعار خيالية في الأزهر
التعليقات
تصويت

Loading...

اكسب! هاتف نوكيا X!
اكسب! هاتف نوكيا X!
عن الكاتب
رحاب عبد الناصر
حرر بواسطة:
رحاب عبد الناصر
تاريخ النشر:
02/10/2013
كاتبة.. الكتابة وتصميم الأزياء حياتها، بـ تحب الألوان والمزيكا وبقاليل الصابون. بـ تركز في التفاصيل –زيادة عن اللزوم أحيانًا- وما عندهاش مشكلة تدور بالساعات لحد ما تلاقي الحاجة اللي في بالها. نفسها تعيش فى قصة خيالية أو يبقى عندها آلة زمن.