"ألفا ماركت" فرع الزمالك موجود بالضبط فى 3 شارع الملك الأفضل، الزمالك منطقة هادئة جدًا وبـ يسكن فيها أجانب كثير، وألفا بالنسبة لهم حاجة عظيمة لأن فيه كل احتياجاتهم، لكن فى نفس الوقت مكانه مناسب جدًا لسكان الكيت كات وأبو العلا، وهو مش مجرد ماركت عادى لأنه ببساطة فيه كل شىء يخص البيت والأطفال، من أول الملح لغاية أجهزة المطبخ وإكسسوار البيت ولوازم أطفال من أول البامبرز لغاية البلاي ستيشن ومايوهات البحر.

بـ يتكون ألفا ماركت من ثلاثة طوابق على مساحة كبيرة، أول ما بـ ندخل من الباب بـ نلاقى 2 كاشير علشان ما يبقاش فيه زحمة والناس بـ تحاسب على مشترواتها وبعد أمتار قليلة هـ نلاقى قسم الأغذية مقسم لعدة أركان ثانية، فهـ نلاقى فى الوش ركن خاص بالسلع التموينية زى المكرونة والسكر والأرز وهـ تلاقى كل الأنواع اللى تتخيلها وأنواع ممكن تكون جديدة وما تعرفهاش وكل حاجة فيه منها العادي والدايت.

جنب السلع دى هـ تلاقي ركن المعلبات وبـ يضم كل المعلبات حلو وحادق وسلاطات وبرضه هـ تلاقي كل الأنواع وبعد كده هـ تلاقي ركن الجبن والألبان، وفى الركن ده ممكن تقف كثير لأنك هـ تلاقي كل الحاجات المميزة من الجبن والألبان واللى مش بـ نلاقيها بسهولة زى السمن البلدى والجبن القريش والجبن الرايب وبعد كده هـ نلاقى ركن المخبوزات، وفى الركن ده ممكن تأكل مخبوزات طازجة وسخنة وممكن تطلب أى منها يتعمل لك وأنت واقف لأن فيه فرن وبـ يعملوا كمان كل أنواع القراقيش والكحك والبيتي فور وممكن كمان يعملوا لك بيتزا، وكمان هـ تلاقي كل أنواع الخبز العادي والدايت.

بعد كده هـ تلاقي ركن اللحوم، وفيه هـ تلاقي كل أنواع اللحوم من أول الضاني لغاية لحم النعام، وكمان "ألفا ماركت" بـ تعمل كل شهر عروض معينة على اللحوم ودي حاجة مهمة جدًا للسيدات لأن التوفير طبعًا مهم جدًا بالنسبة لهم، وبعد كده هـ تلاقى ركن الخضروات وفى الركن ده هـ تلاقي كل الخضروات المجمدة حتى الثوم هـ تلاقيه.

على فكرة إحنا لسه فى الدور الأول.. هـ تلاقي جنب قسم الخضروات قسم الأسماك بعضها فريش وبعضها مجمدة، بعد كده هـ نلاقي ركن معزول شوية وده فيه الكتب والمجلات الخاصة بالكبار و الأطفال.

بعد كده لما نطلع الدور الثانى هـ نلاقي جنب السلم ركن خاص بأدوات الكومبيوتر وفيه تقريبًا كل أنواع الكمبيوتر واللاب توب وإكسسوارتهم وقطع الغيار كمان. بعد كده هـ نلاقى ركن العناية الشخصية، وفى الركن ده كل أنواع الكريمات والشامبوهات والزيوت العالمية ودى كمان بـ يبقى عليها عروض كل شهر يعني ممكن نوع كريم بمبلغ وقدره تشتريه من "ألفا" بسعر مميز ودي حاجة تعجب البنات والسيدات جدًا.

وبعد كده هـ نلاقي قسم أدوات المطبخ فيه كل شيء يخصه حتى الأدوات الكهربائية وده بـ يبقى فيه عروض هائلة جدًا خاصة فى عيد الأم.

بعد كده ركن مهم جدًا خاصة (للمخطوبين) وهو ركن الهدايا وفيه بقى أشكال مختلفة وبصراحة فيه حاجات قيمة جدًا يعنى ممكن تلاقى حاجات هاند ميد بالخشب أو بالنحاس و الحاجات دى الواحد كان بـ يدور عليها كثير ولما نلاقيها بـ تبقى أسعارها غالية جدًا لكن فى "ألفا ماركت" هـ نلاقى الحاجات دي بأسعار حلوة مقارنة بأماكن ثانية.

وفيه ركن كمان حلو جدًا و هو ركن "ويدنج ليست" وفى الركن ده الأدوات اللى ممكن تساعد أى بنت فى مطبخها زى الشوايات والساندويتش ميكر وحاجات ثانية هـ تعرفوها لما تروحوا. وجنبه ركن "حديثى الولادة" وفيه كل مستلزمات البيبي.

وبعد كده فيه ركن لأكل الحيوانات زى الكلاب والقطط، وجنبه ركن المنظفات وده كمان بـ يبقى عليه عروض كل شهر.

ولما نطلع الدور الثالث هـ نلاقى فى الوش على طول ركن خاص للأجهزة الرياضية وده قسم كبير بـ يضم أنواع كثيرة وبجواره ركن خاص بالملابس الرياضية والدراجات من أول دراجات الأطفال لغاية دراجات السباق. ومش هـ نبعد كثير وهـ نلاقى ركن خاص بأدوات الغوص وأدوات الصيد ودى حاجة حلوة لأن مش دائمًا بـ نلاقيها.

وبعد كده هـ نلاقى ركن خاص بلعب الأطفال وفيه هـ نلاقى مستويات مختلفة من اللعب وأسعارها كمان مختلفة، إلى جانب ركن مستلزمات الحفلات فيه كل شيء ممكن نحتاجه فى الحفلات وده بـ يوفر علينا وقت كبير لو إحنا عندنا حفلة.

ممكن اللى يعرف أن "ألفا" فى الزمالك يتخيل أن الأسعار هـ تكون عالية، لكن فى الحقيقة الأسعار هناك تناسب طبقات كثير لأن فيه حاجات غالية وحاجات ثانية أرخص، كمان "ألفا ماركت" بـ يعمل عروض وتخفيضات كل شهر يعنى ممكن تشترى منه حاجات أرخص من بره.