أشهر من نار على علم، لكن عدى 4 سنين تقريبًا من عمر كايرو 360 من غير ما نكون كتبنا عنه، كان لازم نسلط الضوء على محلات «العجيل» الشهيرة ونعرف اللي مش عارف هي ليه اتشهرت وبقيت من أهم محلات بيع الإلكترونيات والأجهزة المنزلية وخصوصًا الكهربية، وغيرها من الرفايع اللي مش بـ تلاقيها في أي حتة، وآخر ما تزهق هـ تلاقي حد بـ يقول لك: طيب سألت في العجيل؟ وتروح وتلاقيها في العجيل.

عملنا زيارة لفرع المحل اللي في شارع بغداد في الكوربة في مصر الجديدة، على نفس الصف اللي فيه محلات TBS وڤودافون، تحت البواكي العريقة المميزة لشوارع مصر الجديدة. واجهة المحل ومدخله صغير وعلى الجانبين فاترينات عرض كبيرة فيها كل الحاجات الملفتة والترفيهية زي أجهزة ألعاب البلاي ستيشن والـ xbox والساعات وماكينات الحلاقة الكهربائية وغيرها من الحاجات اللي مالهاش علاقة ببعضها، لكن العلاقة الوحيدة اللي بـ تربطها أنها موجودة عند العجيل، وهـ نعطيكم أمثلة على الحاجات دي.

من الداخل المحل كبير فعلًا، لكن بمساحة طولية داخلية، ممكن تمشي فيها وتتفرج على المعروضات المتنوعة من الأجهزة المنزلية زي المكانس والسخانات والتليفزيونات والأفران والميكرويف، كل الماركات موجودة وفيه موديلات مختلفة من كل ماركة كمان. الحقيقة ما كانش تركيزنا على الأجهزة الكهربائية وقت الزيارة أولًا لأنها موجودة في أماكن ثانية كثير أكثر تخصصًا، وثانيًا لأن أسعار العجيل بشكل عام بـ تبقى أغلى بحاجة بسيطة من مناطق زي شارع عبد العزيز وباقي المحلات اللي بـ تبيع أجهزة منزلية وبس. فكان تركيزنا على الحاجات غير التقليدية والكماليات اللي قولنا عليها، واللي أغلبها ينفع يُقدم كهدايا، وفيه حاجات لهواة الاقتناء وأصحاب الهوايات الخاصة.

موبايلات سامسونج وآي فون بكل موديلاتها، تقريبًا مافيش أنواع ثانية، وأجهزة بلاي ستيشن 3 معدلة بأسعار من 2500 لـ 3000 جنيه حسب الملحقات اللي معاها، وفيه xbox ومعاه وحدة الـ Kinect و5 ألعاب ومعدل برضه بسهر 3100 جنيه. ولسه فيها أجهزة بلاي ستيشن 2 بأسعار مميزة، بـ 890 جنيه تقدري تشتري واحد ومعاه 2 ذراع و10 ألعاب. وفيه مساحة كبيرة من الواجهة مخصصة لماكينات الحلاقة بالكهرباء من ماركات فيليبس وبراون وموسر الألمانية، من أول موديلات حلاقة الشعر العادية للـ Trimmer المخصصة للذقن وتضبيط الشارب والحاجات دي، فيه موديلات ألماني أصلي أسعارها بـ توصل لـ 1200 جنيه، وفيه موديلات مصنوعة في الصين أسعارها من 150 لـ 600 جنيه، مش وحشة برضه بس لازم تتأكد أنت بـ تدفع فلوسك في إيه.

الساعات ماركة Guess و Alba هي المسيطرة على فاترينات «العجيل» وهي ساعات كوارتز أقرب للكلاسيكية، مافيش موديلات كثير معروضة لكن الموجود شيك فعلًا وأصلي، أسعار من 600 جنيه لحد 1300 جنيه، مناسبة جدًا للهدايا وللأناقة طبعًا. وفيه مجموعة من الكاميرات الديجيتال ماركة Nikon وSony بأسعار من 1500 لـ 3500 جنيه، وغالبًا هـ تلاقي عروض على كل المعروضات طوال السنة، والسعر مكتوب ومشطوب عليه ومكتوب السعر الجديد جنبه والحاجات دي، بس ما ننكرش أن الطريقة التسويقية دي ناجحة جدًا في مصر.

هنا من الأماكن القليلة الللي ممكن تلاقي فيها نظارات مُعظمة (400 جنيه) وبعض معدات الصيد، وبايب وولاعات أنيقة وبعض الإكسسوارات المنزلية اللي ممكن تستخدمها كتحف أو ديكورات، ولو خطر في بالكم أي حاجة غريبة مش عارفين ممكن تلاقوها فين بـ ننصحك تسأل في أي فرع من فروع العجيل الموجودة في مصر الجديدة والمهندسين والعجوزة والتجمع الخامس ووسط البلد والمعادي، ولغاية دلوقت إحنا مش عارفين الفرق بين اسم "العجيل" و"رضوان العجيل" ومش فاهمين لو كان حق امتياز أو انفصال بين شريكين، لكن المهم أنهم بـ يبيعوا نفس الحاجات تقريبًا، وبـ يعملوا عروض تقسيط معقولة، لكن كل فرع له شروط مختلفة يفضل تسألوا عليها وأنتم هناك.