مع التوسع السريع لأماكن التسوق على اختلافها فى القاهرة، "زارا هوم - Zara Home" أثبت أنه مكان هائل بـ يلبى احتياجاتك من الإكسسوارات المنزلية المعاصرة بجودة ممتازة. بعد افتتاح أوائل فروعهم فى سيتى ستارز هليوبوليس ومول العرب فى مدينة 6 أكتوبر، نجاحه الكبير وصله لافتتاح أحدث فروعه فى المول الضخم كايرو فيستيفال سيتى.

بعرض منظم وأرفف وترابيزات عرض بيضاء، المحل الواسع بأضوائه المبهرة على ما يبدو بـ يعرض على حسب المجموعة بدلاً من تصنيف معين للمنتج، والطريقة دى أحيانًا بـ تصعب من عملية التسوق.

صحيح كثير من المعروضات فيها إحساس بالرقى والشياكة، بدرجات من الرمادى الخفيف، البيجات والكريمى، معروضات ثانية مفرحة وغنية بالألوان، وكلهم فى نفس الوقت بـ يحافظوا على درجة من الرقى والجودة العالية. إكسسوارات منزلية جامدة بالشكل ده برضه أكيد مكلفة، أسعارها تتراوح بين المستوى المتوسط والغالى. بالنسبة لطاقم الموظفين كانوا غير ملحوظين بدرجة كبيرة، وبكده قدرنا نتفرج براحتنا.

أى حاجة تخطر على بالك من أقمشة البيت هـ تلاقيها موجودة، من مفارش الترابيزات والمنسوجات، لغاية مستلزمات غرف المعيشة والحمامات. بطانيات ملفتة للنظر ناعمة وثقيلة كان سعرها 1299 جنيه، أما المخدات الطبية، وأغطيتها ومفارش السرير بـ يبيعوهم على حدة. سلال غسيل من الخوص متوفرة بمجموعة من الألوان، والأحجام والأشكال، أسعارها تبدأ من 500 جنيه، وكمان صناديق تخزين جذابة ودواليب على الموضة بأسعار أرخص.

زارا هوم بـ يقدم كمان هدوم بيت رجالى وحريمى، مع مجموعة من فساتين سهرة قطن محتشمة (399 جنيه)، لكاليك (349 جنيه)، بيجامات كاملة وأرواب. شماعات ملابس مبتكرة بتصميمات كثيرة، منها شماعة من الساتان بألوان مبهجة، وأشكال ورد لطيفة شدوا انتباهنا (129 جنيه/ لعبوة من 3 قطع).

مجموعة من أغطية المخدات برضه معروضة، وتعتبر إضافة ممتازة لغرف النوم أو المعيشة، وكمان يمكن شراء حشو المخدات (+50 جنيه). فوط للشاى من القطن الخالص عبوتها مكونة من قطعة، أو اثنين أو ثلاثة، بتصميمات كثيرة بلون واحد أو ألوان متعددة سعرها حوالى 129 جنيه.

بالنسبة لمستلزمات الأكل والترابيزات مافيش أكثر منها. أطقم مفارش وأرضيات سفرة متوفرة، وكمان تشكيلة كبيرة من الكؤوس، الماجات وباقى أصناف الصينى. طقم عصيان فوندو جذاب من 6 قطع عليها فيلة ذهبية صغيرة كان سعره 129 جنيه. صوانى لا غنى عنها موجودة بمجموعة من الأحجام والتصميمات، منها الخوص (399 جنيه) أو شكل ثانى عتيق جذاب سعره 499 جنيه. متوفر كمان عليقات حائط جميلة على شكل فراشة (99 جنيه) ومقابض باب مميزة.

حليات ديكور على الموضة منتشرة وسط تشكيلات إكسسواراتهم المختلفة، وتشمل رأس وحيد القرن بـ تتعلق على الحائط (500 جنيه)، سحلية ذهبية صغيرة (259 جنيه) وكبيرة (349 جنيه)، مع تماثيل لحيوانات ثانية وشموع ديكور. الأباجورات إما مبتكرة أو تخطف العين بتصميمها وفى نفس الوقت محتفظة بالبساطة؛ أباجورة مكتب على شكل حصان سعرها 1,200 جنيه، وكمان اختيارات من الأكريليك أكثر حداثة.

منطقة كاملة مخصصة لمجموعة عطور زارا هوم، ومعاها شموع رائحتها روعة وأسعارها غالية شوية (200 جنيه/ 259 جنيه)، شمع على شكل ورد (79 جنيه/ 3 قطع)، معطر غرفة، وعلب من أعواد بخور (49 جنيه)، معطر عربية قوى الرائحة (129 جنيه) وفواحات رائعة الشكل، مع حاجات ثانية. منطقة صغيرة برضه مخصصة للأطفال، بعدد من المفروشات المناسبة لأى حضانة.

فرع زارا هوم بـ يقدم مجموعة كبيرة من الإكسسوارات المنزلية الرائعة تمشى مع كل الأذواق، وإحنا معاك أن الأسعار جايز عالية شوية، بس الجودة عندهم أعلى من أماكن كثيرة فى القاهرة.