جوائز اختيارات المحررين لعام 2014 لأفضل أماكن بيع المنتجات المتخصصة - تسوق Feature - كايرو 360
 







جوائز اختيارات المحررين لعام 2014 لأفضل أماكن بيع المنتجات المتخصصة
جوائز اختيارات المحررين لعام 2014 لأفضل أماكن بيع المنتجات المتخصصة
اصدرت في: 19/06/2014

الجائزة دي اللى هـ يحصل عليها الأماكن اللى سعت أن يكون لها سوق متفرد خاص بها، ما بين الطعام الجورميه ومحلات كتب الكوميك، دي مغامرة كبيرة تحسب لهم أنهم يبيعوا منتجات مافيش غيرهم اللى متخصص فيها، وفكرة أنك تعرف بوجود محل بـ يبيع حاجة عمرك ما كنت تحلم تشتريها مالهاش مثيل.


جورميه - Gourmet

شراء طلبات البيت من السوبر ماركت متعة ما بـ يقدرهاش كثير من الناس، يمكن لأن ناس كثير مننا بـ تحب تأكل كل حاجة على الجاهز، أو لأن مافيش أسهل من الديليفري. جورميه أخذ تجربة التسوق لمرحلة أعلى بكثير، سواء بنظافة المكان أو مستوى الخدمة وجودة المنتجات. جورميه قادر أنه يقنعك أنك شيف عالمي وناقصك بس شوية مكونات تشتريها من هناك... أما لو مالكش في الطبيخ ولك في الأكل بس هـ تلاقي أنواع جبن عالمية مش هـ تلاقيها في أي مكان ثاني.

 

لا فروماجيري - La Fromagerie

بما أننا بـ نتكلم عن الجبنة وأنواعها اللي مش سهل تلاقيها في أي سوبر ماركت، عندك محل لا فروماجيريه متخصص في بيع الجبن بس... هو صحيح أسعاره كفيلة بأنها تخرم لك أي ميزانية، إلا أنه ينفع جدًا لو عاوز تبهر ناس في عزومة بطبق حوادق وجبن ما حدش ذاقها قبل كده.

 

هاوس أوف كوكوا - House of Cocoa

جنة مدمني الشوكولاتة على الأرض، وأول محل من نوعه في مصر. أرقى وألذ أنواع الشوكولاتة اللي ممكن تسافر بلاد بره علشان تشتريها موجودة كلها هناك. ده غير أنه بـ يبيع أدوات الفوندو ونافورة الشوكولاتة... مين مننا ما يحبش نافورة شوكولاتة في بيته؟

 

كريبتونايت - Kryptonite

لكل أصحاب الطفولة المتأخرة زي حالاتنا كده من عشاق الكوميكس والأبطال الخارقين... أول محل في مصر متخصص في بيع الكوميكس وأي شيء له علاقة بها من قريب أو بعيد، ده المحل اللي هـ تدخله تحس أنك رجعت طفل من أول وجديد.

 

بلاي أند ترايد - Play N Trade

مافيش أجمل من إحساس أنك تشتري لعبة بلاي ستايشن أو ويي جديدة وتجربها لأول مرة، خصوصًا أن لو اللعبة مشهورة وكل أصحابك بـ يتكلموا عليها... طبيعي أن بلاي أند ترايد يبقى في قائمتنا... عن إذنكم، عاوزين نقوم نخلص الجيم.

 

ديوان - Diwan

لحد وقت قريب في مصر كان فكرة أنك تحب تقرأ دي حاجة غريبة... وأن القراءة والكتب مكانهم بين حوائط الفصول في المدرسة أو ترابيزة السفرة وأنت قاعد تذاكر وجنبك كوم ساندويتشات الحلاوة وكوب الشاي. ديوان انفردت بافتتاح أول مكتبة متخصصة لبيع الكتب بجميع أنواعها واتجاهاتها... دلوقت تقدر ترفع رأسك فوق وتقول أنك دودة كتب بكل فخر، وتقوم بجولتك التأملية -اللي ما حدش هـ يفهمها غير لو بـ يحب الكتب- بين أرفف ديوان براحتك.

 

ألف مبروك للفائزين!

مزيد من الصور
  • جوائز اختيارات المحررين لعام 2014 لأفضل أماكن بيع المنتجات المتخصصة
  • جوائز اختيارات المحررين لعام 2014 لأفضل أماكن بيع المنتجات المتخصصة
  • جوائز اختيارات المحررين لعام 2014 لأفضل أماكن بيع المنتجات المتخصصة
  • جوائز اختيارات المحررين لعام 2014 لأفضل أماكن بيع المنتجات المتخصصة
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
19/06/2014
-