دليل كايرو 360 لأفضل أماكن شراء الورد وكيفية اختياره فى القاهرة - تسوق Feature - كايرو 360
 







دليل كايرو 360 لأفضل أماكن شراء الورد وكيفية اختياره فى القاهرة
دليل كايرو 360 لأفضل أماكن شراء الورد وكيفية اختياره فى القاهرة
اصدرت في: 30/10/2014

كثير من المصريين بـ يعتبروا الورود كنوع من أنواع الكماليات أو الرفاهيات كمان، وبـ يكتفوا أنهم يتفرجوا عليه من بعيد، ومع مرور الوقت والسنين، بـ يشتروه في المناسبات واحتمال للعيانين بس كمان، رغم أن الورد ده بـ يسعد الروح ويبهجها ويخليك تبدأ يومك سعيد وفرحان، حتى لو ما حدش اشتراه لك وأنت اشتريته لنفسك، بس طبعًا الشعور بـ يبقى أحلى لما حد بـ يحبك يجيبه لك، مش علشان رومانسية بقى والجو ده لكن علشان أنك اخترت هدية جميلة تفرح بها اللي أمامك، هدية بـ تفرح الروح ومالهاش أي استخدام آخر غير الشعور بالجمال والحب، عارفين ليه الأجانب بالنسبة لهم الورد لازم يبقى موجود في البيت زي الزيت والسكر عندنا كده؟ علشان عيونهم تعودت تشوف الجمال كل يوم، وينبسطوا به، وعدم وجوده في البيت فعلًا بـ يسبب لهم أزمة.

وكايرو 360 حبت تسهل لك موضوع شراء الورد بكل الأسعار اللي تناسبك من أول 2 جنيه لحد اللي تحب تصرفه في الورد، فـ قررنا أننا نسهل عليك الموضوع ونقول لك نصائح بسيطة تخليك تشتري ورد وتستمتع به في البيت، ولو تحب كمان تزرعه بأسعار معقولة جدًا (برغم أننا مش خبراء متخصصين في الورود، دي نصائح ناتجة عن الممارسة بس).

أولًا: لو أنت ما بـ تحبش تنسق الورد بنفسك اختار بعناية المحل وبـ يبقى شكله باين من بره ذوقه حلو ولا وحش، علشان ما تلبسش في بوكيه فيه كل ألوان الطيف موف على أحمر على أصفر ويقول لك اتفضل يا بيه ورد جميل. المحل اللي ذوقه حلو بـ يبان في البوكيهات اللي بـ يبقى مخرجها بره، أو حتى تنسيقه لأماكن الورد جنب بعض عنده داخل المحل شكلهم حلو ولا مهرجان ألوان مالهاش علاقة ببعض.

ثانيًا: يُفضل لو تبقى محدد شكل معين في دماغك لبوكيه الورد وتنفذه هناك والسعر اللي يناسبك كمان علشان ما تتدبسش في بوكيه بـ 600 جنيه، وفيه أشكال كثير حلوة وبسيطة، زي أنك تختار وردة الليلي أو الليليان والفرع الواحد بـ يبقى بحوالي 20 جنيه أو 25 جنيه، وتحط حوله ورد أبيض مستورد أو على حسب اللون اللي اختارته يناسبه، أو ممكن تحط حولها ورد الـ Daisy وبـ يبقى فيه منه ألوان كمان موف أو أحمر دم الغزال.

كمان أنت بـ تدخل المحل بـ تقول للراجل أنك عاوز بوكيه في حدود مبلغ معين فليكن 30 أو 50 جنيه، وتبدأ تفنن فيه براحتك وممكن تستعين بمساعدته لو توهت وسط الورود. وبـ يكون فيه بوكيهات جاهزة لو أنت مستعجل وما لكش في التفنين، بـ يبدأ من 100 أو 150 جنيه لحد ما شاء الله، أنت وذوقك بس نصيحة بلاش تزود فوق 300 جنيه.

فيه أنواع من الأزهار بـ ننصح تجنبها في البوكيه لأن شكلها مش بـ يبقى حلو إلا لو أنت بـ تحبها وبـ تحب شكلها في البيت، منها زهرة عباد الشمس وعصافير الجنة، كانوا موضة زمان بس حاليًا الأزهار المستوردة خلت شكلهم مش حلو في البوكيه.

نيجي لأكثر نوع ورد إحنا بـ نحبه جدًا وده لندرته وجماله الساحر.. "التيوليب" بكل ألوانه بس الأبهى الأبيض والروز، هي مشكلته الوحيدة أنه غالي شوية، لأنهم بـ يستوردوه من خارج مصر، وأجمل الدول اللي بـ تزرعه هولندا، وساعات بعض المحلات بـ تطلبه لك كطلبية مخصوص فالسعر بـ يكون أغلى طبعًا، لأنه بـ يستخدم في المناسبات السعيدة كجيرب للخطوبة أو الفرح، الوردة الواحدة برضه بـ تبقى بحوالي 20 جنيه.

فيه طرق كثيرة ممكن تخلينا نستمتع بالورد في بيتنا من غير ما ندفع فلوس كثير، يعني الورد بتاعنا البلدي الحلو أبو ريحة ده، لو جبته كل يوم مش هـ يكلفك أكثر من 5 جنيه، وتحطه في فازة في مياه، كمان كل الأنواع اللي سبق ذكرناها ممكن تتحط في فازات عادي، لكن لو عاوز تهتم بالورد وتستمع بزراعته، ممكن تشتري قصرية زرع صغيرة وتسقيها كل يوم الصبح أو يوم ويوم على حسب نوعها، والواحدة بـ تبقى بحوالي 5 جنيه، كمان فيه زرعة البامبو دي ممكن تحطها في فازة كبيرة لوحدها في البيت وتراعيها كل يوم بـ يبقى شكلها حلو.

 ووقت معرض الزهور اللي بـ تعمله وزارة الزراعة، هـ تلاقي كل أنواع الورود اللي تحبها بأسعار قليلة جدًا، أو معرض نبات وزهور الربيع في حديقة الأورمان بس ده له وقت معين في السنة.

أهم حاجة أن قلبك يستشعر الجمال اللي ربنا خلقه في الوردة، أنها تبسطك بمجرد ما تشوفها، وبأن الجمال اللي أنت شايفه في الورد ده ما هو إلا جمال ربنا خلقه في قلبك.

وحرصًا منا على راحتكم وفرنا لكم عناوين بعض المحلات:

أطلانتيس روزس - Atlantis Roses في المعادي.

زهور الربيع في الزمالك.

تاتش فلاورز - Touch Flowers في الزمالك.

سبرينج فلاورز في الدقي.

زهور سيلومي - Selloumi Flowers في المهندسين.

وفلاور باور – Flower power  في القطامية.

أوتسايد إن - Outside in في هليوبوليس.

هوب فلاورز - Hope Flowers في مصر الجديدة.

زهور مناسبة في مصر الجديدة.

دمتم سعداء بحب الورد وبحب الجميل خالق الجمال!

مزيد من الصور
  • دليل كايرو 360 لأفضل أماكن شراء الورد وكيفية اختياره فى القاهرة
  • دليل كايرو 360 لأفضل أماكن شراء الورد وكيفية اختياره فى القاهرة
  • دليل كايرو 360 لأفضل أماكن شراء الورد وكيفية اختياره فى القاهرة
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
نجلاء أشرف
حرر بواسطة:
نجلاء أشرف
تاريخ النشر:
30/10/2014
محرر مساعد بالموقع العربي، حالمة جدًا وعايشة في كوكب ثاني وبـ تحب تكتب عن كل حاجة بـ تحصل لها، دائمًا بـ تضحك حتى في أصعب المواقف وبـ تحب البلالين والتيوليب والصحبة الحلوة.