طبعًا كل البنات بـ تحب وقت التخفيضات جدًا، خاصة أنه بـ يخلينا نشتري حاجات كثير ونحس أننا انتصرنا على غلاء الأسعار وفزنا بحاجة ذوقها راقي وسعرها كويس، وده مش بس متوفر في "شوبيت – Shubette".. لأ دول أسعارهم معقولة وعاملين تخفيضات على التخفيضات.

الحقيقة أننا بـ نمر على المحل ده كل لما نتزنق في مناسبة، ونحب نشتري حاجة سعرها معقول وذوقها كويس، ودائمًا بـ يقضى الغرض اللي إحنا رايحين علشانه، المحل مش كبير خالص في شارع التحرير في الدقي، أول ما بـ تدخل بـ تلاقي على يمينك في الوش مجموعة جاكيتات جلد كبيرة سفنج على شكل مربعات أو سمبوكسات وفيه سوستتين على الجنب لونها ذهبي، فيه منه اللون الأسود والبني، وتخيلوا بكام؟ بـ 175 جنيه بس.

وكان فيه أنواع بلوزات طويلة كثير صوف بس نصف كم، مزخرفة بألوان كثيرة مختلفة بالطول والعرض وأسعارها تبدأ من 130 جنيه، وكان فيه جاكيتات خفيفة منها اللون البني والأسود طويل لحد الركبة ومفتوح وله حزام من وراء، وكان بـ 130 جنيه، كمان كان فيه بلوفر طويل لحد الركبة سمبوكسات أسود في أبيض في رمادي وصوف خفيف، شكله حلو جدًا، لأنه من اليدين والظهر لونه أسود والشكل ده من أمام فقط، وكان بـ 130 جنيه برضه بدل 175 جنيه.

وفيه بلوفر لفت انتباهنا جدًا، كروشيه وعبارة عن سمبوكسات برضه بس صغيرة وممتدة على سطر واحد ومكررة، وما بينهم خط أحمر كبير في النص وبعدين سمبوكسات ثانية بس برسمة مختلفة جواها مفتاح صغير، وكان فيه منه كل الألوان تقريبًا، الأسود والبني والأزرق والبيج، وكان بـ 95 جنيه.

كمان كان فيه بلوفر صوف خفيف أبيض في أسود ومن وراء عند الظهر من فوق خالص فيه دانتيل صغير على شكل وردة مفرغة، سادة وبسيط وبـ 95 جنيه، وعنده تشكيلة هاي كول كل الألوان صغير وكبير، بس اللي عجبنا واحد طويل صوف خفيف لونه روز وطويل لحد الركبة وبـ 130 جنيه. وعنده بنطلونات جينز وجيبات وبلوفرات بأشكال ثانية مختلفة، بس دي أكثر حاجات لفتت نظرنا، وكان سعرها مناسب، خاصة أنه عامل قسم كاتب عليه خصم من فوق وكل اللي تحته حاجات بـ 95 جنيه، وقسم ثاني بـ 130 جنيه. بس هتنبسطوا أكيد.