دليل كايرو 360: لشراء الأقمشة من وكالة البلح - تسوق Feature - كايرو 360
 







دليل كايرو 360: لشراء الأقمشة من وكالة البلح
دليل كايرو 360: لشراء الأقمشة من وكالة البلح
اصدرت في: 26/03/2015

وكالة البلح.. المكان اللي اسمه مأخوذ من حقيقة أنه كان سوق متخصص في بيع البلح زمان بقي دلوقت أكبر سوق للأقمشة في مصر، وعلى الرغم من اسمها الغريب اللي ممكن يدل أن الأذواق هناك بلدي ومافيش حاجة راقية، وكمان ضيق شوارعها وزحمتها، الحقيقة أن وكالة البلح فيها أقمشة مميزة جدًا وبـ يوصل سعر المتر منها لآلاف الجنيهات وممكن تكون أحسن مكان تشتري منه القماش لو أنت بـ تحبي التميز والاختلاف في ستايل لبسك وفكرتي في التفصيل بدل من شراء الملابس الجاهزة.

ممكن جدًا تجيبي أقمشة رائعة من وكالة البلح بشرط أنك تكوني عارفة إزاي تتعاملي مع المكان ده وتطلعي منه بالحاجة اللي أنت عاوزاها.. لأنك لو مش عارفة ده هـ تلاقي نفسك في متاهة من الأسعار والأذواق وأنواع القماش اللي مش عارفاها وممكن جدًا يتضحك عليكي في السعر أوتشتري قماش مش مناسب.

إحنا كان لنا أكثر من تجربة في وكالة البلح.. لفينا في شوارعها وشفنا كميات الأقمشة الرهيبة والأذواق المتنوعة جدًا اللي هناك.. وفيه مرات طلعنا منها بنتائج هائلة وطبعًا مرات ثانية اتضحك علينا في الأسعار أو نوعية القماش.. علشان كده حبينا نقدملك خلاصة التجارب دي في سبعوصايا أساسية لازم تأخذي بالك منها لو ناوية تشتري قماش من الوكالة.. اقرأيها معانا وخليكي ناصحة:

 

خدي اليوم من أوله:

لو ناوية تنزلي الوكالة الأحسن أنك تروحي الصبح مش بالليل والأفضل أنه يكون يوم في وسط الأسبوع.. ويا سلام لو قدرتي تنزلي في يوم ماوراكيش فيه حاجة ثانية علشان تقدري تلفي براحتك جدًا من غير استعجال، صدقيني هـ تحتاجي ده.

الميزة في النهار أن الضوء هـ تخليكي تشوفي القماش بشكل أوضح وأحسن وطبعًا في وسط الأسبوع الزحمة هـ تبقى أقل كثير في الوكالة خصوصًا أن شوارعها ضيقة جدًا ومليانة بالبضاعة والعربيات الصغيرة اللي بـ تبيع حاجات مختلفة كثيرة من أول الشرابات والإيشاربات لحد أدوات المطبخ والنظافة! تخيلي كمان مع الزحمة.. هـ تبقى حاجة مثيرة للأعصاب ومش هـ تعرفي تركزي في اللي أنت عاوزاه خالص.. بالعكس، هـ تبقي عاوزة تجيبي أي حاجة بسرعة وتمشي.

 

تجاهلي البياعين تمامًا وأنت ماشية:

من أول ما تحطي رجلك في شوارع الوكالة هـ تلاقي "اتفضلي يا آنسة/ مدام" أو "تعالي عندنا حاجات حلوة" بـ يطاردوكي في كل خطوة... لازم تتجاهلي ده تمامًا وما تدخليش أي محل وخلاص، لأن ده غالبًا هـ يبقى تضييع وقت ومجهود على الفاضي..ما بين محلات البنطلونات الجينز ولبس البيت والإيشاربات وغيرها، هـ تحتاري ويمكن تصرفي فلوسك قبل ما تجيبي الحاجة اللي رايحة علشانها، ده غير أنك لو عاوزة حاجة مميزة وراقية صعب تلاقيها في المحلات اللي بـ تستخدم الأسلوب ده لأن أغلبها محلات صغيرة وما عندهمش تنوع كبير في الأذواق.

 

إزاي تختاري المحل:

لو عاوزة أقمشة مميزة وشيك لفستان سواريه أو قطعة ملابس قيمة ادخلى على طول على المحلات الكبيرة، يعني لو عاوزة دانتيل أو شيفون أو حرير –خصوصًا لو منقوش- صعب جدًا تلاقي حاجة ذوقها حلو في المحلات الصغيرة، أما المحلات الكبيرة واللي هـ تلاقيها مقفولة بأبواب زجاج ولها مداخل ويفط واضحة في وسط دوشة الوكالة، هـ يبقى فيها أذواق متنوعة وأرقى بكثير عن المحلات المفتوحة على الشارع.

أما لو هدفك أنك تشتري أقمشة عادية للبس كاجوال زي الجينز والكتان والأقطان السادة، يبقى الأحسن أنك تدخلي المحلات الصغيرة لأن أسعارها أرخص كثير من المحلات الكبيرة اللي بـ تعتمد على اسمها في أنها تغلي السعر، بس لازم تخلي بالك من جودة القماش وما تخليش السعر القليل يغريكي تجيبي أي قماش من غير ما تكوني مقتنعة تمامًا بجودته وذوقه.

 

ما تشتريش أبدًا من أول محل:

حتى لو لقيتي حاجة عاجباكي، لازم الأول تلفي على أكثر من محل لسببين: أولاً: كل محل فيه أذواق وأقمشة مختلفة عن الثاني.. فممكن جدًا تلاقي حاجة تعجبك أكثر من اللي شوفتيها في الأول، وثانيًا: اللف على أكثر من محل والسؤال على الأسعار في كل واحد هـ يعرفك مستوى أسعار كل نوع من القماش فيبقى أصعب أنه يتضحك عليكي في السعر لما توصلي للقماش اللي أنت عاوزاه، وعلى فكرة البياعين متعودين على كده ومش بـ يزعلوا لما تقوليلهم: "هـ اكمل لف وارجعلك ثاني".

 

إيه أحسن المحلات؟

لو عاوزة تجيبي أقمشة سواريه يبقى محل "دانتيلا" و"روتانا" من أحسن المحلات اللي ممكن تلاقي فيها الدانتيل والحرير والساتان والأقمشة المطرزة، أما الأقمشة الكاجوال زي الجينز والأقطان فمن أشهر وأكبر المحلات اللي بـ تبيعها "قلتة" و"سنادة" وده من أقدم محلات الأقمشة في مصر، وعلى فكرة فيه محلات من دي لها فروع ثانية في مدينة نصر وغيرها، لكن الأسعار في الوكالة غالبًا بـ تبقى أرخص وإمكانية الفصال أكبر.

 

الفصال ثم الفصال ثم الفصال:

الأسعارفي الوكالة متنوعة جدًا ومتر القماش ممكن يبدأ من 10 جنيه للبطانات والبوليستر لـ 4 و5 آلاف جنيه للدانتيل والأقمشة المطرزة. ونوع القماش الواحد زي الشيفون مثلاً سعره بـ يختلف جدًا من محل للثاني.. يعني ممكن يبدأ من 30 جنيه في محل ويوصل لـ 90 جنيه في محل ثاني حسب خامته ونسبة الألياف الصناعية فيه، علشان كده الفصال قاعدة أساسية في الشراء من الوكالة.. فاصلي واتمسكي برأيك جدًا لأن في بعض الأحيان ممكن توصلي السعر للنصف لو أنت شاطرة.. وخلي بالك البياعين هناك كلهم شاطرين أوي فما تقوليشأو تعبرى أبدًا أن القماش عاجبك أوي وخلاص استقريتي عليه.. دائمًا مثلي أنك لسة مترددة وممكن تمشي في أي وقت.

 

إزاي تشتري القماش؟

بعد ما تنقي القماش لازم تمسكيه بأيدك وتشوفي خامته وكمان تفرزيه وتتأكدي أن مافيهوش عيوب صناعة أو قطع أو تنسيل، ويا ريت تعملي ده قبل ما البياع يقطعه من التوب لأن لو قطعه هـ يبقى صعب ترجعيه. ولازم كمان تستفيدي من البياعين على قد ما تقدري وما تتكسفيش تسأليهم لأن عندهم خبرة فممكن يفيدوكي في نوع القماش المناسب والكمية اللي محتاجاها، ما تنسيش كمان تشتري زيادة ربع أو نصف متر عن القماش المطلوب احتياطي علشان لو جزء من القماش جرى له حاجة أثناء التفصيل أو حبيتي تزودي حاجة في الموديل.

مزيد من الصور
  • دليل كايرو 360: لشراء الأقمشة من وكالة البلح
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
رحاب عبد الناصر
حرر بواسطة:
رحاب عبد الناصر
تاريخ النشر:
26/03/2015
كاتبة.. الكتابة وتصميم الأزياء حياتها، بـ تحب الألوان والمزيكا وبقاليل الصابون. بـ تركز في التفاصيل –زيادة عن اللزوم أحيانًا- وما عندهاش مشكلة تدور بالساعات لحد ما تلاقي الحاجة اللي في بالها. نفسها تعيش فى قصة خيالية أو يبقى عندها آلة زمن.