التصميمات المصرية انتشرت بشكل كبير وسط مشهد التسوق القاهري المتقلب خلال السنين الأخيرة، ومن هنا قدر المصممين والفنانين يحققوا نجاح باستغلالهم لحالة الإعجاب بكل ما هو محلّي وأصلي. رغم كده، السوق وصل لحالة تشبّع نسبيًا، وفكرة المنتجات المحلية تحولت لنوع من التكرار.

"بوب أب شوب - Pop-Up Shop" قدر يبعد عن كل المشاكل دي، والسر أنه اختار بعناية منتجات فريدة وأصلية.

مع مكانه في مول داون تاون القطامية، "بوب أب شوب" يميزه يافطة كبيرة بارزة وسط تصميم المول الهادئ. أول ما دخلنا، بدأنا في الفرجة على كل إكسسوارات المحل الغريبة قبل ما يرحب بنا واحد من مسئولي المبيعات.

أول حاجة وقعت عيوننا عليها كانت حليات وترابيزات من المغرب، الهند وأوزباكستان مع مفروشات وأصيص زرع للزينة صناعة مصرية. المحل بـ يركّز جدًا على عرض عدد من أعمال مصممين مصريين، وإحنا نقدر نطمنك أن كل المعروض عندهم منتجات فريدة من نوعها.

أكثر حاجة أبهرتنا من بين المعروضات كانت مرايا ملونة على الطراز البدوي (1550 جنيه) من المصممة المصرية غادة، لاحظنا كمان عدد بسيط من مخدّات شكلها مريحة بتصميمات مميزة (160: 210 جنيه)، مع صابون Sugar Rush soaps، صواني وعدد قليل من شموع الزينة.

بالنسبة للأزياء والموضة، المكان ده يعتبر جنة لكل عشاق المغامرة من أهل الموضة واللي عاوزين يشدّوا الأنظار بملابسهم المميزة، مجموعة من الأرفف عليها تصميمات لكوجاك، مع تصميمات ثانية من آير مارين، ويكمل الموضوع مع كوفيات مريحة من سيوة، اللي عجبنا من بينهم واحدة سوداء عليها تصميمات بدوّية مبهجة (600 جنيه).

بوب أب شوب كمان بـ يعرض أجمد إكسسوارات ممكن تشوفيها، ماركة Heel Up بـ تقدم خلاخيل مطعّمة (200: 300 جنيه) ممكن تتلبس مع الأحذية كعب عالي علشان تعمل شكل مميز، وكمان بـ يعرضوا تقديم لمستهم الخاصة.. أيوه، دلوقت تقدري تضيفي ريش لأحذيتك. عجبتنا كمان حلقان وعقود نحاسية من تصميم رافي كانت معروضة وقت زيارتنا، والقطعة المفضلة لنا كانت حلق طويل مطعّم باللؤلؤ (1250 جنيه).

بعدها طلعنا على السلم المعدني المتماسك، وهناك أنبهرنا من المعروضات الموجودة في الدور الثاني؛ مجموعة لوحات سريالية رائعة (6000: 17000 جنيه) من الموهوبة إيمي عبد الباقي. يمكن أكثر حاجة أبهرتنا كانت مجموعة "Forgiven" بألوانها القوية البارزة واللي بـ تلعب على فكرة الصراع الفكري الداخلي للإنسان.

لازم نقول هنا أن موظفي المبيعات ساعدونا طوال وقت زيارتنا، ومن وقت للثاني بـ يعرّفونا على المصممين وأعمالهم، وكمان جاهزين يقولوا على الأسعار أول ما نسألهم.

في نهاية الرحلة، نعتقد أننا نقدر نوصف كل حاجة عند "بوب أب شوب" لأيام، منتجاتهم مالهاش حصر وفريدة من نوعها. التمشية في المحل تحس معاها أنك بـ تستنشق نفس عميق من الهواء المنعش، مع التصميمات الفنية اللي تختلف خالص عن أي حاجة شوفناها في أي مكان ثاني.