جوائز اختيارات المحررين لأفضل إكسسوارات المنازل لعام 2015 - تسوق Feature - كايرو 360
 







جوائز اختيارات المحررين لأفضل إكسسوارات المنازل لعام 2015
جوائز اختيارات المحررين لأفضل إكسسوارات المنازل لعام 2015
اصدرت في: 07/06/2015

بالرغم من أن فن الديكور معترف به عالميًا من زمان، إلا أننا فى مصر ما بدأناش نأخذه على محمل الجد إلا من فترة تعتبر قليلة نسبيًا، أقصى اهتمامات الأجيال السابقة المتعلقة بفن الديكور واختيار الأثاث كانت منحصرة في حاجتين مالهمش ثالث: النيش بملحقاته، والصالون المذهب الدمياطي، واللي بـ يعتبروا فخر أي سيدة منزل مصرية أصيلة، واللي كان من الأجيال دي بـ يهتم أنه يفرش بيته بطريقة "مودرن" مختلفة، كان كل اللي بـ يعمله أنه يقلد صورة في مجلة وخلاص.

مؤخرًا، ظهر عدد كبير من الأماكن اللي بـ تقدم رؤية مختلفة في مجال الديكور، وأماكن بـ تعرض إكسسوارات منزلية تناسب مختلف الأذواق والمساحات.

الفائزين بجوائز اختيارات المحررين لعام 2015 لأفضل إكسسوارات المنازل هم:

 

هاوس & جاردن - House & Garden:

قطع الأثاث عند هاوس & جاردن بـ تتميز ببساطتها وجودة خاماتها، ده غير أن المكان بـ يوفر حلول مبتكرة ومختلفة لأي مساحة في البيت، سواء غرف داخل المنزل، أو حتى الحدائق والمساحات الخارجية.

 

ماندالا – Mandala:

ماندالا ممكن يكون المكان المفضل لأي شخص بـ يحب كل ما هو غريب ومختلف، من أول الملابس والإكسسوارات المصنوعة يدويًا، لحد الزيوت العطرية ومنتجات العناية بالجسم الطبيعية المختلفة، كله موجود في ماندالا.

 

باجوا – Bagua:

اسم المحل صيني، معناه الحرفي (8 رموز). ولكن باجوا بـ يُطلق على خريطة لونية مكونة من تسعة ألوان بتوزيعها على أي مساحة بطريقة معينة، المكان هـ يشع طاقة إيجابية وبالتالي ده هـ ينعكس بالإيجاب على الشخص الموجود في المكان ده.

معروضات المحل موزعة بطريقة باجوا وأي حد هـ يدخله هـ يحس بالطاقة الإيجابية، وخصوصًا أن المعروضات كلها بـ تتميز بألوان وتصميمات مبهجة.

 

نيللينز – Nillens:

نيللينز من الأماكن اللي بـ تقدم مفروشات قطنية مصرية محلية الصنع، وبتصميمات ممتازة ومختلفة من ابتكار المصممة نائلة الطحان، أجمل ما في الموضوع أن الأرباح اللي بـ تدخل لنيللينز أغلبها مخصصة للأعمال الخيرية، بجانب الاعتماد على العمالة المصرية في صنع المنتجات المباعة، وده في حد ذاته شيء مفيد وإيجابي.

 

إنكانا ناتشورا – Incana Natura:

مش مجرد مكان بـ يعرض حلول لكسوة الحوائط بالأحجار الصناعية عن طريق عينات فردية تشوفها وسيب النتيجة النهائية على ربنا، المعرض من أوله لآخره مستخدم في تصميمه الأنواع اللي بـ يقدموها، وبالتالي أنت بـ تشوف النتيجة النهائية على الطبيعة، ده غير أن عندهم ألوان وأشكال متنوعة من الأحجار الصناعية اللي أكيد استخدامها يعتبر حل مختلف وأنيق يناسب مختلف الأذواق.

 

ديزاين إمبوريوم – Design Emporium:

من الأماكن اللي لها الريادة في عالم الديكور والتصميم الداخلي في مصر، لأنها موجودة على الساحة بقى لها 24 سنة، ديزاين إمبوريوم بـ يعرض مجموعة كبيرة من الماركات العالمية والمحلية في مجال الديكور واللي بـ تناسب أي ذوق. 

 

إيكليجو – Eklego:

تصميمات قطع إيكليجو مودرن، بسيطة ومميزة في الوقت نفسه، المكان بـ يعرض عدد كبير من تصميمات المعماريين والمصممين المصريين، بالإضافة لعدد من الماركات العالمية المعروف عنها جودتها، إيكليجو يعتبر مكان مثالي تشتري منه هدية بسيطة ومختلفة لأي شخص عنده بيت جديد.

مزيد من الصور
  • جوائز اختيارات المحررين لأفضل إكسسوارات المنازل لعام 2015
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
07/06/2015
-