جوائز اختيارات المحررين لأفضل أماكن بيع المنتجات المتخصصة لعام 2015 - تسوق Feature - كايرو 360
 







جوائز اختيارات المحررين لأفضل أماكن بيع المنتجات المتخصصة لعام 2015
جوائز اختيارات المحررين لأفضل أماكن بيع المنتجات المتخصصة  لعام 2015
اصدرت في: 08/06/2015

ممكن تكون الأماكن الفائزة في المجموعة دي متفرقة في مجال تخصصها، إلا أن اللي بـ يجمعها هو حاجة واحدة: أنهم قدموا للسوق مجموعة من المنتجات الغريبة وغير المعتادة للمستهلك المصري المعروف عنه أنه مش بـ يفضل التغيير أو تجربة أي حاجة جديدة مش معتاد عليها، وبالرغم من كده قدروا أنهم يغيروا عدد كبير من الثوابت عند المستهلك، وكمان قدروا يحققوا نجاح بأفكارهم الجديدة اللي تنفيذها في حد ذاته نوع من المخاطرة.

الفائزين بجوائز اختيارات المحررين لعام 2015 لأفضل أماكن بيع المنتجات المتخصصة هم:

 

جورميه مصر – Gourmet Egypt:

لو أنت من هواة الطبخ أكيد هـ يبقى عندك فكرة عن جورميه مصر، ولو ما عندكش فكرة، جورميه مصر هو المكان اللي بـ يجمع أحسن وأجود المكونات اللي ممكن تستخدمها في الأكلات، ده غير أنه بـ يقدم مجموعة كبيرة من المنتجات الغذائية العالمية اللي مش موجودة في أي سوبر ماركت ثانية في مصر.

 

ذا كاندي شوب – The Candy Shop:

أكشاك الحلويات منتشرة وكثيرة في مولات مصر، ولكن ذا كاندي شوب مختلف تمامًا عن أي كشك اشتريت منه، لأنه مش بس بـ يقدم الحلويات المعتادة، ده كمان عنده مجموعة كبيرة من الحلويات المختلفة واللي كنا بـ ننتظر أي شخص راجع من بره مصر يجيب لنا منها.

 

محلي – Ma7ali:

بفرعه الوحيد في شارع 9 في المعادي، قدر محلي أنه يقدم مفهوم جديد ومختلف عن أماكن بيع البقالة والمنتجات الغذائية؛ لأن كل المنتجات عنده محلية الصنع وعضوية، ده غير أنه كمان بـ يبيع منتجات مش سهل تلاقيها في مصر زي "شتني" وهو غموس مبهّر مشهورة به الهند ودول آسيا، وشاي "الكومبوشا" الآسيوي.

 

وادي فوود – Wadi Food:

حتى من قبل ما يفتح فروع خاصه به، ووادي فوود محقق نجاح بجودة منتجاته الغذائية المتنوعة اللي طول عمرنا بـ نقابلها في كل سوبر ماركت بـ نروحها.

 

مزارع دينا – Dina Farms:

مزارع دينا اشتهر من زمان بمنتجاته الزراعية اللي جودتها بـ تختلف عن أي مكان ثاني، وحتى بعد ما فتح فروع خاصة به في المدينة وقدم لنا مجموعة أكبر من المنتجات الغذائية، قدر أنه يحقق نجاح بجودة منتجاته وأسعاره المناسبة.

 

هاوس أوف كوكوا – House of Cocoa:

المكان ده هو جنة محبي الشوكولاتة –وما أكثرهم– في مصر، غامقة، وفاتحة، ومسكرة أو حادقة... كل أنواع الشوكولاتة اللي تحلم بها، أو حتى ما كنتش تعرف أنها موجودة، هـ تلاقيها في هاوس أوف كوكوا.

 

بلووم – Bloom:

من أول الأدوية لحد منتجات التجميل والعناية بالطفل، كل ده موجود في بلووم، واللي يعتبر المكان الوحيد في القاهرة اللي بـ يجمع كل الحاجات دي تحت سقف واحد.

 

شيشة شوب – Sheesha Shop:

بالرغم من أننا مش بـ نشجع عادة التدخين بأنواعها لأنها عادة قاتلة، إلا أن شيشة شوب ممكن يكون مكان أصحاب مزاج الدخان المفضل؛ لأنه عنده أنواع كثيرة من التبغ والشيشة بملحقاتها، بالإضافة للسجائر الإلكترونية. 

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
08/06/2015
-