دليل كايرو 360 لأماكن بيع فوانيس رمضان في القاهرة - تسوق Feature - كايرو 360
 







دليل كايرو 360 لأماكن بيع فوانيس رمضان في القاهرة
دليل كايرو 360 لأماكن بيع فوانيس رمضان في القاهرة
اصدرت في: 18/06/2015

"مرحب شهر الصوم مرحب، لياليك عادت في أمان"

كل سنة نفضل نستنى رمضان وبـ يبقى جوانا شوق عجيب للبركة والخير اللي فيه والفرحة بالحاجات الصغيرة زي الزينة والفوانيس اللي بـ تفرحنا بشهر الصلاة والصوم... أخيرًا رمضان جه بفرحته وزينته اللي في الشارع وطبعًا الفوانيس، اللي كل سنة صناعها بـ يبدعوا في عملها أكثر من السنة اللي قبلها.

كان عندنا فضول شديد أننا نعرف إيه قصة الفوانيس وليه ارتبطت برمضان، فعرفنا أن فيه أكثر من قصة للموضوع منها أن الخليفة الفاطمي كان بـ يحب يشوف القاهرة منورة في رمضان فأمر شيوخ الجوامع يحطوا على كل باب جامع فانوس، ومنها أن الخليفة الفاطمي كان بـ يلف مع الأطفال بالفوانيس وهم بـ يغنوا احتفالاً بقدوم الشهر وإن كانت صعب نصدق شوية أن الخليفة بنفسه بـ يلف مع الأطفال.. وحلو يا حلو ورمضان كريم يا حلو، كرامة الراجل برضه. وآخر سيناريو أن الستات ما كانتش بـ تخرج كثير في العادي إلا في الشهر ده وكان بـ يمشي أمامها ولد صغير شايل فانوس علشان الرجالة يأخدوا بالهم ويوسعوا لها.

وفضل الفانوس مصدر بهجة للأطفال مع الأغاني الجميلة، وبـ تطور الزمن الكبار بقوا بـ يفرحوا بالفوانيس أكثر من الصغيرين، علشان كده كنا لازم ننزل بنفسنا نتفرج على الأشكال الجديدة ونرصد لكم الجديد السنة دي في الفوانيس وأماكن بيعها كمان.

نبدأ بأشكال الفوانيس وأسعارها السنة دي انتشرت أوي الفوانيس الخشب، أيوة خشب بـ يبقى الفانوس كله معمول من خشب رفيع جدًا بـ يتركب زي البازل بس بطريقة فنية وفيه منه كل الأحجام من أول الصغير اللي بـ يتحط في الميدالية ومرسوم جواه نجمة بـ 3.5 جنيه، لحد فانوس كبير أو متوسط بـ يفرق سعره على حسب حجمه، بس فيه منه بـ 35 جنيه وبـ 55 جنيه وأنت طالع لحد 250 جنيه. ممكن تلاقي مرسوم بالتفريغ جامع أو كلمة رمضان كريم أو نجمة كبيرة.

كمان الفن والإبداع كله كان في مزج شكل الفانوس المعدن أو النحاس مع الخرز الكريستال والزجاج الملون، لدرجة أنك تبقى محتار مش عارف تشتري أنهي شكل بينهم، أما بالنسبة للأسعار فطبعًا كل ما كان الفانوس بجودة أحسن وبحجم أكبر كل ما سعره بـ يغلى. الحجم الصغير منهم بـ 35 جنيه في السيدة زينب وبـ 65 جنيه في الدقي. الحجم الأكبر شوية بـ 145 جنيه، والأكبر بـ 250 جنيه.

أكثر شكل عجبنا الفانوس اللي أبوابه طويلة وملونة أحمر وأزرق وأخضر، كمان كان فيه فانوس متخرم نجوم من فوق ونازل صفوف أحجار كريستال صغيرة كل الألوان برضه، شكله كان مبهج جدًا.

أما أشكال الفوانيس العادية اللي هي من معدن خفيف، فأسعارها تبدأ من خمسة جنيه للفانوس الفضي الصغير و10 جنيه للحجم الأكبر و25 جنيه للحجم ما قبل المتوسط أكبر من كف اليد بحاجة بسيطة، و35 جنيه للحجم المتوسط، وفيه أشكال مختلفة زي الفانوس يبقى كله دائرة زجاجية لونها أزرق أو أحمر أو سمبوكسات وسعره بـ يبقى حاولي من 45 جنيه لـ 65 جنيه. كان فيه فانوس نحاس الزخرفة عليه على شكل فراشة كان شكله حلو قوي وكان بـ 35 جنيه.

أما بالنسبة للأحجام الضحمة ننصحكم تشتروها من عند السيدة زينب لأنها رخيصة جدًا هناك، يعني الفنوس يبقى طول البني آدم أو نصفه لو طويل وبـ 250 جنيه بس، وفيه الأصغر منه بـ 125 جنيه، غير الفوانيس القماش على شكل خيمة رمضان، اللي طالعة جديد برضه المتوسط منها بـ 60 جنيه والكبير بحوالي 160 جنيه.

كمان فيه زينة رمضان زي عربية الفول والباسكيت اللي على شكل هلال معمول من قماش خيمة رمضان والقماش المقصوص على شكل مثلثات ومفارش، كلها حاجات مبهجة وبـ تتباع في السيدة زينب بأسعار رخيصة جدًا.

كل سنة وأنتم طيبين وكل سنة ربنا يجعلها في فرح وسرور وطاعة ونور، وما تنسوش أن أهم حاجة أننا نفتكر ليه بـ نصوم في الشهر ده وما نبوظش صيامنا بسلوكيات مش صح.

رمضان كريم والله في عطاءه أكرم، ما تنسوش تفرحوا حبايبكم بالفوانيس.

 

أما بالنسبة للأماكن اللي ممكن تشتري منها فوانيس:

في المعادي: شارع 9 أمام زوبا وبعدها بشوية عند Aunty Anne.

في المنيل: في شارع المنيل عند العمدة قبل ماكدونالدز.

في الدقي: في شارع التحرير تحت الكوبري.

العجوزة: فى شارع الفلوجة عند مستشفى العجوزة خلف نعمة.

مسجد السيدة زينب: فيه شارع كامل مليان أكشاك فوانيس.

وأخيرًا عند سيدنا الحسين وشارع المعز لدين الله الفاطمي.

مزيد من الصور
  • دليل كايرو 360 لأماكن بيع فوانيس رمضان في القاهرة
  • دليل كايرو 360 لأماكن بيع فوانيس رمضان في القاهرة
  • دليل كايرو 360 لأماكن بيع فوانيس رمضان في القاهرة
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
نجلاء أشرف
حرر بواسطة:
نجلاء أشرف
تاريخ النشر:
18/06/2015
محرر مساعد بالموقع العربي، حالمة جدًا وعايشة في كوكب ثاني وبـ تحب تكتب عن كل حاجة بـ تحصل لها، دائمًا بـ تضحك حتى في أصعب المواقف وبـ تحب البلالين والتيوليب والصحبة الحلوة.