5 أماكن لشراء زينة وديكورات رمضان فى القاهرة - تسوق Feature - كايرو 360
 







5 أماكن لشراء زينة وديكورات رمضان فى القاهرة
5 أماكن لشراء زينة وديكورات رمضان فى القاهرة
اصدرت في: 22/06/2015

رمضان مشهور بأن له روح خاصة جدًا به في مصر بـ نحس بها وإحنا ماشيين في شوارع القاهرة، حتى لو كلها مش مزينة أو معلق فيها فوانيس، لو عاوز الأجواء الرمضانية دي تكمّل معاك في البيت، دول خمسة أماكن ممكن تجيب منهم ديكورات رمضانية، من أول الفوانيس لحد المفارش والصواني، واللي هـ تضيف جو خاص لأي عزومة أو سهرة رمضانية في البيت:

 

ألفا ماركت - Alfa Market:

في فروعه المختلفة، هـ تلاقي ألفا ماركت عارض مجموعة كبيرة من قطع الديكور الرمضانية، زي الفوانيس المعمولة بقماش الخيامية، ومجسمات مختلفة لعربات الفول، ده غير مجموعة كبيرة من المفارش بأحجام وألوان مختلفة تناسب أي بيت، أحلى حاجة أن فيه مجموعة كبيرة من المنتجات مصنعة في مصر، وبـ تروح نسبة من الربح لصالح جمعيات خيرية.

 

كوكولينا - Cocolina:

صحيح كوكولينا من الأماكن اللي مشهورة بالهدايا، إلا أن مجموعة الفوانيس المعروضة عنده السنة دي ممكن تخليه من أنسب الأماكن اللي ممكن تلاقي عنده فانوس مبتكر تزين به بيتك، أو حتى تهادي به أي حد أنت معزوم عنده، كوكولينا بـ يقدم مجموعة كبيرة من الفوانيس غير تقليدية من المعدن: مجموعة منهم باللون الأبيض وتصميماتهم بـ تتنوع ما بين المودرن البسيط والزخارف الإسلامية، ودول حجمهم صغير ومتوسط. ومن المجموعة دي برضه باللون النحاسي بتصميمات إسلامية فيها أحجار ملونة، أما الأحجام الأكبر فيه منهم المصنوع بقماش الخيامية، وده منتشر السنة دي في كل مكان، ولكن اللي عجبنا منهم مجموعة بقماش مكتوب عليهم بالخط العربي ومجموعة شبه الأوعية اللي بـ تملأ بالمشروبات الرمضانية، أسعارهم من 75 – 139 جنيه. ده غير أن عنده مشغولات داخل فيها الخوص والخيامية ومجسمات مختلفة.

مليكة هوم أكسسوريز - Malika Home Accessories:

مليكة عنده مجموعة كبيرة من منتجات الديكور الرمضانية؛ من أول حوامل الأكواب المكتوب عليها "رمضان كريم" (6 قطع بـ 150 جنيه، 4 قطع 100 جنيه) ومجموعة ثانية عليها صورة الفنان سيد مكاوي بشخصية المسحراتي الشهيرة بأربع قطع مختلفة بـ 100 جنيه. ده غير مجموعة من فوط اليد المكتوب عليها "رمضان كريم" بأحجام ومقاسات مختلفة (65 – 85 جنيه) ومفارش منقوشة بنقوشات إسلامية موحدة اللون، عجبنا منها واحد قطيفة زيتي سعره 75 جنيه. كل حاجة تقريبًا ممكن تلاقيها هناك، حتى سلال المهملات المغطاة بالخيامية (50 جنيه). مليكة كمان بـ يعمل زينة ومعلقات رمضانية حسب الطلب سعر الواحد 40 جنيه.

كاو - Cow:

بجانب مجموعة كبيرة من الفوانيس المختلفة؛ كاو عنده كمان صواني تقديم بأحجام وأشكال مختلفة، بـ تتنوع ما بين قماش الخيامية والبلاستيك. ده غير أنه كمان عنده مشغولات معدنية كثيرة مطلية باللون الذهبي، زي المباخر ولمبة الزيت وأدوات القهوة والصواني.

دكان دابيكتشر - Dokan DaPicture:

المكان بـ يقدم مجموعة من الصواني (متوسطة 220 جنيه) وحاملات الأكواب (مجموعة من 6 قطع بـ 90 جنيه) اللي عليها تصميمات خيامية مودرن بألوان زاهية، ومجموعة من أدوات التقديم زي مجموعة عليها كتابة بالخط العربي (395 جنيه) مكونة من 6 كوبايات وإبريق، صينية ومفرش. ولكن الجديد عند دكان دابيكتشر أنه بـ يقدم كمان مجموعة من الأفكار الجديدة للهدايا الرمضانية؛ زي علبة لحفظ أدوات الشاي مكونة من زجاجة عصير، شوكولاتة منوعة، شاي وتمر وحاملات أكواب، المجموعة دي سعرها 395 جنيه.

ما تنسوش بعد ما يخلص رمضان تحتفظوا بأي قطعة تشتروها بعد ما تغلفوها كويس وتحتفظوا بها في مكان بعيد عن التراب علشان لما رمضان يهل السنة اللي بعدها تكونوا على طول جاهزين، وكل سنة وأنتم طيبين.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
دينا مختار
حرر بواسطة:
دينا مختار
تاريخ النشر:
22/06/2015
منسق تحريري.. الشخص اللى تلاقيه قاعد لوحده على القهوة الصبح بدري بـ يتفرج على الخلق، سيب لها قلم وورقة فاضية هـ ترجع تلاقيها إما كاتبة قصة قصيرة أو راسمة باب شعبي قديم، تطلعها من وسط مليون بلبسها المنقوش فى منقوش.