ميقات: مشروع لإعادة زرع قيمة الوقت من خلال منتجات ورقية متميزة - تسوق Feature - كايرو 360
 







ميقات: مشروع لإعادة زرع قيمة الوقت من خلال منتجات ورقية متميزة
ميقات: مشروع لإعادة زرع قيمة الوقت من خلال منتجات ورقية متميزة
اصدرت في: 08/10/2015

"توفير الوقت والجهد".. الجملة الأشهر والأكثر تداولًا –تقريبًا- في أوساط العلوم التطبيقية واللي بـ تختصر كتير جدًا من أغراض المتخصصين في دائرة العلوم دي ويمكن حتى عدت علينا كمان في العلوم الإنسانية كفكرة عامة بـ تحكم سلوك البشر وبـ توجهه، يعني نقدر نفسر بها كتير جدًا من أفعال البشر في مساحات معينة.

المحصلة أن كثير جدًا من المنتج البشري كان غرضه توفير الوقت والجهد على مجموعة ما، في مجال ما، لكن الجديد أننا نلاقي عمل بـ يشتغل على الموضوع بشكل أكثر عمومية، عمل بـ يهدف لزرع القيمة دي نفسها في نفوس البشر، يعني المنتج يبقى هو القيمة نفسها!.. آدي الله، وآدي حكمته!

"ميقات".. مشروع بدأ مع بداية سنة 2015، الهدف منه هو إعادة زرع قيمة احترام الوقت عندنا، ومساعدتنا عمليًا على كده، وده من خلال مجموعة منتجات ورقية كلها بـ تقوم بدور المنظم للوقت والمرتب للأولويات والمذكر بالالتزامات.. كل منتج بـ يكون عبارة عن أجندة أو كراسة مصممة من الداخل تصميم مريح ومنظم هـ يساعدك على تفريغ كل التزاماتك فيه وترتيبها وتنظيم وقت القيام بها بشكل سهل وواضح، منها اللي بـ يستوعب وقت طويل شوية -زي أجندة السنة- ومنها اللي بـ يكون موسمي وخاص بفترة زمنية قصيرة نسبيًا لكن بـ تحتاج مننا تركيز في استغلال كل دقيقة من وقتها -زي أجندة رمضان مثلًا- كانت أول منتجات "ميقات" هي أجندة السنة الجديدة "سنة 2015" مع بدايتها، وحقق انتشار جيد جدًا كبداية وكانت ردود الفعل من الناس اللي اشترته مشجعة إلى حد بعيد، أما آخر المنتجات فكانت كراسة "ذي الحجة" ودي كانت معمولة لغرض تنظيم الوقت في العشر أيام الأولى من الشهر الهجري الكريم.

طيب.. فين تلاقي منتجاتهم؟ وإزاي تتواصل معاهم؟ نرجع ونقول أن عبقرية فكرة الـ Co-Working Spaces تكمن في أنها مشروع أم قادر على أنه يضم شوية مشاريع في السكة معاه ويأخذهم تحت جناحه ويربيهم ويكبرهم ويبقى مستفيد منهم زي ما هما مستفيدين منه.
"ميقات" من أول ما بدأ لحد دلوقت وهو معتمد اعتماد شبه كلي في نشر منتجاته على مساحات العمل المشتركة.. وكانت البداية في القاهرة مع عدد منها، وبعد كده بدأوا يحاولوا يطلعوا بره حدود القاهرة للمحافظات الثانية، وبالفعل عملوا كده ودلوقت منتجاتهم كمان بـ تتوزع في منافذ بيع في دمياط وأسيوط.

وعمومًا.. بعيدًا عن فكرة منافذ البيع المباشرة.. هما كمان بدأوا في تطبيق نظام الإرسال عبر البريد علشان يضمنوا تغطية بقية المحافظات بشكل كويس، يعني لو حد عنده طلب بـ يراسلهم على الصفحة بتاعتهم وبـ يبعتوا له المنتج على البريد الأقرب له، تقدر تتعرف عليهم أكتر وتعرف أماكن منافذ البيع بتاعتهم وتتابع الجديد من منتجاتهم وتتواصل معاهم وتقدم لهم اقتراحاتك وآراءك على صفحتهم على الفيسبوك.

مزيد من الصور
  • ميقات: مشروع لإعادة زرع قيمة الوقت من خلال منتجات ورقية متميزة
  • ميقات: مشروع لإعادة زرع قيمة الوقت من خلال منتجات ورقية متميزة
  • ميقات: مشروع لإعادة زرع قيمة الوقت من خلال منتجات ورقية متميزة
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
عمر  مسعد
حرر بواسطة:
عمر مسعد
تاريخ النشر:
08/10/2015
محرر بموقع كايرو 360، يُدعى في أوساط أهل الهلس "مولانا"، وفي رواية أخرى "المغنواتي".. وماله!.. طب هل رأى أحدكم كلامًا يرقص من قبل؟