دليل كايرو 360 لأشهر صفحات كتب التلوين للكبار على الفيسبوك - تسوق Feature - كايرو 360
 







دليل كايرو 360 لأشهر صفحات كتب التلوين للكبار على الفيسبوك
دليل كايرو 360 لأشهر صفحات كتب التلوين للكبار على الفيسبوك
اصدرت في: 24/01/2016

من زمان والأطباء النفسيين بـ يعالجوا الناس بالرسم والتلوين والموضوع كان ماشي عادي وما كانش منتشر أوي بين الناس العادية، كان مقتصر بس على مراكز وجلسات العلاج والتأهيل النفسي لحد ما بقى فيه وعي عالمي بأهمية التلوين للكبار بوجه عام لأنه بـ يخلص من التوتر وبـ يصفي الذهن وبـ يزود الانتباه والتركيز وبـ يعتبر نوع من أنواع التأمل خصوصًا لو الشخص اللي بـ يلون ركز في التلوين فقط وما فكرش في أي مشاكل وسمع موسيقى هادية وهو بـ يلون.

لاحظنا مؤخرًا إقبال كبير جدًا من الشباب في مصر على كتب تلوين الكبار، بدأنا نشوفها في المكتبات الكبيرة وبقى لها قسم لوحدها وكمان شوفنا صفحات كثير أونلاين بـ تبيع كتب تلوين للكبار، ومش بس كده ده فيه منهم بقى زي ما يكون مجتمع صغيرCommunity Club الناس بـ تعرض فيه شغلها اللي بـ تلونه وفيه صفحات بـ تختار أفضل رسمة اتلونت وهكذا.. قررنا نجمع لكم في الموضوع ده أهم الصفحات المهتمة بتلوين الكبار:

Soul Resort

عاملين كتاب قيم جدًا لتلوين الكبار عدد صفحاته 104 صفحة وفيه 86 صفحة تلوين، ووزن الورقة 150 جرام، وبـ ييجي مع الكتاب نوعين ألوان كل نوع فيه 12 لون، مع الكتاب بوك مارك ممكن تتلون و172 اقتراح لأغاني ممكن تسمعها وأنت بـ تلون علشان تروق دماغك، سعر الكتاب 150 جنيه وهو متوفر أونلاين وفي المحلات وتفاصيل البيع موجودة كلها على صفحتهم.

Color Land

الصفحة عملت إصدارين لحد دلوقت من كتب تلوين الكبار Color me Calmو Color me Happy وسعر الكتاب منهم 100 جنيه، الكتاب فيه 20 رسمة للتلوين، مرسومين على وجه واحد علشان الألوان ما تطبعش، وسُمك الورقة 250 جرام وده سُمك كويس يسمح باستخدام أنواع مختلفة من الألوان، مقاس الرسومات 23x 23 سم، مع كتاب التلوين فيه نتيجة 2016 للتلوين وBook Marks وعلبة ألوان فايبر كاسل 12 لون، سعر التوصيل 20 جنيه داخل القاهرة والإسكندرية.


Colorlicious

عدد أعضاء الصفحة 13 ألف دلوقت والصفحة بـ تصدر كتاب تلوين جديد كل شهر للكبار وواحد ثاني للأطفال وبـ يكون فيه مسابقة كل شهر لاختيار أجمل رسمة اتلونت من الكتب.
لحد دلوقت فيه 4 إصدارات للكبار، سعر الإصدار الواحد 120 جنيه ومقاسه A3 ومتوفر بمقاس A4 وده سعره 75 جنيه، وبـ يكونوا عبارة عن 15 صفحة ورق سميك ممكن يتلون عليه بأي نوع ألوان ومناسب للتعليق أو أنه يتحط في برواز.

بالنسبة لإصدارات الأطفال بـ يكون سعرها 85 جنيه وعدد صفحاتها 15 صفحة 10 للتلوين وخمسة للألعاب (توصيل النقط، متاهة، ارسم خطوة بخطوة)، الصفحة من وقت للثاني بـ تعمل عروض وخصومات.. تابعوا الصفحة علشان تعرفوا تشتروا الكتاب بسعر أوفر.


Color Me

من أكبر الصفحات الموجودة وإللي وصلت دلوقت لـ 60 ألف عضو، الصفحة بـ تقدم كتاب سعره 170 جنيه فيه 20 صفحة تلوين مقاس A4 ومعاهم علبة ألوان 12 لون، ومؤخرًا أطلقوا نتيجة 2016 للتلوين كل شهر في صفحة ومقاسها A3 وسعرها130 جنيه، والكتب متوفرة أونلاين وفي المكتبات زي فيرجن ميجا ستورز.

من الحاجات اللي عجبتنا أنهم عاملين لستة أغاني على ساوند كلاود تقدر تسمعها وأنت بـ تلون رسوماتهم ودي كانت فكرة ذكية ممكن تسمعوهم من هنا.


Patternista

صفحة باتيرنيستا بـ تقدم مجموعة على بعضها فيها أجندة 2016، ودي عبارة عن أجندة سنوية فيها 52 رسمة للتلوين بالإضافة للألوان والأقلام وسعرها 190 جنيه، ممكن تستلمها مباشرة من الشيخ زايد أو تطلبها أونلاين في القاهرة بسعر 25 جنيه أو 50 جنيه للإسكندرية أو ممكن تشتريها من منافذ البيع المختلفة المعلنة على الصفحة.


Cairo Coloring Club

من الصفحات القليلة جدًا اللي معروف مين إللي مؤسسها.. "نادي القاهرة للتلوين" من تأسيس الفنانة سحر النادي وهي بـ تقدم أفكار مختلفة منها كتاب للتلوين وجلسات تلوين وورش رسم وDoodling.

الكتاب اللي بـ تقدمه الصفحة اسمه "كتاب البهجة" وهو من أكثر الكتب مبيعًا في كذا مكتبة ومن مميزاته أن حجمه صغير15x15 سم علشان كده هـ نلاقي البنات بـ يحبوه أوي علشان خفيف وسهل في الشنط ويعتبر من أرخص كتب التلوين الموجودة (50 جنيه) وفيه 40 رسمة من الورق السميك.. ومن مميزات الكتاب أنه سلك وده بـ يخلي تلوينه أسهل خصوصًا عند أطراف الصفحة وكمان سهل في الخلع والقص علشان يتحط في برواز من غير ما الرسمة تتقطع.


My Mandalas Coloring Book

الصفحة دي بـ تقدم كتاب بـ ينتمي لمدرسة رسم الماندالا وهي مدرسة قديمة استخدمها البوذيين والهندوسيين للتعبير عن صورة الكون وكلمة ماندالا يعني الدايرة أو القرص.

الكتاب عبارة عن مجموعة رسومات على ورق فاخر A3 بـ ييجي معاه ألوان، وسعر الكتاب بالتوصيل 180 جنيه، الكتاب متوفر في أماكن مختلفة بـ يعلنوا عنها على صفحتهم.

مزيد من الصور
  • دليل كايرو 360 لأشهر صفحات كتب التلوين للكبار على الفيسبوك
  • دليل كايرو 360 لأشهر صفحات كتب التلوين للكبار على الفيسبوك
  • دليل كايرو 360 لأشهر صفحات كتب التلوين للكبار على الفيسبوك
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
شيماء الجمال
حرر بواسطة:
شيماء الجمال
تاريخ النشر:
24/01/2016
بـ تقضي وقتها ما بين الكتابة والعيال والمطبخ وشراء طلبات البيت.. مهتمة بشكل خاص بالكتابة عن كل ما يخص الأم والطفل، بـ تحب الكب كيك زي ما بـ تحب أولادها بالضبط، بـ تعتبر الإنترنت هو الصديق الأوفى في الحياة.