عيش حياة صحيّة مع 5 محلات أكل أورجاينك في القاهرة - تسوق Feature - كايرو 360
 







عيش حياة صحيّة مع 5 محلات أكل أورجاينك في القاهرة
عيش حياة صحيّة مع 5 محلات أكل أورجاينك في القاهرة
اصدرت في: 20/03/2016

الموضوع مش علوم كونية، إحنا ببساطة عايشين في مدينة كلها تلوث، وطبعًا العادات الصحيّة السيئة زي (التدخين والأكل غير الصحّي وغيرهم) مسيطرة علينا، من حسن حظنا كلنا أن الأكل الصحي والأورجانيك في القاهرة أصبحوا دلوقت موضة، وفيه محلات ومطاعم ومحلات عصاير بدأت تروح ناحية الحياة الصحّية في مصر.

وكان طبيعي أن الناس اللي عاوزة تعيش حياة صحيّة في القاهرة تشتكي أن الموضوع صعب، بس فيه أماكن ممتازة موجودة في العاصمة بتسهل عليهم الطريق، بنقدم لهم هنا أحسن وأنظف أماكن الأكل الأورجانيك في القاهرة.

 

نيتشرز جيفت ستورز - Nature's Gift Stores

موقع إلكتروني يعتبر أحسن مكان بيجمع كل احتياجات أكيلة الأورجانيك تحت سقف واحد، وعنده منتجات أورجانيك من مزارع معتمدة في القاهرة مع منتجات ألبان وتوابل وأكلات صعب تلاقيها في أي مكان زي الكينوا والمنتجات الخالية من الجلوتين، ما ننساش كمان أن عندهم مكملات غذائية ومستحضرات تجميل وأدوات منزلية، وبكده أنت مش محتاج تنزل من بيتك خالص، المميز فعلاً عند NGS هو اللحوم والطيور والسمك الخاليين من الكيماويات، من أكثر الحاجات اللي عجبتنا عندهم هي الفراخ البلدي الخالية من الكيماويات، خصوصًا أن طعمها لذيذ لما تتشوي، لو كنت في القاهرة وعاوز طلبك يوصلك في نفس اليوم اطلب أونلاين أو من خلال التليفون.

 

محلّي – Ma7ali

محل أكل أورجانيك في المعادي بيقدم فواكة وخضروات طازجة ومنتجات موسمية ومنتجات ألبان وبيض ومربى وغيرهم، نقدر نقول أن الحاجة المميزة هناك هي البط المدخن (100 جرام بـ 32 جنيه)، وفعلاً من وجهة نظرنا –ووجهة نظر أي حد ثاني جربها– أنه تحفة، عجبنا كمان أن محلّي بيتعاملوا مع مزارع أورجانيك وجمعيات أهلية من كل مصر، منها صوصات ومكرونة من مزرعة "بلدينى" وزيت زيتون من سيوة ورأس سدر وسيناء.

اوعى تنسى تشتري خليط الزعتر السيناوي الرائع من عندهم، المحل مفتوح كل يوم من 11 صباحًا لغاية 7 مساءً ماعدا الاثنين، خدمة التوصيل متوفرة.

 

طبيعي – Tabi3y

شكل التقديم هناك مش فخم زي اللي فاتوا، بس المزرعة الأورجانيك دي مش بس عندها تشكيلة ضخمة من المنتجات أكثر من باقي الأماكن المشابهة، هي كمان بتشجعك تزرع أكل أورجانيك في بيتك وتعرف عملائها بالطريقة.

عجبنا عندهم اللافندر والبردقوش وعشب الليمون، وكمان الخضروات عندهم أسعارها معقولة. منتجات طبيعي موجودة في محلات شهيرة، وتقدر تطلبها منهم مباشرة على تليفون 01021210690. أسعارهم وقائمة منتجاتهم موجودة على صفحتهم على الفيسبوك.

 

مزارع مقار – Makar Farms

احتمال تكون اشتريت حاجة من إنتاج مقار من مترو أو صني أو سعودي أو جورميه أو NGS، لو ده صحيح، أكيد عرفت أن منتجاتهم مصرح بها من وزارة الزراعة الأمريكية وبيقدموا منتجات نظيفة وكمان أكلات موسمية (يعني ممكن تشتري خضروات/ فواكة صيفية في فصل الشتاء والعكس صحيح).

لو كنت عاوز حاجات مش منتشرة للدرجة زي الكرنب الصيني أو الهندباء، تقدر تلاقيها عند مزارع مقار. اعمل طلبك أونلاين أو اطلب منهم يبعتوا علبتهم المغلفة الأسبوعية اللي فيها تشكيلة من الخضروات والتوابل والفاكهة في أول كل أسبوع لباب بيتك.

مش عارف تطبخ الكلام ده إزاي؟ تابع صفحتهم على الفيسبوك وشوف وصفات الأكل اليومية وصورها اللذيذة اللي بتنزل بانتظام.

 

سارة أورجانيك - Sara's Organic

مزرعة أورجانيك مرخصة من الاتحاد الأوربي وبتزرع منتجاتها في مزارع Desert Lake Farms خارج القاهرة، ومنها منتجات طازجة ومربى وعسل أورجانيك وبيض بلدي خالي من الكيماويات.

تقدر تلاقي منتجاتهم عند جورميه و NGSومحلّي وسوبر ماركت جو جرين وصني، عندهم كمان سلّات أسبوعية بتوصل لباب بيتك لها ثلاثة أحجام: صغيرة تكفي من 1: 2 فرد ووسط تكفي من 3: 4 أفراد وكبيرة تكفي من 4: 5 أفراد، والأسعار بالترتيب 270 جنيه، 366 جنيه و537 جنيه.

من أبرز المنتجات هناك الفراولة الأورجانيك اللي تعتبر لذيذة وصعب تلاقيها في مصر، تقدر تطلب منهم أونلاين.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
20/03/2016
-