‏5 أماكن في القاهرة ممكن تشتري منهم منتجات مصرية تراثية - تسوق Feature - كايرو 360
 







‏5 أماكن في القاهرة ممكن تشتري منهم منتجات مصرية تراثية
‏5 أماكن في القاهرة ممكن تشتري منهم منتجات مصرية تراثية
اصدرت في: 11/04/2016

بالرغم من أن بلدنا لها تاريخ طويل، ومرت عليها حضارات أشكال وأنواع، إلا أن لسبب ما ترسخ في أذهاننا أن التحضر هو أنك تعمل كل ما هو أوروبي وغربي –سواء في طريقة الأكل، اللغة وحتى أسلوب الحياة نفسه بأدق تفاصيلها- لدرجة أن لما مثلًا المعماري الكبير حسن فتحي استوحى أسلوبه من الطرز المملوكية والعثمانية ومباديء العمارة اللي استخدمها أهل النوبة انبهرننا كأننا أول مرة نكتشف تراثنا، ونفس الكلام مع مصممة الحلي العظيمة عزة فهمي اللي استخدمت موتيفات شعبية وفرعونية في إبداعتها، وقيس على كده أمثال ثانية كثيرة.

وعلشان ما نطولش عليكم في الكلام، دي مجموعة محلات موجودة في القاهرة بتقدم أعمال مستمدة من التراث المصري، سواء حلي، ملابس أو حتى قطع ديكور تفكرنا بهويتنا الغنية كمصريين:

1 - سامي أمين :

سامي أمين من الأماكن المشهورة بمنتجاتها التراثية المتنوعة اللي معظمها مصنوع من النحاس والجلد الطبيعي. وللي ما يعرفش، الفنان سامي أمين درس فن العمارة في كلية فنون جميلة، واستهوته صناعة الحلي من قبل حتى ما يخلص دراسته، معظم منتجاته مستوحاة من الرموز الشعبية زي السمكة والهلال والخطوط الهندسية.

منتجات سامي أمين كثيرة؛ تشمل الشنط الجلدية بأحجام مختلفة واللي أسعارها بتتراوح بين 490 و 1200 جنيه حسب التصميم. أما الإكسسوارات الحريمي فالحلقان بتبدأ من 75 لـ 90 جنيه، والأعقاد من 80 لحد 390 جنيه. ده غير طبعًا ماديليات المفاتيح (55 : 120 جنيه حسب الحجم والخامة) والأدوات المكتبية.

وجنب ده كله، سامي أمين عنده مجموعة كبيرة من قطع الديكور، زي الكراسي (2070 : 2450 جنيه) ووحدات الإضاءة (270 : 3300 جنيه)، وحتى أغطية مفاتيح الكهرباء وأعمدة الستائر.

سامي أمين فروعه منتشرة في مصر الجديدة، سيتي ستارز والزمالك.

 

2 - نيفين التمان:

بعد رحلة 1988 لواحة سيوة، نيفين التمان ما قدرتش تنسى جمال المنتجات اليدوية اللي شافتها هناك وقررت أنها توصلها لأهل القاهرة. بدأت ببيع منتجاتها في جاليريهات كثيرة لحد ما ابنتها تمارا قررت تفتح محل خاص بمنتجات والدتها ودي كانت قصة محل نيفين التمان.

منتجاتها أغلبها حريمي وبتتنوع ما بين الشنط (900 جنيه وأنت طالع حسب الحجم والخامة)، والشيلان اللي أسعارها بتبدأ من حوالي 190 جنيه. ده غير المحافظ المصنوعة من الجلد الطبيعي والمقالم اللي (بيبدأوا من 250 جنيه). وبخلاف الخامات المختلفة المستخدمة في القطع –زي الجلود والقماش- بصمة المكان المميزة هي قطع النسيج الملونة اللي مشهورة بها منطقة سيوة، واللي غالبًا بتكون في مستخدمة في أغلب القطع بشكل أو بآخر.

إحنا عارفين أن معظم القطع غالية، بس ده وضع طبيعي لأن كل المنتجات مصنوعة على إيد أكثر من 300 سيدة في مناطق مختلفة من مصر. حتى لو مش شاري، خد لك فكرة من هنا.

 

3 - :Creative Egypt

كريتيف إيجيبت في نظرنا من الأماكن اللي قامت بخطوة جدية للحفاظ على الصناعات اليدوية المصرية؛ لأنها بعكس أماكن ثانية أصحابها استهوتهم حرف منطقة بعينها في مصر، كريتيف إيجيبت ضمت تحت علامتها التجارية كل الحرف اليدوية الموجودة في كل شبر فيكي يا مصر.

مهما حاولنا نجمع لكم في المقال عن المنتجات اللي ممكن تلاقوها هناك مش هنعرف، بس مثلًا موجود مجموعة كبيرة من السجاد اليدوي والكليم اللي جاي من مناطق مختلفة، قطع أثاث دمياطي ووحدات إضاءة مصنوعة من النحاس والزجاج الملون، ده غير الملابس وحتى الزيوت العطرية وأدوات التجميل الطبيعية.

ولو أنت بتحب ستايل الديكور المودرن ولكن نفسك تزود عليه نكهة مصرية، هتلاقي مجموعة كبيرة من قطع الأثاث اللي بتجمع ما بين الديزاين الحديث والروح المصرية.

وبما أن المكان جامع تقريبًا كل حاجة، ففرصتك أنك تلاقي حاجة على ذوقك وفي نفس الوقت ما تكونش غالية هتكون كبيرة.

 

4 – مصنع الحرانية للسجاد اليدوي:

إزاي ممكن نجيب سيرة الحرف التراثية من غير ما نتكلم عن الحرانية وسجاد أهل الحرانية. مصنع الحرانية للسجاد اليدوي من الأماكن اللي عترنا عليها بالصدفة، واللي بيقدم مجموعة كبيرة من السجاد اللي معمول من خامات مختلفة وأسعار متنوعة تسمح لأي حد أنه يمتلك تحفة من التحف الفنية المصرية دي.

الأسعار بتختلف حسب المقاس والخامة؛ يعني الكليم الطبيعي (نعتقد مش مصبوغ) أقل مقاس فيه (70×140 سم) بيبدأ من 140 جنيه، أما الملون فمن 210 لحد 940 جنيه. لاحظنا أن فيه نوع اسمه الكليم الرفيع، ونعتقد أنه أحسن نوع لأن أسعاره بتبدأ من 800 لحد 4800 جنيه، وأكيد التصميم وتعقيده عامل مهم في تحديد السعر برضه.

المصنع برضه عنده مجموعة من السجاد الصوف، واللي أسعاره أغلى من الكليم (2820 : 15900 جنيه) أيوه، الرقم مكتوب صح. أما الصوف على حرير فأسعاره (6660 : 24300 جنيه).

أحلى حاجة أن المصنع له موقع إلكتروني ممكن تتفرج منه على منتجاته من غير ما تضرب المشوار.

 

5 – نفرتاري:

إتكلمنا عن الملابس وقطع الديكور المستوحاة من أماكن وتراث موجود لحد النهاردة، نرجع بقى بالزمن لوراء شوية ونروح للتراث أجدادنا القدماء المصريين التجميلي. نفرتاري من الأماكن المختلفة جدًا عن أي محل بيبيع منتجات تجميل طبيعية؛ لأنه كل منتجاته طبيعية 100% ومعموله بنفس المكونات اللي استخدمها القدماء المصريين.

نفرتاري عندهم منتجات تجميل زي الماسكات الطبيعية (35 جنيه)، وأملاح الاستحمام (30 - 35 جنيه) ده بالإضافة لمجموعة الصابون (25 : 45 جنيه) بروائح مختلفة اللافندر، زيت الزيتون والورد. ده غير أنك ممكن تشتري من هناك منسوجات قطنية بأسعار مناسبة؛ الفوط أصغر حجم بـ 10 جنيه والوسط بـ 40 جنيه والبشكير بـ 140 جنيه.

ومع كل ده، هتلاقي برضه عندهم مجموعة من المنتجات الطبيعية اللي ممكن تستخدمها في الأكل زي زيت جوز الهند (35 جنيه)، السكر البني (15 جنيه) وماء الورد وروح النعناع (16 جنيه).

عامة إحنا كاتبين عن نفرتاري مقال بص عليه من هنا. ولو عايز تروح بنفسك، نفرتاري له فروع في الزمالك، المعادي والمهندسبن.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
دينا مختار
حرر بواسطة:
دينا مختار
تاريخ النشر:
11/04/2016
منسق تحريري.. الشخص اللى تلاقيه قاعد لوحده على القهوة الصبح بدري بـ يتفرج على الخلق، سيب لها قلم وورقة فاضية هـ ترجع تلاقيها إما كاتبة قصة قصيرة أو راسمة باب شعبي قديم، تطلعها من وسط مليون بلبسها المنقوش فى منقوش.