8 مواقع مصرية لعشاق التسوق أونلاين - تسوق Feature - كايرو 360
 







8 مواقع مصرية لعشاق التسوق أونلاين
8 مواقع مصرية لعشاق التسوق أونلاين
اصدرت في: 12/04/2016

ظهر في الفترة الأخيرة توجه عدد كبير من الناس لفكرة التسوق الإلكتروني.. أصل بصراحة مين مايحبش يشتري كل طلباته بضغطة زرار واحد، مش كده ولا إيه؟ طبعًا مصر من البلاد اللي ظهرت فيها موضة التسوق الإلكتروني، وصحيح ناس كثيرة بتفضل تشتري من الماركات والمواقع العالمية المشهورة، لكن شوفنا انتشار أسماء محلية قدرت تحقق نجاح بين المصريين والفضل يرجع لظهور مستثمرين ومصممين جداد على الساحة.

إحنا بنفتخر إننا بنشجع كل المنتجات المصرية الكويسة، وطبعًا كلنا عايزين نوفر رسوم الشحن وتغيير العملة، وعلشان كده جمعنا لكم قائمة بأهم المواقع المصرية 100% واللي بتقدم منتجات مصنعة يدوية أو مستوردة أو أصلية، والأهم أنهم بيوصلوها لباب بيتك.

Bespoke Egypt

يعتبرBespoke Egypt واحد من أهم المواقع لو عايز تتابع كل الجديد في عالم الموضة، وبيقدم مجموعة مختارة من الملابس والفساتين وملابس البحر والإكسسوارات. هتلاقي في الموقع تشكيلة هايلة من الملابس الرياضة، مع مجموعة من الأحذية بمقاسات مختلفة، ده غير أن خدمة التوصيل شغالة على مدار 24 ساعة. تابع موقع Bespoke وشوف كل جديد.

 Deal Gamed

موقع من المواقع المصرية اللي بتعرض كل حاجة ممكن تحتاجها من ملابس واكسسوارات وأحذية لمصممين مشهورين وشنط وساعات وكمان مستلزمات الأطفال والرضع. الموقع كمان عامل عروض جامدة على الإلكترونيات ومستحضرات التجميل زي منتجات العناية بالشعر والجسم والماكياج. تابع Deal Gamed واعرف أخر عروضهم.

Deeda

ماركة مصرية أسسها مصمم شنط اليد ماجد باستاوروس سنة 1995، وموقع Deeda متخصص في بيع كل أنواع الشنط المميزة من ناحية التصميم والأسعار المعقولة من شنط الظهر لشنط كروس وclutches وغيرهم. تابع موقع Deeda من هنا.

 El Sastre

كلمة غريبة شوية مش كده؟ El Sastre هي كلمة أسبانية معناها الخياطة، والموقع الإلكتروني المتخصص في عالم الأزياء بيقدم قمصان تفصيل فخمة رجالي وحريمي، بيستخدموا في تصنيعها أجود الخامات زي القطن والقطن الحريري والنسيج المضلع وغيرهم. كل اللي محتاج تعمله إنك تسجّل بياناتك، وتحدد معاد وEl Sastre هيبعتوا لك مندوب بعينات القماش ويحدد المقاس المطلوب.El Sastre كمان بيقدم شورتات كتان مصنعة يدويًا ومايوهات رجالي وقبعات.

 Mystic Evenings

هي ماركة محلية شهيرة متخصصة في كل أنواع الفساتين. ويعتبر موقع Mystic Evenings بتشكيلته الكبيرة من الفساتين المناسبة لكل الأذواق والاستايلات المختلفة المكان المثالي للتسوق اللي بيوفر عليكي عذاب التدوير في محلات القاهرة وضواحيها عشان تلاقي فستان مناسب. من الأخر، لو عندك حفلة تخرج أو فرح أو خطوبة أو سهرة أو أي مناسبة، Mystic Evenings هو المكان المناسب. Mystic Evenings كمان له ثلاثة فروع في سيتي ستارز وشارع الكوربة وكايرو فيستيفال سيتي. تقدر تتابع موقعهم الرسمي من هنا.

Okhtein

هدفهم الأساسي هو إعادة الحياة للحِرَف المصرية الجميلة في مصر والعالم كله، الأختان المصممتان المصريتان آية وموناز عبد الرؤوف قدموا ماركة اكسسوارات أونلاين وهي (أختين) بتصميمات شيك من القش والجلد والتطريز. أختين سنة 2013 قدموا أول خطوطهم من الشنط واختاروا تصميمات أنيقة من شنط الجلد و clutchesوشنط الظهر وشنط السواريه. شنط اليد من أختين متوفرة في Pop-Up Shop في داون تاون قطاميه وعلى الموقع الإلكتروني Coterique وفي عدد من المحلات في جدة ولوس أنجلوس. تابع مجموعة أختين المميزة من هنا.

 Style-Treasure

الصحفية المتخصصة في عالم الموضة منة عفيفي أسستStyle Treasure سنة 2009 بالاشتراك مع المصممة المتميزة شريفة محمود، وهو من أهم المواقع اللي بتعرض أعمال لمصممين مصريين وكمان مناسب للناس اللي محتاجة تشتري هدايا. يعتبرStyle Treasure بوتيك إلكتروني بيغطي كل حاجة من الاكسسوارات المصنعة يدويًا للمجوهرات للملابس والعبايات وكمان عندهم شمع ومرايل ومغناطيس للثلاجة. خدمة التوصيل متوفرة لأي مكان في مصر. ممكن تتابع Style Treasure من هنا.

Vatrinaz

موقع مصري مشهور بيقدم تشكلية ضخمة من المنتجات وملابس البيت وكمان منتجات للعناية بالجسم وأحذية وملابس واكسسوارات وكمان منتجات مصنعة يدويًا وتشكيلة من الساعات والشنط لمصممين معروفين. شوف صفحة Vatrinaz من هنا.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
هند صلاح الدين
حرر بواسطة:
هند صلاح الدين
تاريخ النشر:
12/04/2016
كاتبة