وادي الريان: محمية طبيعية على أرض الفيوم - معالم وسياحة Feature - كايرو 360
 







وادي الريان: محمية طبيعية على أرض الفيوم
وادي الريان: محمية طبيعية على أرض الفيوم
اصدرت في: 09/06/2011

على مسافة ساعتين بالعربية من القاهرة هـ توصل منطقة وادي الريان اللي بقت واحدة من أشهر المحميات الطبيعية في مصر. وإسمها كدة نسبة للملك «ريان بن الوليد» اللي عاش لفترة في المنطقة دي مع جيشه. المحمية تابعة لمحافظة الفيوم رغم أنها بعيدة عن الفيوم بحوالي 40 كيلومتر.

الوادي متقسم لسبع أجزاء وهي : البحيرات العليا، البحيرة السفلى، منطقة الشلالات،عيون الريان ، جبل المدوَّرة، جبل الريان ووادي الحيتان وكل المناطق دي مناظرها الطبيعية مش عادية أبداً وبالذات التكوينات الصخرية والواحات والجبال وشلالات المية.

هـ تشوف الحياة البرية المصرية في الوادي متمثلة في الحيوانات زي الغزال الأبيض والغزال المصري وثعلب الرمال وثعلب الفنك وكمان في فصائل نادرة من الطيور المقيمة والطيور المهاجرة وانواع مختلفة من النسور والصقور.

المنطقة بـ تجذب علماء الآثار بشكل كبير لأنها مليانة بالحفريات البحرية خصوصاً في منطقة «وادي الحيتان» اللي لقوا فيها هياكل متحجرة لحيتان عاشت في المنطقة في فترة ما قبل التاريخ وأُعتبرت من أقدم حفريات للحيتان الموجودة على الأرض وده اللي خلّى الـ«يونسكو» يصنف الوادي كمنطقة تراث عالمي ( World Heritage Site ).

الشلالات على بُعد 20 كم من بوابة المحمية، وهي على الناحية الشِمال من الطريق، اللي حوالي 2 كم منه مش ممهد. الشلالات شكلها مبهرة بس للأسف عدم إهتمام المسؤولين بيها مخلّي شكلها متهالك لحد كبير ومش في أحسن حالة تشوفها فيها السياح، بـ ننصحك ما تضيعش وقت كتير عند الشلالات وتستمتع بباقي المحمية أحسن.

بعد الشلالات بـ 5 كم بس، جبل مدوّرة، تحفة جمالية طبيعية. لما تتسلق الجبل– وده مش صعب قوي على فكرة – وتعلى عن الأرض شوية هـ تشوف منظر خيالي من فوق ده غير إن من فوق هـ تقدر تشوف أسراب الطيور وسهل إنك تلمح نسور أو صقور من قريب.

المغامرة هـ تزيد لما تدخل يمين مسافة 30 كم كمان في طريق ترابي مش مرصوف بعد جبل مدوّرة عشان توصل لوادي الحيتان. الوصول لوادي الحيتان تجربة شيقة في حد ذاتها بعيد عن الحفريات. وبعد 30 كم من الدألجة في العربية على الطريق، هـ تلاقي مكان إستقبال الزوار مبني على الطراز البدوي. وانت بـ تتمشى في وادي الحيتان هـ تحس انك داخل في أحضان أقدم بقايا التاريخ حرفياً، كل الممرات هـ تلاقي فيها آثار لحفريات وكتل صخرية من البحر من عصور ما قبل التاريخ، للأسف كتير من الهياكل متحجرة بشكل جزئي بس هـ تفضل قادر تتخيل الحجم الكلي المهول للحيوان العملاق ده.

الطريق الترابي رغم انه معمول للعربيات العادية بس بـ ننصحك ماتروحش إلا بعربية 4 x 4 بس لو إضطريت تروح بعربيتك العادية وعايز تحافظ عليها حتة واحدة، تقدر تروح بيها الشلالات وأي مكان تاني وبعد كده تركنها وتسأل فين موقف البيجو وهناك خد توصيلة لغاية وادي الحيتان، سواقين البيجو هناك بـ يسوقوا أحسن من أحسن سواق محترف على الطرق الوعرة « Off-Road ».

المتعة مش هـ تخلص في الوادي، ممكن تعمل باربكيو أو تتسلق الجبال أو تتمشى لمسافات طويلة، ولو بـ تحب التصوير هـ يبقى ده أسعد يوم في حياتك.

خد معاك مية ساقعة كفاية ونضارة شمس وكاب تحطه على راسك، الجو حر جدا هناك، ومش هـ نقول تاني أن عربية 4 x 4 هـ تخلّي رحلتك أسهل كتير وهـ تقلل من الوقت اللي هـ تمشيه في في الشمس.

وادي الريان فاتح كل يوم من الساعة 8:30 الصبح لحد الساعة 5:30 بعد العصر والدخول بتذكرة بـ 2 جنيه للفرد للمصريين، 5 جنيه لدخول العربيات و3 دولار للأجانب يعني حوالي 16 جنيه.

ولازم نقول للي ناوي يروح من القراء أن الطريق للوادي نفسه مش ممهد قوي وبصعوبة هـ تلاقي محطة بنزين لحد ما توصل لمدخل محافظة الفيوم. والـ 40 كم المسافة بين الفيوم ووادي الريان فيهم أجزاء الطريق فيها رايح جاي والإضاءة ضعيفة عشان لو حد هـ يسوق بالليل يكون مركز ويخّلي باله، بس مكان روعة زي ده أكيد يستحق الزيارة والمغامرة.
مزيد من الصور
  • وادي الريان: محمية طبيعية على أرض الفيوم
  • وادي الريان: محمية طبيعية على أرض الفيوم
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
يوسف هاني
حرر بواسطة:
يوسف هاني
تاريخ النشر:
09/06/2011