تأجير يخوت في العين السخنة: متعة الإبحار - معالم وسياحة Feature - كايرو 360
 







تأجير يخوت في العين السخنة: متعة الإبحار
تأجير يخوت في العين السخنة: متعة الإبحار
اصدرت في: 05/05/2011

في وقت معين من السنة وبالذات آخر فصل الشتاء مش بـ يكون فيه حاجات كتير تـ تعمل أو أماكن تتراح وبـ تكتر الزيارات العائلية عشان مفيش حاجة تانية تـ تعمل. لو عايز تغير الروتين ده هـ نقولك على فكرة جديدة، سفرية على البحر الأحمر وبالتحديد في العين السخنة، وتعمل مغامرة بحرية بـ تأجير يخت وتدخل بيه جوة البحر طول اليوم، وتهرب من زحمة الدنيا وملل الوقت ده من السنة. إيجار اليخوت شغال طول السنة بس الطلب بـ يزيد عليه في الوقت اللي بين الشتاء وأول الربيع، حضَّر كريم حماية البشرة بتاعك واستعد لرحلة فريدة من نوعها.

الأسعار بـ تبتدي من 800 لـ2000 جنيه للإيجار في اليوم، ممكن تستمتع بأقل تكلفة ممكنة والأسعار دي بـ تختلف حسب حجم اليخت وبـ ياخد كام فرد.

اليخت بـ يتحرك من مرسى قدام «بورتو سخنة» مباشرة، اليخت اللي بـ ياخد حد أقصى 10 أفراد إيجاره 800 جنيه ليوم كامل، تتحرك بيه في المية زي ما انت عايز وتستمتع بالشمس وتتنفس هوا نقي، أو ممكن تقضي اليوم في حمام شمس طويل ومركز، ولو جالك قلب ممكن تنزل تعوم في المية المتلجة.

اليخوت ماتعتبرش سريعة خالص، وماتتوقعش أنه يكون شبه اليخوت اللي بـ تطلع في الكليبات، بس الأكيد انه هـ يكون واسع ونضيف الى حد كبير، ماعدا الحمامات اللي مش هـ تعجب الركاب قوي خصوصاً السيدات، غير كده كل حاجة كويسة فاسترخي واستمتع بوقتك على اليخت العجوز شوية.

كل اليخوت هناك ليها سطحين أمامي وخلفي وكابينة صغيرة في الوسط ليها دور عالي اللي بـ يقعد فيه الكابتن اللي بـ يسوق اليخت، ماشفناش أي دولفين بس فيه ناس بـ تبقى محظوظة وبـ تلمحهم وهم بـ يتنططوا في المية حوالين المركب.

اليخت تحت أمرك من 6 الصبح لـ6 المغرب، وقت معمول مخصوص عشان تلحق منظر الشروق والغروب الهايل، بس موضوع الوقت ده يرجعلك فما تقلقش انت مش لازم تروح الفجر كده، إحنا كمان ماقدرناش نروح الفجر٬ بس لو عايز تعمل ده ممكن تروح من بالليل وتقضي الليلة في أي فندق أو قرية قريبة زي «ستيلا دي ماري» لو ماعندكش شقة أو شاليه هناك.

المية والهوا طبعاً هـ يجوعوك، ممكن تاكل السمك الطازة بـ يتباع مشوي ومعاه رز وخضار بـ يحضرهم الكابتن بتاع المركب٬ والسمك ده ممكن انت تـ تصطاده أو هـ طاقم اليخت اللي معاك، لو مش حابب تعمل كده ممكن تجيب معاك أكلات خفيفة. ولو بـ تحب الصيد ممكن تستخدم السنارات اللي في اليخت، بس لو انت صياد محترف أكيد هـ تحب تجيب عدة الصيد الخاصة بيك، الطاقم اللي شغال في اليخت هـ يحمسك أنك تصطاد لأن طول الوقت هما بـ يصطادوا بس خللي بالك من الدوار اللي ممكن يجيلك وأنت واقف على ضهر اليخت.

ممكن تشغل مزيكا أو تلعب مزيكا أو تلعب كوتشينة وتاكل وتشرب وتصور فوتوغرافية المناظر البديعة حواليك، أو تنزِّل الهلب وتنزل تغطس شوية. في سماعات وستريو بس ماعتقدتش بـ يتوصل عليه iPod ، إحنا جبنا السماعات بتاعتنا وحطناها على سطح اليخت، لو عايز تجيب الأغاني اللي بـ تحبها على سي دي أو فلاش يكون أحسن.

رحلة رائعة ليوم واحد برة القاهرة وبأقل التكاليف، إسترخاء وهوا نضيف وشمس ووقت ظريف مع أصحابك على شواطئ العين السخنة، وليك الحرية انك توقف المركب في أي وقت عشان تستمتع بالجو أو حتى تغطسلك غطسين.
إزاي تعمل الرحلة: عشان تحجز أو تستعلم عن أي حاجة إتصل بـ 0122440198 وحتى لو حجزت وكله تمام، ننصحك تأكد الحجز قبل ما تسافر بيوم.
مزيد من الصور
  • تأجير يخوت في العين السخنة: متعة الإبحار
  • تأجير يخوت في العين السخنة: متعة الإبحار
  • تأجير يخوت في العين السخنة: متعة الإبحار
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
جنيفر بروكس
حرر بواسطة:
جنيفر بروكس
تاريخ النشر:
05/05/2011
Can provide a balanced selection of outdoor and venue based articles. Personal friend of Clarissa Pharr.