شاطىء چاز ألماظة: فندق شيك في الساحل الشمالي - معالم وسياحة Feature - كايرو 360
 







شاطىء چاز ألماظة: فندق شيك في الساحل الشمالي
شاطىء چاز ألماظة: فندق شيك في الساحل الشمالي
اصدرت في: 14/07/2011

الساحل الشمالي مليان منتجعات وفنادق بـ تقدم إقامة غالية في جو دوشة وزحمة زي پورتو مارينا. أمّا شاطىء چاز ألماظة بـ يقدم استجمام بعيد عن الدوشة دي.

في الكيلو 38 من شرق مرسى مطروح بـ يبعد المنتجع 3 ساعات سواقة من الإسكندرية، وحوالي 6 ساعات من القاهرة لو من طريق وادي النطرون. أول ما توصلوا هناك هـ تبقوا أبعد عن أي مكان بساعات، ما عدا مرسى مطروح؛ يعني ما تعتبروش أن ده مكان قريب للإقامة لو ناويين تقضوها في مارينا أو مراسي.

شاطىء چاز ألماظة بـ يقدم تجربة شاملة ومُريحة بـ 6 حمامات سباحة، 3 مطاعم، كذا بار وصالة چيم، وكمان نادي للأطفال. أحسن حاجة في المنتجع هو تصميمه الداخلي: الاستقبال تصميمه راقي والكنب بلون الموكا، وفيه شمعدانات كبيرة من الزجاج، فـ من ناحية الرُقي والشياكة اتأكد أنك بـ تدفع في حاجة تستاهل.

ومن الاستقبال تقدر تعرف بقية المنتجع عامل إزاي: غرفة مزدوجة مفروشاتها من الخشب الغامق، ومخدات باللون الأحمر، وحوائط باللون الكريمي، ومراتب مُريحة، ودُش قدم، وسيشوار، وحوض سيراميكي كبير بـ يكمل الحمام. كل غرفة لها بلكونة، رغم أن تعريف الفندق لرؤية البحر من الغرف مشكوك فيه: ممكن تقدر تشوف البحر من ركن في البلكونة؛ الفندق على شكل حرف U علشان الغرف تطل على الحدائق وحمامات السباحة.

أوحش حاجة في الفندق هي خدمة الإنترنت اللاسلكي (Wi-Fi) اللي ممكن يبقى متاح في غرفتك لكن بتكلفة عالية جدًا: 176 جنيه ليوم كامل وكلمة السر بتتحدد لكمبيوتر واحد بس؛ يعني لو 2 في رحلة عمل وبـ يشاركوا في نفس الغرفة مش هـ يعجبهم العرض ده.

المطعم الأساسي للفندق بـ يقدم بوفيه جميل للأفطار، والغذاء والعشاء مع العيش الطازج، الخضار بالبخار والفواكه الطازجة. وقت ما رُحنا، الفندق كان مليان سائحين إيطاليين، والشيف كان بـ يقدم أطباق لوجبات إيطالية جدًا من مطبخهم العالمي، والمقبلات، والسلاطات، والكثير من المكرونة. بالنسبة لوجبات الـ à-la-carte مطعم مرجانة بـ يقدم تجربة غذاء أهدى شوية مطلة على البحر، رغم أنك ممكن تبقى مشتت الانتباه شوية من دوشة الفريق الإيطالي على البحر جنبك.

الشاطىء نفسه جميل بأمتار من الرمل الأبيض وشمسيات كبيرة وشيزلونجات من القش. لو عايز شوية فخامة، الفندق بـ يقدم أكواخ كبيرة بستائر بيضاء ومخدات مٌريحة على الشاطىء لكن بسعر عالي قوي (250 جنيه في اليوم)، مياه البحر نفسها لونها تركواز صافي؛ زي ما المفروض تبقى مياه البحر الأبيض المتوسط. رغم أن الشاطىء ساعات ممكن يبقى تراب شوية بسبب موقعه على خليج مفتوح، لكن تجربة العوم فيه ممتعة جدًا.

لو ده مش مناسبك ممكن تختار من حمامين سباحة كبار جدًا، كل واحد منهم مقسم لـ 3 أجزاء صغيرة كمان؛ علشان تقدر تعوم في المنطقة الغويطة أو تطفو في حمام سباحة الأطفال أو علشان تختار بقعة هادئة بعيد عن صراخ الأطفال.

هناك مُتاح ملعبين تنس منورين، ومنطقة تنس طاولة، وشبكة لكرة الڤولي على الشاطىء وترابيزة baby-foot، وكمان نادي صحي فيه صالة چيم، وسونا، وچاكوزي، وغرفة بخار. الدخول لمرافق النادي الصحي بـ يكلف 50 جنيه للفرد، واستخدام ملعب التنس بـ يكلف 50 جنيه للساعة. ألعاب الماء زي مراكب الكياك (التجديف) والبدالات متوفرين على الشاطىء بـ 75 جنيه في الساعة.

كل ليلة فريق الرسوم المتحركة بـ يخلّي الناس ترقص بعد العشاء لو انت عايز كده. لو مش عايز، تقدر تختار دائمًا من بار الميزانين أو المشربية لمشروب هادىء أو محادثة. فيه كمان أنشطة للأطفال يعني الأباء يقدروا يختفوا ساعتين ويسيبوا أولادهم بـ يلعبوا في الأنشطة الجماعية للأطفال مع وجود رقابة.

ممكن ناس كثير تعتبر الموقع بعيد قوي، لكن «منتجع شاطىء چاز ألماظة» بـ يقدم راحة تخلّي أجازتك تستاهل. هو منتجع يصلح جدًا للعائلات، وكبير كفاية أنه يديلك مساحة وخصوصية. ورغم أنك بـ تدفع أسعار عالية (50 جنيه لصالة الچيم و176 جنيه للإنترنت أسعار سخيفة لمّا تكون أصلاً دافع 1400 جنيه للغرفة)، لكن جودة ونظافة الفندق بـ تخلّيك تنسى الفلوس المدفوعة.

لموسم صيف 2011، أسعار الغرفة المزدوجة 1400 جنيه للغرفة شاملة الإفطار والإقامة، ولأواخر الصيف من أول 6 سبتمبر 2011 الأسعار هـ تنزل لـ 900 جنيه للغرفة شاملة الإفطار والإقامة. لمزيد من المعلومات تقدروا تكلموا «چاز ألماظة» على 0046436000، أو تراسلوهم على الإيميل ده: almaza@jaz.travel ، أو تزوروا موقعهم.

مزيد من الصور
  • شاطىء چاز ألماظة: فندق شيك في الساحل الشمالي
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
أحمد عبد الرازق
حرر بواسطة:
أحمد عبد الرازق
تاريخ النشر:
14/07/2011
-