جرين بيتش: كامب ممكن تقضي فيه أجمل أيامك فى نويبع وبأقل التكاليف - معالم وسياحة Feature - كايرو 360
 







جرين بيتش: كامب ممكن تقضي فيه أجمل أيامك فى نويبع وبأقل التكاليف
جرين بيتش: كامب ممكن تقضي فيه أجمل أيامك فى نويبع وبأقل التكاليف
اصدرت في: 14/12/2014

البعد عن الزحمة، الاسترخاء، الهدوء، الاستمتاع بالطبيعة واكتشافها، كل دي حاجات متوفرة في أماكن كثيرة، لكن عمرها ما هـ تقدمها لك زي لما يبقى البحر أمامك والجبل وراءك وعندك الكوخ أو الـ Hut الخاص بك، اللي لو نزلت أيدك منه هـ تلمس مياه البحر، وبأقل التكاليف، "نويبع" اللي كثير ظالمينها ومفضلين عليها أماكن بره مصر أو داخلها، قدرت تحقق المعادلة الصعبة بين الاستمتاع والاسترخاء.

الحقيقة أننا قررنا نعتمد على نفسنا قبل ما نسافر وندور بنفسنا على أماكن الفنادق والكامبات ولقينا أكثر من موقع بـ يعرضوا أسعار مدعمة بالصور وعجبنا كامب معين أسعاره مناسبة، وشكله لطيف. والحقيقة برضه أننا كان عندنا وجهة نظر خفية في اختيارنا، لأننا كنا عاوزين نعيش روح الطبيعة ونحيى حياة المغامر فكنا بـ ندور على أكواخ على البحر، ولأن في الوقت ده كان فيه احتمال سقوط أمطار، اختارنا مكان فيه بيوت مقفولة بجانب العشش اللي على البحر كخطة بديلة لو الدنيا بردت زيادة أو مطرت، يبقى فيه ملجأ لنا.

المهم اختارنا كامب "جرين بيتش - Green Beach"، بعيد عن محطة الأتوبيس بحوالي 5 كيلو، وحضرتك بـ تكلمهم بعد ما تحجز تقولهم على ميعاد وصولك لو أنت جاي بالسوبر جيت، هم بـ ييجوا يأخدوك من المحطة. الحقيقة أننا قضينا هناك أجمل 5 أيام في حياتنا مش بس علشان المغامرات اللي عشناها هناك لأ، الضيافة بتاعة عم نصر مدير الكامب كانت وهمية.

مبدأيا بالنسبة للأسعار إحنا لما رحنا كان في شهر أكتوبر، سعر الكوخ للفرد كان 60 جنيه بالإفطار، وفيه أكواخ بـ تحتمل ثلاثة أفراد وأكواخ بـ تحتمل فردين. أما دلوقت نحب نقول لكم، أن الفرد في الكوخ بـ 30 جنيه بالإفطار بس. لو عاوزين البيت اللي بحمام خاص الليلة بـ 120 جنيه. طبعًا يا جماعة أي حد بـ يسافر نويبع كثير عارف أن الحمامات هناك مشتركة، علشان بس ما يجيش لكم صدمة حضارية ولا حاجة.

أول يوم وصلنا وجاءت لنا عربية مخصوص تأخدنا من محطة السوبر جيت، والحقيقة كمان أن أي مشوار حبينا نروحه سواء لقرية مجاورة أو للسوق أو الصيدلية، العربية كانت بـ تودينا وتجيبنا على طول. استقبلنا عم نصر وعمل لنا أجمل شاي بالنعناع ممكن تشربه في حياتك، مش زي بتاعنا لأ طبعًا لأنهم بـ يزودوا عليه أعشاب خاصة بهم وبطبيعة المكان، كمان الشاي بالمرمرية عندهم وهمي.

المكان لوحده قادر أنه يخليك قاعد في الكوخ بتاعك ومش عاوز أي حاجة من الدنيا غير أنك تتفرج على البحر (اللي بالمناسبة ما بينه وبين الكوخ بتاعك أقل من خطوتين وبـ يبقى فيه مد وجزر طوال اليوم على حسب الهواء) والشمس وجمال وسحر القمر بالليل خاصة لو نشنت في نصف الشهر الهجري والقمر مكتمل. المكان فعلًا بـ ييجي وقت بـ تبقى كأنك راكب سفينة في البحر مش قاعد جوه بيتك. الكوخ بـ يبقى مكون من سرير ومرتبة لفردين وسرير كبير لثلاثة أفراد، وبـ يبقى فيه زي قاعدة بدوي فيها ترابيزة وكراسي بره الكوخ.

بس كنا لازم برضه نستمتع بجمال الطبيعة اللي حولنا والأنشطة المتاحة هناك، أكثر حاجة كان نفسنا نعملها، الغطس Snorkeling واللي بـ 10 جنيه بس للفرد عند عم نصر، ولو عددكم كبير ممكن تتفاوضوا معاه في السعر، وطبعًا تسلق الجبال والليلة البدوية وركوب العربيات الـ 4×4 وكلها بأسعار مناسبة وبرضه بـ تتفاوضوا على السعر معاه.

إحنا جربنا تسلق الجبال والعشاء البدوي بـ 120 جنيه للفرد، والحقيقة أنها كانت تجربة مثالية، لأنك بمجرد ما بـ تطلع تتفرج على الغروب فوق الجبل، بـ تتخطف من نفسك حقيقي، وتفكر في جمال وإبداع صانع هذا الكون بس. لما نزلنا بقى كان مستنينا أجمل أكل بدوي في التاريخ مستعد للأسماء.. أكلنا "فراشيخ وطبانة" يعنى إيه بقى الكلام ده.

الفراشيح دي حاجة عاملة زي العيش اللبناني عندنا أو الرقاق، والحقيقة أنها أطعم وألذ بكثير، أما الطبانة فهى عبارة عن عيش تم خبزه أمامنا في الرمل والفحم بـ يتسوي لما يحطوا الفحم السخن كله عليه ويسيبوا العجينة المكونة من دقيق وملح بس تستوي. وبـ تخرج سخنة ومقرمشة ولذيذة ومافيهاش طعم تراب ما تخافوش بل بالعكس مليانة بالمعادن الطبيعية اللي في الرمل، فعلًا كانت منعشة ولذيذة، كمان عملوا لنا صينية بطاطس بالفراخ، كانت جاهزة وسووها على الفحم بس، وسلاطة طحينة بالطماطم وهمية برضه. وطبعًا اليوم ده القمر كان مكتمل فـ تخيلوا معايا بقى أنكم قاعدين على الشموع والقمر هو الضوء الوحيد لكم، مع موسيقى بدوية وقصص بدوية، كأن الواحد جاء المكان ده علشان يشوف إبداع ربنا في خلق الجبال والطبيعة بس.

بعد الكام يوم اللي قضيناهم هناك ما كناش عاوزين نرجع خالص، مين يبقى عايش ما بين البحر اللي بـ تتفرج على شروق الشمس منه والجبال والسماء الصافية، ويرجع لدوشة القاهرة وتعب أعصابها.

المهم نويبع من أفضل الأماكن اللي تساعدك ترخي أعصابك بالذات كامب Green Beach وضيافة عم نصر وتستمتع كمان بكل الأنشطة الممتعة بأقل سعر ممكن تتخيله.

مزيد من الصور
  • جرين بيتش: كامب ممكن تقضي فيه أجمل أيامك فى نويبع وبأقل التكاليف
  • جرين بيتش: كامب ممكن تقضي فيه أجمل أيامك فى نويبع وبأقل التكاليف
  • جرين بيتش: كامب ممكن تقضي فيه أجمل أيامك فى نويبع وبأقل التكاليف
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
نجلاء أشرف
حرر بواسطة:
نجلاء أشرف
تاريخ النشر:
14/12/2014
محرر مساعد بالموقع العربي، حالمة جدًا وعايشة في كوكب ثاني وبـ تحب تكتب عن كل حاجة بـ تحصل لها، دائمًا بـ تضحك حتى في أصعب المواقف وبـ تحب البلالين والتيوليب والصحبة الحلوة.