وايلد جوانابانا: رؤية مختلفة للسياحة الداخلية برحلة دراجات في الزعفرانة - معالم وسياحة Feature - كايرو 360
 







وايلد جوانابانا: رؤية مختلفة للسياحة الداخلية برحلة دراجات في الزعفرانة
وايلد جوانابانا: رؤية مختلفة للسياحة الداخلية برحلة دراجات في الزعفرانة
اصدرت في: 14/10/2015

ما نقدرش ننكر أن السياحة المصرية بـ تمر بأشد أزماتها؛ وخصوصًا لما يبقى أكبر هموم المسؤولين هو أنهم يصرفوا ملايين على الدعاية الإعلانية من غير ما يحاولوا حل المشاكل الأساسية اللي بسببها مكانة مصر السياحية بـ تقل، ولكن الشيء الإيجابي الوحيد وسط كم السلبيات دي أن فيه مؤسسات ومشروعات مستقلة مهتمة بإنقاذ السياحة.

مشروع عمر سمرة "وايلد جوانابانا" من ضمن المشروعات اللي بـ تحاول تحافظ على الحركة السياحية في مصر، بعد ما قدر أنه يرفع علم مصر على قمم أعلى جبال في العالم في مغامرة فريدة من نوعها، عمر سمرة قرر بمشروعه الجديد أنه يساعد محبي السفر في مصر أنهم يعيشوا مغامرتهم الخاصة بهم.

بنفس الحماسة اللي شجعتهم أنهم يأخذوا ناس كثير من زحمة القاهرة لأماكن مختلفة حول العالم، عمر سمرة وفريق عمل "وايلد جوانابانا" قرروا أنهم يتجهوا للسياحة الصديقة للبيئة في أقل الأماكن شهرة في مصر –لكن أجملها- علشان يكسروا القاعدة المحفوظة أن مصر مجرد مجموعة من المزارات التاريخية وخلاص على كده.

بالرغم من أن "وايلد جوانابانا" ما كانوش أول ناس يلفتوا نظرنا كمصريين لأهمية السياحة الصديقة للبيئة، أو للأماكن الطبيعية الجميلة الموجودة في مصر، إلا أنهم في عملية بحث مستمر عن الأماكن البكر اللي لسه العين ما تعودتش عليها.

مجرد وجود اسم عمر سمرة يطمئن أي حد بـ يحب المغامرات والسياحة المختلفة، ولكن لما تعرف أن "وايلد جوانابانا" في رحلتها القادمة متعاونة مع جلال ذكري شاتيلا -الشاب اللي وهو عنده 21 سنة كان لف مصر كلها على دراجة- الموضوع أكيد هـ يكون أحلى وأحلى.

أول مغامرة هـ تكون في الزعفرانة، واللي بـ تتميز بوديانها العظيمة ومناظرها الطبيعية اللي أكيد هـ تخلي مجرد جولة بالدراجة تجربة مختلفة. الرحلة هـ تبدأ يوم 15 أكتوبر، و"وايلد جوانابانا" هـ توفر للمغامرين كل اللي ممكن يحتاجوه في الرحلة من معدات. ده الوقت أن الواحد يهرب من القاهرة.

لمعلومات أكثر عن الرحلة، بص هنا.

صور: وايلد جوانابانا

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
هيثم عوض
حرر بواسطة:
هيثم عوض
تاريخ النشر:
14/10/2015
رئيس تحرير الموقع الإنجليزي، دائمًا مالوش نِفس للكتابة، وذوقه عجيب في المزيكا اللي بـ يسمعها، لو أنت حظك كويس هـ تلاقيه مبتسم وعنده لكنة بريطانية مصطنعة، ومدمن جيلي كولا.