Saturday Night Live بالعربي: رحلة وراء الكواليس مع واحد من أشهر البرامج الكوميدية في الشرق الأوسط - تليفزيون Feature - كايرو 360
 







Saturday Night Live بالعربي: رحلة وراء الكواليس مع واحد من أشهر البرامج الكوميدية في الشرق الأوسط
Saturday Night Live بالعربي: رحلة وراء الكواليس مع واحد من أشهر البرامج الكوميدية في الشرق الأوسط
اصدرت في: 27/05/2016

كثير من المصريين بيشوفوا يوم الجمعة على أنه يوم للأنتخة والراحة، لكن فريق عمل Saturday Night Live لهم رأي مختلف وبيقضوا يوم الجمعة كله في تنفيذ اسكتشات البرنامج في ستوديو مصر اللي اتجدد حديثًا.

قابلنا فريق Saturday Night Live بالعربي في وقت البروفات وهم بيجهزوا اللمسات النهائية مع المخرجين وكتاب البرنامج، وكمان وقتها كان معاهم ضيفة شرف الحلقة الممثلة آيتن عامر وفريق افتكاسات الغنائي.

الأجواء هناك بصراحة مريحة وممتعة – والمنتجين كمان كانوا مرحبين بوجودنا وطلبوا مننا نتفرج على البروفات، وكمان قدموا لنا شوكولاتة – وقدرنا نقابل فريق العمل في وقت الاستراحة القصيرة.

برنامج Saturday Night Live بالعربي عبارة عن اسكتشات كوميدية مستوحاة من مشاكلنا وأحداثنا اليومية، وفريق البرنامج بيشوفوا إن مصر تربة خصبة مليانة مواقف وطرائف.

بدأ شادي ألفونس - وهو واحد من نجوم البرنامج- الكلام وقال "إحنا بنجتمع في أول الأسبوع علشان نطلع اسكتشات كوميدية لكل حلقة. في اسكتشات منهم بتكون معمولة مخصوص لضيوف الحلقة، وعلشان كده لازم يحضروا معانا ويقولوا رأيهم".

صعوبة الموضوع بتظهر في ضبط كل اسكتش علشان يطلع بالشكل المناسب. التصوير بيحتاج ساعات شغل طويلة وأحيانًا الشغل بيفضل مكمل طول الليل، وبعد كده كتاب البرنامج وفريق التمثيل بيستقروا على المشاهد النهائية علشان يراجعوها قبل ما ينفذوا الاسكتشات على المسرح قصاد الجمهور.

الموضوع فعلًا كبير، يعني حتى بعد الممثلين ما يحفظوا أدوارهم وكل حاجة تكون جاهزة للتصوير، ممكن الاسكتش يتغير تمامًا. عندك مثلًا حازم إيهاب اللي رجع بيته علشان يذاكر اسكتش معين، واليوم التالي اكتشف أن المشهد تغير تمامًا.

بعدها تكلمنا مع خالد منصور، نجم برنامج البرنامج السابق اللي قال "إحنا بنشوف البروفات على إنها مرحلة اختبار للمنتج قبل ما ينزل السوق. البروفات بتساعدنا على اكتشاف نقط الضعف في السيناريو ومنها بنقدر نعدل في الاسكتش.

البروفات بتتعمل ثلاث مرات في الأسبوع، والبروفة الأخيرة بتكون يوم السبت بملابس المشهد الفعلية، وهو يوم عرض الحلقة.

صحيح Saturday Night Live بالعربي وصل أصلًا لمجتمع له باع كبير في الكوميديا، لكن ما فيش شك أنه برنامج فريد من نوعه في مصر والشرق الأوسط. ناس كثير ربطوه ببرنامج البرنامج لباسم يوسف من ناحية الروح والسخرية، لكن الفرق إن Saturday Night Live بالعربي بيناقش قضايا خفيفة شوية زي الزواج والكورة.

طبعًا البرنامج قابلته انتقادات زي أي حاجة، وأولهم كانت أغنية زيزو اللي عرضوها في أول اسكتش للبرنامج. صحيح الأغنية انتشرت جدًا، لكن آراء الناس كانت مختلفة، وفي ناس اعترضوا عليها وشافوا إن لغتها حادة وجريئة.

إسلام إبراهيم وهو واحد من الممثلين في البرنامج كلمنا عن تأثير تعليقات الناس على كتابة الاسكتشات، وبيشوف أن كل واحد بيتذوق الكوميديا بطريقته.

"ساعات الاسكتشات بتكون مش على مزاجنا، لكن الجمهور بيموت على نفسه من الضحك لما يشوفها، والعكس صحيح، عمومًا البرنامج بعد إذاعة أول حلقاته في 20 فبراير حقق نجاح كبير والتعليقات كانت إيجابية جدًا".

وقال شادي "التعليقات اللي وصلتنا على الإنترنت أكدت إن البرنامج عجب الناس، وكفاية علينا عدد المشاركات الضخم لاسكتشاتنا على مواقع التواصل الاجتماعي اللي بتؤكد أنها عجبتهم".

صحيح عملية تجميع المشاهد علشان تعمل حلقة كاملة بتكون متعبة، لكن كل فريق العمل اتفقوا أن التعب بيروح لما بيعرضوا اسكتشاتهم مباشرة على الجمهور في المسرح.

وشرح لنا حازم إيهاب وجهة نظرهم وقال "ممكن وإحنا رايحين نشتغل نكون بنطلع 60% من طاقتنا، لكن أول لما نقابل الجمهور المتحمس وتصفيقهم وضحكهم، بنتحول لشعلة نشاط".

ولما سألنا فريق Saturday Night Live بالعربي هل البرنامج يقدر يحقق نفس نجاح واستمرارية النسخة الأصلية الأمريكاني، ضحكوا وقالوا أنهم ماشيين واحدة واحدة.

واختتم إسلام الحوار وقال "هدفنا الوحيد هو إسعاد الناس وإننا نقدر ننسيهم هموم ومشاكل الحياة. لو قدرنا نعمل كده باسكتش واحد من الثمانية نكون فعلًا حققنا رسالتنا".

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
هند صلاح الدين
حرر بواسطة:
هند صلاح الدين
تاريخ النشر:
27/05/2016
كاتبة