التسريبات: عدو جديد لمسلسلات رمضان - تليفزيون Feature - كايرو 360
 







التسريبات: عدو جديد لمسلسلات رمضان
التسريبات: عدو جديد لمسلسلات رمضان
اصدرت في: 09/06/2016

بقينا عايشين في عالم من التسريبات!

نعتقد أن ده هو الوصف المثالي اللي ممكن نصف به عام 2016 بداية من تسريبات لشخصيات عامة، وتعاملات مصرفية مع أماكن مشبوهة للتهرب من الضرائب، أما في مصر فشوفنا تسريبات الثانوية العامة المستمرة سنة بعد سنة، وتسريبات لمكالمات لإعلاميين وغيرها من التسريبات، التسريات وصلت لعالم المسلسلات بعد تسريب 5 حلقات من مسلسل (مأمون وشركاه) للنجم عادل إمام، وتسريب 3 حلقات من مسلسل (الخروج) من بطولة درة وظافر العابدين وشريف سلامة.

 

على الرغم من أن التسريبات بشكل عام مش ظاهرة جديدة على الإنتاج الفني والأدبي بشكل عام، والإنتاج السينمائي المصري بشكل خاص، إلا أن التسريبات أول مرة توصل لعالم الدراما المصرية، وبنعتقد أنها ظاهرة خطيرة تستحق الدراسة، ليه؟ لأن أهم عنصر بيحافظ عليه صناع أي مسلسل هو التشويق... وبالتالي الكاتب والمخرج والممثلين مش هيقدروا يسيبوا المشاهد في حالة من الترقب زي ترقب شهريار لباقي حدوتة شهرزاد.. تخيلوا إيه ممكن يحصل لو حد حرق 5 أجزاء من حواديت شهرزاد لشهريار.

في واقع الأمر أصبح عندنا مسلسلين في رمضان محروق منهم حوالى 5 حلقات كاملة... يعني المشاهد هينسى المسلسل لمدة 5 أيام قادمة.. وده بيأثر بشدة على ترتيب الحدوته في دماغ المشاهد ورغبته في معرفة المزيد.

 

إيه أهم عنصر بيهتم بيه صناع مسلسل ما؟ أنهم يعملوا جذب للإعلانات علشان يقدروا يجمعوا تكلفة إنتاج المسلسل وأجور العاملين فيه بداية من الأبطال وحتي عمال البوفيه والديكور وخلافه، وإيه أكبر عامل بيحط فيه المعلنين فلوسهم؟ أسماء أبطال العمل وقدرة العمل على فرض نفسه وطرد باقي الأعمال والأستحواذ على إهتمام الجمهور.. لكن فى حالة تسريب 5 حلقات من مسلسلين في رمضان، نقدر نقول أنه بيضرب المعلنين في مقتل، لأن الجمهور هيشوف المسلسلات بدون إعلانات لمدة 5 حلقات، وهيفقد الاهتمام بالمسلسل بعد تسريب 1/6 أحداثه من أول يوم في رمضان.

 

هل دي كانت الحالة الأولي لتسريب مواد فنية في مصر؟ الإجابة طبعًا هي لا.. الحقيقة أن الوسط الفني المصري حصلت فيه تسريبات سينمائية وأدبية كبيرة جدًا ومستمرة رغم أنف الرقابة على المصنفات وصناع الأفلام نفسها... يمكن من أشهر وأحدث التسريبات عملية السرقة اللي تعرضت لها رواية الكاتب (أحمد مراد) بعنوان (أرض الإله) واللى تم تسريبها إلكترونيًا بعد صدورها في المكتبات بأقل من 24 ساعة، وتسريب أفلام زي (هيبتا) و(حسن وبقلظ) في وقت قصير بعد صدورهم في السينمات.

 

الحرب ضد تسريب الأفلام والكتب والروايات حرب طويلة ومستمرة.. الفصول العلنية فيها أقل بكتير من الفصول اللي بتحصل من تحت لتحت، ومحاولات التصدي للقرصنة الإلكترونية والتعدي على الحقوق الفكرية مش هتتوقف، زي ما منتديات بير السلم وروابط المشاهدة وملفات التورنت هي كمان مش هتتوقف.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
محمد حمدي
حرر بواسطة:
محمد حمدي
تاريخ النشر:
09/06/2016
كائن سكندرى الهوى والاتجاه، يتغذى عقليًا على الكتب والأفلام، يتكاثر فى مواطن التظاهرات، يتغلب على الروتين بالسفر والكتابة، يبحث عن بنت الحلال، يقدس الحياة الزوجية، يشارك فى الأثاث، يحفظ بعيدًا عن متناول الأطفال.