منطقة الخانكة من أقدم المدن المصرية اللي لها تاريخ طويل، وأصل اسم الخانكة هو الخانقاه اللي عملها السلطان المصري الناصر محمد بن قلاوون، وده كان سنة 725 هجرية وكان بيطلق عليها الخانقاه السرياقوسية، ومعناها مكان العبادة باللغة الفارسية.. وهي أحد أنواع المباني في العمارة الإسلامية اللي بيطول مدة إقامة الأشخاص فيها من المتصوفين فترة طويلة، لأنها كانت مدينة للعبادة وسكن المتصوفة، وكمان لتدريس العلوم والمذاهب الدينية، واتحرف الاسم مع مرور الزمن لحد ما بقى اسمها الخانكة.. وبعدين اتغير المعنى بتاعها خالص من مكان العبادة، لمكان لعلاج المرضى النفسيين، وده سببه مستشفى الأمراض العصبية اللي اتبنت من 100 سنة في الخانكة، وارتبط الاسم بعد كده بمرضى الأمراض النفسية والعصبية.

وبعدين وصلنا دلوقتي لآخر مرحلة في التطور مع الاسم وهي مرحلة الميديا، بظهور مسلسل الخانكة.. من بطولة غادة عبد الرازق اللي هي نجمة معروفة ومعروف عنها حبها لمسلسلات الإثارة والغموض زي مسلسل "قصة حياة"، "مع سبق الإصرار"، ومع ماجد المصري كلاكيت تاني مرة!

"الخانكة" اللي أول ما سمعنا اسم المسلسل قولنا على طول هيبقى زي القصص اللي فاتت (الكابوس) وإن الموضوع هيبقى مرتبط بالمرض النفسي أو الأحلام والكوابيس وكده.

لكن قصة المسلسل دخلت سكة تانية خالص، قصة واقعية حصلت بجد لمعلمة بيحاول أحد تلاميذها التحرش بها، وهي بتضربه علقة موت وبتطلع فيه كل غيظها من الرجالة واللي سلوكهم بقى زي الزفت، المهم بتتقلب الترابيزة عليها وبتبقى هي الجاني مش المجني عليه.

وبتتطور أحداث المسلسل بعد كده في تفاصيل كتير وإزاي هتقدر تقف قدام المجتمع وتدافع عن قضيتها، وكمان إزاي تقدر تتعامل نفسيًا مع المجتمع، الموضوع لحد هنا حلو، لكن اللي مش حلو إن أبطال المسلسل مش عاملين أي إبداع في الأداء بتاعهم ومافيش تغيير فى أداء الشخصية، يعني ماجد المصري نفس الأداء اللي كان في مسلسل مع سبق الإصرار بنفس الشخصية، وغادة كمان بتعبيرات وشها وطريقة تمثيلها نفس الموضوع برضه.

أما عن إخراج محمد جمعة نقدر نقول إنه إخراج مميز وموفق في اختياره للكادرات والمساحات البصرية اللي في المسلسل خاصة في الأماكن المغلقة فعلى الرغم من تصوير كتير من الحلقات في أماكن مقفولة لكن استخدامه للمساحات البصرية جوه المكان المقفول بتخليك متابع جيد للديكور اللي معمول حلو ومتماشي مع الحالة والوصف الاجتماعي للشخصيات، بس اللي ممكن يتاخد عليه هو تكرار بعض النجوم لنفس الآداء اللي عملوه في مسلسلات قبل كده.