بالفيديو: أفضل 5 إعلانات في رمضان 2016 - تليفزيون Feature - كايرو 360
 







بالفيديو: أفضل 5 إعلانات في رمضان 2016
بالفيديو: أفضل 5 إعلانات في رمضان 2016
اصدرت في: 25/06/2016

التنفيذ الجيد للإعلان علشان يخرج في صورة جميلة ومبهرة، أهم من فكرة الإعلان نفسه.. ده لأن التنفيذ ممكن يحوّل فكرة عادية لإعلان جاذب ومبهر، وممكن يضيّع فكرة ممتازة، ويحولها لمجرد إعلان عادي.. طيب واللي يجمع الاتنين، هيقدم إيه؟

 

تخيّل بكره
شركة اتصالات اختارت صوت أصالة اللي مليان أمل وحياة عشان تغني في واحد من أجمل إعلانات رمضان 2016.. شركة اتصالات بتحاول توصل نفس الرسالة كل سنة، ويمكن في أغلب إعلاناتها، وبتحفز الشريحة المستهدفة على التحدي والمثابرة والأمل.. وعلشان كده اعتمدت في حملتها الإعلانية السنة دي على أهم 2 لعيبة محترفين.. النني وصلاح، لأن المثابرة والتحدي جزء مهم من حياتهم ومسيرتهم في اللعبة.. اتصالات بتطبق دورها المجتمعي في تحفيز العملاء ودفعهم ناحية الأحسن والأفضل.. دور تنمية المجتمع للشركات الضخمة مش بيبقى واضح أوي.. لكن نقدر نلاحظ أن شركة اتصالات بتأكد طول الوقت أنها صاحبة رسالة وفكر ورؤية، مش مجرد شركة خدمات وبس.

 

 

 

سيد أبو حفيظة وسمير الخطير
"أورانج" أو "موبينيل" سابقًا عودتنا أنها تقدم أفكار مبتكرة لحملاتها الإعلانية.. وفي رمضان على مدار أكثر من 3 سنين قدمّت أغاني جيدة شكلًا ومضمونًا، بتلعب على وتر المشاعر اللي مش بيخيب أبدًا.. أورانج السنة دي اختارت أنها تقدم إعلانات دمها خفيف.. واعتمدت على أكرم حسني الشهير بسيد أبو حفيظة، والممثل أحمد فهمي بطل فيلم سمير وشهير وبهير.. الحملة عبارة عن إعلانين، قايمين على استغلال أغاني قديمة ناجحة والناس حافظنها (اللعبة اللي اخترعها طارق نور الأب الشرعي للإعلانات التجارية في مصر).. الإعلان الأول اعتمد على أغنية زحمة الشهيرة لأحمد عدوية اللي لحنها هاني شنودة في التمانينات، والثاني أغنية لثلاثي أضواء المسرح، غنوها في فيلم 30 يوم في السجن.. الجميل أن الإعلانين معمولين بخفة دمّ، ومتقدمين في صورة راقية وشيك.


ماجد في موريشيوس
إعلانات "ماونتن فيو" كانت هتقل كتير من غير ماجد الكدواني، وعلشان خفة دمه بقينا بنستنى الإعلانات بتاعتهم.. ودي من المرات النادرة اللي بنشوف فيها سكريبت إعلان مكتوب كويس جدًا.. والإعلان نجح في دقيقة أو أقل إنه يقول كل حاجة.

 

عدوية وشارموفرز
كل المصريين عارفين أحمد عدوية، لكن مش كتير يعرفوا شارموفرز باند، وإعلان فرجللو السنة دي فرصة كويسة عشان الناس تتعرف عليهم.. أغنية الإعلان حلوة ودمها خفيف، وعلى طريقة شارموفرز: المزيكا مليانة حيوية والطبلة هي البطل الرئيسي.

 

سوسن وسعاد
حملة إعلانات لبنيتا توقفت من كام سنة بسبب أسماء البقرتين! والسنة دي رجعوا يظهروا في إعلانين جداد، بنفس الأسماء والأصوات، لكن الأنيميشن والكتابة تطوروا كتير عن الحملة الإعلانية القديمة.. سوسن وسعاد لعبوا مرة دور موظفات في السجل المدني، ومرة أسطوات في ورشة! إحنا انطباعنا عن البقر أنها حيوانات مسالمة وطيبة، لكن هنا سوسن وسعاد مشاكسين جدًا، وهوايتهم يضايقوا الناس!
الإعلانات دمها خفيف، وجاذبة أكثر للأطفال.. وتقريبا الإعلان بيقول ياريت كل واحد يهتم باللي بيعرف يعمله، ويسيبوا للبقر عمايل اللبن والزبادي!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
مصطفى  عبد ربه
حرر بواسطة:
مصطفى عبد ربه
تاريخ النشر:
25/06/2016
برج العذراء.. ما عرفش يطلع مزيكاتي فطلع شاعر.. بـ يحب الكتب، والشاي بالنعناع، والعيون الحلوة، وأغلب الوقت بـ يحب حاجات ما بـ يحبهاش غيره.