مسلسلات الكبار: أسماء لها تاريخ في أعمال عادية! - تليفزيون Feature - كايرو 360
 







مسلسلات الكبار: أسماء لها تاريخ في أعمال عادية!
مسلسلات الكبار: أسماء لها تاريخ في أعمال عادية!
اصدرت في: 28/06/2016

تاريخ النجوم الكبار مليء بالنجاحات، اللي خلتهم نجوم الصف الأول لمدة تزيد عن 30 سنة. وكل سنة المشاهدين بينتظروا أعمالهم، علشان يشوفوا أعمال متميزة.. لكن للأسف السنة دي أغلب النجوم قدموا أعمال مستواها عادي لمجرد التواجد على الشاشة!


الأسطورة
الفنانة فردوس عبد الحميد اللي اشتغلت مع المخرج الكبير كمال الشيخ، ومع محمد خان في فيلم الحريف. صاحبة المقولات الشهيرة عن الأداء غير المفتعل، والسهل الممتنع، وصاحبة مصطلح السينما النظيفة، اللي بتقدم أعمال جيدة تحافظ على القيم عليا. رجعت بعد غياب طويل علشان نلاقيها بتشتغل مع محمد رمضان في مسلسل الأسطورة، في دور أم رفاعي وناصر الدسوقي!
فردوس عبد الحميد لها تصريحات كتير بتعبر عن استيائها من السينما والتلفزيون اللي بيقدموا أعمال مبتذلة. وفجأة اشتركت في مسلسل من نوعية الأعمال اللي كانت بتهاجمها طول الوقت!

راس الغول
عم درويش (محمود عبد العزيز) واسمه الحقيقي فضل الغول، بيوصل لتاب مسروق. وبيعرف أنه ملك الوزيرة الدكتورة نادية أبو العزم (ناهد رشدي) ولما بيحاول يرجعه بيلاقي نفسه وسط دوامة كبيرة. وفجأة هيبقى متهم في محاولة اغتيال الوزيرة، ومتهم بأنه إرهابي قديم، متورط في محاولة لقلب نظام الحكم!
طول الأحداث عم درويش هربان، وبيحاول يثبت براءته بمساعدة ابنة الوزيرة (لقاء الخميسي) وهنعرف أن التاب المسروق عليه معلومات سرية وخطيرة، وبسببها حاولت جهة ما اغتيال الوزيرة، ومن خلال المطاردات هنتعرف على الماضي الغامض لعم درويش.
حبكة المسلسل الرئيسية فيها مشاكل كتير، ومحتاجة إعادة صياغة غالبًا. وخاصة أن دخول درويش في دوامة جرائم القتل والاغتيالات غير منطقي إطلاقًا. محمود عبد العزيز ممثل قدير، لكن هنا أداءه باهت، والحوارات فيها تطويل غير مبرر، والكوميديا مفتعلة إلى حد كبير.

مأمون مباشر
يوسف معاطي بيستخدم لعبته المفضلة في إسقاط الواقع السياسي على أحداث عمل درامي، ولأول مرة عادل إمام بيقدم شخصية البخيل، بيت مأمون مباشر بتتجمع فيه كل الأديان، مع دعوات بالتعايش السلمي، ومن هنا يبدأ الصراع.. والمفروض أن البيت هو مصر، والترميز واضح، ومأمون البخيل اللي بيخبي ثروته، وبيحرم أولاده منها هو حسني مبارك، عادل إمام مصرّ أنه يقحم نفسه في قضايا سياسية، ومُصرّ يحمّل الدراما أكثر مما تحتمل، تفاصيل شخصية البخيل معمولة كويس، مع بعض المبالغات لزيادة جرعة الكوميديا، لكن أداء عادل إمام نفسه كان ممكن يتعمل أحسن من كده، وبالذات أن المنطقة دي جديدة عليه.

 

يحيي الفخراني
ما يميز مشوار القدير يحيي الفخراني -غير موهبته الكبيرة- أنه طول الوقت حريص في اختيار أعماله، دائمًا بيحاول يدور على الجديد والمختلف. صحيح مش كل المحاولات بتنجح، أو بتتعمل كويس، لكن المهم أنه بيحاول، ورصيده من الأعمال الجيدة معروف. وفي وقت ما ماكانش في غير مسلسلاته اللي الناس بتستناها في رمضان من السنة للسنة. والسنة دي الدكتور يحيي لعب دور الشيطان بأداء استثنائي في مسلسل ونوس، والعمل بشكل عام متكامل إلى حد كبير، من حيث الكتابة، والإخراج، وباقي الممثلين. يحيي الفخراني هو جوكر الدراما، اللي شال حملها على كتفه لأكتر من 30 سنة.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
مصطفى  عبد ربه
حرر بواسطة:
مصطفى عبد ربه
تاريخ النشر:
28/06/2016
برج العذراء.. ما عرفش يطلع مزيكاتي فطلع شاعر.. بـ يحب الكتب، والشاي بالنعناع، والعيون الحلوة، وأغلب الوقت بـ يحب حاجات ما بـ يحبهاش غيره.