تعتبر قناة «فتافيت» قناة فريدة من نوعها متخصصة في جانب مهم من حياة الإنسان وهو الأكل، مفيش خلاف على أن الأكل ممكن يبقى هواية سواء بالوقوف في المطبخ واختراع أكلات جديدة أو تناول الأكل نفسه. قناة فتافيت شعبيتها زادت جدًا في آخر سنتين، وهي بـ تقدم برامج طبخ عالمية وعربية ومصرية، باللغتين العربية والإنجليزية.

برنامج «من مصر» بـ يقدمه أكثر من شيف سواء رجال أو سيدات، وبـ يعملوا أكلات مصرية فقط. أول حاجة هـ تلفت انتباهك في البرنامج حركة الكاميرا الجديدة على النوع ده من البرامج، بـ تتحرك بسلاسة وبطريقة سينمائية مش زي حجم اللقطات الثابت مثل كل برامج إعداد الأكل، بس المشكلة أن الإضاءة مش كويسة قوي والإنتاج محدود رغم أن موارد القناة تعتبر جيدة جدًا وإنتاج برامج ثانية يشهد على ده. بس بـ يعوض الإنتاج المتواضع شطارة المقدمين وتلقائيتهم وطبعًا الأكلات اللي تفتح النِفس اللي بـ يعملوها خاصة الشيف طارق المتخصص في الأكلات الشعبية المصرية زي الكوارع والفشة والممبار والملوخية بالأرانب، بـ يقعد يتغزل في الأكل والمكونات بطريقة لذيذة وتحس أنه على طول جعان ونفسه يخلص علشان يأكل الحاجة اللي هو بـ يطبخها، وفيه مقدمة ثانية مصرية هي سلمى سليمان بـ تعمل أكلات غير مصرية خالص زي البط بالبرتقال وشوربة المشروم، والفقرة نفسها كويسة بس لو قللت سلمى من المصطلحات الإنجليزية شوية مراعاة للجمهور العربي اللي بـ يتفرج يبقى أفضل، وللأسف دي بقت سمة في برامج كثير.

الشيف عباس بـ يقدم فقرة بعنوان "عباسيات" وهي كانت جزء من البرنامج قبل كده وبعدين أصبحت فقرة مستقلة بـ تتذاع بعد حلقات «من مصر»، وفيها بـ يروح أماكن كثير بـ تعمل أكل مصري وحلويات كمان وطبعًا الجزء ده فيه تصوير خارجي، وطريقة الشيف عباس في التقديم ظريفة جدًا وبـ يقدر يحببك في الأكلة وكأنك بـ تأكلها بنفسك.

ميزة البرنامج أنه مش بـ يستقبل مداخلات تليفونية واستفسارات، علشان ده بـ يخرجك من جو البرنامج أو تركيزك في عملية الطهي وإضافة المكونات لو سرحت مع المتصل اللي عادة بـ يسأل في حاجة ثانية غير اللي بـ تتعمل.

البرنامج بـ يُذاع أيام الأحد والاثنين والثلاثاء والخميس الساعة 11 مساءً وأيام الجمعة والأربعاء الساعة 3 عصرًا وأجازة يوم السبت، وبـ يُعاد ثاني يوم من إذاعته الساعة 7 صباحًا.

قناة «فتافيت» للي مش متابعها ترددها على النايل سات هو 12341 رأسي، وعامة صعب أن حد يكون غاوي مطبخ ومش متابع القناة دي.