بعد ظهورها في كثير من الأعمال الدرامية بدأت تتجه لشكل جديد من البرامج الإعلامية لتتواجد بشكل قوى ومختلف خاصة في تقديم برامج المسابقات، هي المذيعة نجلاء بدر وبرنامجها الجديد "أنت والمليون" اللي بـ يعرض على قناة المحور الفضائية، البرنامج ده له شهرة عالمية خاصة في العديد من الدول الأوربية لكن قناة المحور انفردت بـ تقديمه لكن بمزيج من فريق عمل لبناني مصري خاصة وأن البرنامج تم تأجيل عرضه أكثر من مرة نتيجة للأحداث اللى بـ تمر بها مصر.

بدأ البرنامج بشكل قوي وممتع وده بـ يظهر مع دخول نجلاء للستوديو اللى مصمم بشكل مميز وغير تقليدي للمتسابقين مع وجود عدد كبير من الجمهور، ونلاحظ أن فكرة البرنامج بـ تتضمن اختيار مجموعة من المتسابقين بناء على معرفتهم بالمعلومات العامة، وبـ يكون اختيارهم عن طريق الاتصالات التليفونية سواء في مصر أو لبنان، وبـ يتم اختيار اثنين في كل حلقة لاختبار معلوماتهم وسعيد الحظ هو اللى بـ يفوز بالمليون جنيه.

ونلاحظ أن تقديم البرنامج ده مختلف عن العديد من برامج المسابقات لأنه بـ يقدم للمتسابقين المليون جنيه أمامهم بعد الإجابة على الثمانية أسئلة سواء كانت معلومات عامة أو غيرها، وطبقًا للاختيارات اللى بـ يحددها المتسابق، يعنى مثلاً يظهر على الشاشة نقطتين واحدة خاصة بالأقارب وأخرى مسلسلات، ويبدأ يختار المتسابقين من بينهم نقطة واحدة وتدور كل الأسئلة عنها، وبعد كده يبدأ يضع أمام الإجابة الصحيحة المليون جنيه، وده في حالة التأكد التام منها، أما في حالة العكس يتم سحب كل الأموال اللى وضعوها أمام السؤال، والمتبقى هو اللي هـ يفضل معهم لاستكمال اللعبة وهكذا في كل سؤال لحد ما يوصلوا للسؤال الأخير والإجابة الصحيحة اللى موجود أمامها الفلوس هى اللى بـ يحصل عليها المتسابق في النهاية.

مع كل ده بـ يكون فيه مجموعة من الشاشات اللي بـ يظهر عليها كل إجابة ويبدأ يختار المتسابق من بينهم، يعني نقدر نقول أن البرنامج بسيط وخفيف وممتع في نفس الوقت لأنه بـ يقدم شكل جديد من أشكال المسابقات وكمان المتسابقين على درجة كبيرة من الوعي والفهم واختيارهم بـ يتم بشكل دقيق لكن أداء نجلاء غير ملائم لبرامج من النوع ده، ومن الأفضل أن يكون فيه مذيعين مميزين في المجال ده يقدروا يظهروا بصماتهم على البرنامج يعطوا له شكل مميز وطابع خاص، لكن في «أنت والمليون» نجلاء ما قدرتش تعطي طابع خاص بها ومميز، وكمان الموسيقى التصويرية المستخدمة غير ملائمة لبعض الأسئلة المطروحة في البرنامج.