بـ نواجه في حياتنا مشاكل كثيرة ودائمًا بـ نحاول نوصل فيها لحل، وبـ نسأل كل اللى حولنا عن حلها سواء كانوا مقربين أو من أصحابنا، لكن برنامج «أول الحكاية» اللي بـ يعرض على قناة دريم 1 الفضائية يقدر يساعدنا في كل المشاكل اللى بـ نمر بها.

البرنامج من تقديم هبه رشوان، وطبعًا كلنا عارفينها اللى مشهورة دائمًا ببرنامج مجلة المرأة اللى كان بـ يعرض على القناة الأولى كل يوم جمعة بعد الصلاة، وبـ يعرض كل يوم خميس وكمان بـ يهتم بعرض موضوعات بـ تشغل بال كثير مننا خاصة المشاكل الاجتماعية، زي مثلاً جواز الأبناء والخلافات بين الزوجين ودور الحموات في حياة الأبناء وغيرها من موضوعات ثانية كثير، ودائمًا بـ يكون في بداية الحلقة تقرير مصور عن رأي الناس في موضوعها، وكمان بـ تهتم بالتنويع في اختيار الشخصيات اللى بـ تقول رأيها في موضوع الحلقة.

مثلاً لو موضوع زي دور الحماوات في حياة الزوجين بـ تتعرض لرأي الستات كبار السن والرجال والشباب، وده بـ يكون في كل حلقة بالبرنامج، وبعد كده فيه لقاء حواري مع متخصصين في مجال الطب النفسي والاجتماعي علشان يساهموا في حل المشكلة، زي مثلاً دور العامل النفسي والدراما في ترسيخ الاعتقاد السيء عن الحماوات وزوجة الابن، والصراع المستمر بين الاثنين والخلاف بين أم الزوج والزوجة، وكمان إزاى الاختلاف في وجهات النظر بين الزوجين وتأثيره على الأولاد وتدخل الأمهات في حياتهم الزوجية وكمان دور الأخوات البنات كحماوات، ونلاحظ أن البرنامج بـ يهتم بعرض الاتصالات التليفونية علشان يشارك المشاهد برأيه في الحلقة بشكل إيجابي، وممكن كمان يعرض مشكلته في الحلقة وبالتالي ده بـ يكون له دور إيجابي في البرنامج.

وكمان أداء هبة رشوان جيد جدًا لأنها بـ تعرض المشكلة في البرنامج من كافة الجوانب، يعني بـ تهتم بعرض كل الأسئلة اللى ممكن تخطر في بال المشاهد، وكمان بـ تُشعر الجمهور بوجود حميمية بينها وبينهم، وده بـ يساعد في نجاح البرنامج ويخليه ممتع وجذاب للمشاهد.

ورغم جمال البرنامج إلا أنه ما بـ يهتمش بعرض لقطات تمثيلية تدعم وجهة نظر البرنامج في طرح المشاكل الاجتماعية لأنه بـ يساهم في نجاح البرنامج وكمان الديكور تقليدي جدًا ومعتاد ومشابه لدرجة كبيرة ببرامج القناة الأولى بالتليفزيون المصري، وكمان دائمًا بـ يستضيف البرنامج ضيف واحد فقط وبـ يتكرر نفس الشخص في حلقات البرنامج، وما بـ يهتمش بوجود ضيوف كثيرة تساعد على تفاعل أكثر داخل البرنامج وكمان الإعلانات محدودة جدًا وأغلبها فواصل وتنويهات عن برامج القناة.