زي ما عودتنا قناة دبي الفضائية أنها بـ تقدم لنا كل جديد وجميل على شبكتها الفضائية النهاردة بـ تقدم لنا برنامج «الليلة مع فايز» وده شكل جديد ومتنوع من برامج السهرات الفنية.

البرنامج هدفه الأساسي أنه يقدم سهرة فنية ومتنوعة في كل المجالات سواء في الغناء، والتمثيل، والتقليد، والكوميديا، يعني كل أنواع الترفيه اللي بـ تدخل السرور على نفس المشاهد.

المذيع بـ يدخل للستوديو بشكل كوميدي وجذاب للمشاهد، وده بـ يكون مع وجود موسيقى لكل حركة بـ يعملها فايز، وهو فنان خليجي كوميدي له العديد من الأعمال الناجحة على مستوى الخليج العربي، وبعد كده يبدأ يقدم بعض فقرات خاصة به وطبعًا بـ تكون كوميدية، ومن الواضح جدًا من شكله أنه قريب من شكل برنامج أحمد آدم اللى كان بـ يقدمه على قناة الحياة "بني آدم شو" لكن مع الفرق أن فايز بـ يهتم بوجود فنانين متنوعين في كل المجالات وكمان على كل أنحاء الوطن العربي من مصر، ولبنان، والسعودية، والكويت وغيرها، وطبعًا في كل حلقة بـ يختار فايز ضيوفه بعناية فائقة لأنهم كمان عندهم قدرة عالية على إظهار جو المرح والكوميديا في البرنامج، وأحيان كثيرة بـ يكون فيه مشهد تمثيلي مع بعض الفنانين الموجودين، وكمان قيام بعض الفنانين بتقليد حد من فنانين آخرين ولكن في زمن مضى وربما يكون الهدف علشان ما يسببش أى خلافات مع فنانين آخرين.

وكمان بـ يهتم فايز بوجود بعض الشخصيات من خارج الوسط الفني ولكن لهم بصمات كوميدية سواء في طرح نكت جديدة أو مواقف، وده دليل على قوة البرنامج لأنه بـ يهتم بكل أنواع الكوميديا في عرضها على المشاهد، وكمان ممكن يشارك أحد من الجمهور الموجودين في الستوديو داخل البرنامج بمواقف كوميدية.

ورغم جمال البرنامج إلا أن استخدام الموسيقى بشكل كبير في كل جزء منه قد يصيب المشاهد بالملل خاصة أن فايز بـ يحاول أنه يستخف في بعض المواقف، يعني مش كل اللى بـ يقدمه بـ يضحك المشاهد من قلبه فبعضها ممل، وكمان ديكور البرنامج غير ملائم لطبيعته الكوميدية خاصة وأنه تقليدي جدًا بدون صور أو أشكال تعكس شخصية البرنامج.

ونلاحظ أن البرنامج مدته طويلة جدًا بشكل قد يصيب المشاهد بالملل على الرغم من مضمون البرنامج الكوميدي وكمان اهتمامه بتقديم موقف كوميدي بين كل فقرة والثانية سواء كانت بين الفنانين أو في حالة تقديمه لشخصية معينة في رأينا غير ظريفة لأن أغلبها لا يوحي للمشاهد بالضحك على الرغم من أنها بـ تعكس بعض المواقف الاجتماعية في حياتنا.