مساء الفل والصحة واللياقة للى عاوزين يعيشوا حياة مختلفة مع الكابتن نور خطاب.. حياة لها "طعم تانى".. طعم مختلف.. طعم الصحة واللياقة والفن والتغذية والجمال والإتيكيت والشخصيات العامة واختيار الأكلات الصحية والتوازن فى الحياة وفن إدارة الحياة بشكل متكامل.

برنامج "شكل تانى" هـ يتكلم كل شهر عن موضوع يأخذه كده طوال الشهر لحد ما يخلص كل المعلومات عنه وهـ يتكلم فى الدورة الأولى للبرنامج واللى هـ تقعد تقريبًا سنة عن "التغذية، الحوامل، الأوزان الثقيلة، الأطفال، كبار السن، بناء الجسم، ربات البيوت، رجال الأعمال، المنشطات، والهرمونات".

البرنامج بشكل عام مُقسم على مدار الأسبوع إلى قسمين: الأول حلقة أسبوعية من خمس فقرات: أولها "أخبار شكل تانى" وهى أخبار عامة وحاجة كده أشبه بالتقديم العام للحلقات وإيه اللى هـ يحصل فيها ومين الضيوف وأخبار عن الصحة، ثاني فقرة مع الدكتور إيهاب فكرى أستاذ علوم فن إدارة الحياة وبـ يتكلم عن فكرة التوازن فى الحياة واللى تقدر تخليك مبسوط فى حياتك، لما تبص لها بشكل تانى.. الإنسان محتاج يركز على حياته كلها ويقسمها صح علشان يعمل توازن بين العقل والقلب والجسم والأسرة والعمل عن طريق التخطيط.

ثالث فقرة لخبيرة العناية بالبشرة زين كرازون وكلام عن الموضة والجمال وماسكات للوجه والبشرة بشكل عام.. واللطيف فى الموضوع ده أن زين بـ تقدم خلطات من مواد طبيعية لأن نظريتها فى الموضوع أن المواد الطبيعية والأعشاب حتى لو ما جابتش نتيجة مش هـ تضر البشرة بأى شكل من الأشكال، هـ تتعلموا إزاى تختاروا الملابس والأكل اللى يفيد الشعر والبشرة.. هـ تلاقوا كلام عن تنشيط الدورة الدموية للبشرة، عن الوجه اللى بـ يضحك لأنه مستريح.. عن البشرة اللى لازم تأخذ شكل ثانى علشان تعيش حياة طبيعية أحلى.

رابع فقرة ضيوفها متنوعين: نجوم ودكاترة وشخصيات عامة فى كل المجالات وكان اختياره فى الحلقة الأولى مميز جدًا وواعى.. اختار الممثل أحمد عز وهو بالفعل رياضى جدًا كان بـ يعمل كل التمارين اللى بـ يقولها كابتن نور بالضبط.. على الرغم أن فيها تمارين صعبة لكنه كان بـ يقدر يعملها.

آخر فقرة مع الشيف اللبنانى المميز جدًا "ريتشارد" وهو شخصية حبوبة بجد بـ يقعد يضحك وهو ماهر فعلاً فى المطبخ.. ومهمته أنه يعمل أكل صحى ومفيد.. الشيف ريتشارد بـ يتكلم عن النشويات، المعادن، الألياف، الخضروات، والفاكهة.. والجميل كمان أنه بـ يحكى حكاية الأكلات وأصلها وبلدها.

أما القسم الثانى: 4 حلقات أسبوعية فيها تدريبات عملية على موضوع الشهر وإزاى تقدر تعمل تمرينات بسيطة فى البيت وتساعدك على عيشة جيدة وصحية.

الإنتاج متميز جدًا من كمية الضيوف والتقسيمات المختلفة ومنها تصوير خارجى أو داخل الستوديو.. والمخرج بجد بـ يتعب لأنه بـ يصور حاجات كثير وضيوف مختلفين فى كادرات مختلفة وأماكن مختلفة.. أما نور خطاب فهو رياضى متميز وواعى ومثقف وفاهم ومن الواضح أنه دارس كويس لياقة والتمارين بشكل متخصص.. أضف بقى لكل ده أنه مقدم برنامج جيد جدًا ودمه خفيف .. بجد تفرجوا على البرنامج.