المثل:

حضراتكم فاكرين المثل الشعبى العبقرى "خالتى وخالتك وتفرقوا الخالات".. ده مثل للى ما يعرفش بـ يتكلم عن القعدة اللى من وراء منها مصلحة أو شىء عابر.. حاجة مش دائمة، يعنى زى "مولد وانفض".. يعنى حاجة حصلت وعدت بسرعة دون أى استفادة.. وهو ده بالضبط اللى بـ يحصل فى البرنامج اللى كان بـ يُعرض على القناة اللبنانية (lbc) ودلوقت بقى يُعرض على (cbc) يعنى من لبنان لمصر.. واللى اسمه "أحلى جلسة" وطبعًا من الواضح جدًا الإيحاء اللى موجود فى عنوان البرنامج بالضحك والفرفشة وكونه برنامج خفيف. 


لبنان/ مصر.. رايح جاى

البرنامج لما كان فى لبنان كان بـ يعتمد على الممثلات والمغنيات وعارضات الأزياء اللبنانيات.. ومعاهم ممثلين ومغنيين لبنانيين أو عرب.. وطبعًا كان الشو الكبير بـ يعتمد على فكرة الجمال.. البنوتة الجميلة والشاب الشيك.. ومش كده وبس لأ ده كمان كان بـ يجيب فى حلقاته ملك جمال لبنان.. أيوه يا عم أنت قرأت صح مش غلطة ولا حاجة، ملك جمال يعنى أحلى ولد فى لبنان.. المهم البرنامج انتقل من لبنان إلى مصر وطبعًا لازم يأخذ نفس الشهرة مع المذيع "المتألق" بجد طونى بارود.


طونى بارود.. الشهرة.. الأداء

طونى بارود مش مذيع عادى.. مش لبنانى عادى.. هو راجل من الواضح أنه قارئ جيد مثقف يعنى بلغتنا إحنا الناس اللى بـ تكتب.. وكمان مدير حوار جيد جدًا.. قادر يصنع حالة حلوة فيها ضحك وتنوع فى الفقرات.. وكمان معاه معدين جامدين جدًا يعنى بـ يقدروا يوصلوا لممثلين ومغنيين وعارضى أزياء فى مصر وباقى الدول العربية.. وبـ يعملوا Mix ما بينهم وهنا بـ تظهر الخلطة مع كل دول لازم تجيب مشاهدة عالية.. لو مش بـ تجب فلان أكيد هـ تحب علان.. ولو مش بـ تحب الاثنين أكيد هـ تحب فلانة وهكذا. 


سر الخلطة:

إيه هو بقى سر الخلطة؟.. نقول لكم.. أولًا طونى بارود الرجل ده ينفع ممثل.. هو قادر يتفاعل مع كل الناس بأشكال مختلفة.. يعنى مع الوقور هـ تلاقوه أنه لابس بدلة ونظارة وبـ ينظر لموضوع فى الأمم المتحدة.. مع النشيط عادى جدًا بـ يقوم يرقص ويغنى وساعات يمسك بيركشن كمان ويلعب عليه.. وهكذا قادر ينوع من نفسه فى المواقف المختلفة.. أما ثانى سر فى الخلطة فهو الخلطة نفسها أقصد "الضيوف" هو بـ يجيب ضيوف من أماكن وتخصصات مختلفة فهـ تلاقى من كل لون ونوع فنى وده طبعًا بـ يعمل جمهور متنوع وبالتالى جمور متميز وكبير.. والسر الخير هو تنوع الفقرات من أسئلة شخصية وعرض لصور شخصية للضيوف والتعليق عليها والقدرة على استكشاف الضحك سواء من الضيوف أو المشاهدين.. ولكن بعد كل ده حضرتك لازم تسأل نفسك سؤال مهم أنا وصلت لإيه فى الآخر.. أو بمعنى ثانى الساعتين اللى راحوا فى المشاهدة طلعت بهم بنتيجة إيه.. صراحة أنا شايف أنك هـ تطلع بنتيجة واحدة اسمها "خالتى وخالتك وتفرقوا الخالات.