لكل واحد فينا هواية أو حاجة بـ يلاقى نفسه فيها بس إحنا أمام حالة استثنائية.. حالة مختلفة جدًا من الصعب أنها تتكرر.. الشيف بتاعنا هنا دكتور.. أيوه دكتور، لأ مش فى التدبير المنزلى ولا فى السياحة والفنادق، وسام -على حد تعبيره- قرر يرمى السماعة ويشتغل فى أكثر حاجة بـ يحبها وهى الطبخ.

هو كمان مش واخد الموضوع مجرد هواية، لأ ده كمان علم ودراسة بـ يربط كل حاجة بـ تحصل فى المطبخ بالفيزياء وده مع ده يبقى تأثيره على الجسم كذا.. "المهنة لها حكمها".

وزى ما هو معروف أن كل شيخ وله طريقة، برضه كل شيف وله طريقته اللى بـ تميزه عن غيره.. وده اللى بـ يخلينا نتفرج عليه أصلًا.. هـ نلاقى الشيف وسام له أسلوب أكاديمى شوية وده واضح فى طريقة كلامه، حتى مرة كان أخونا بـ يتفرج معانا على البرنامج وقال لنا: "ما له محسسنا أنه فى محاضرة، قلنا له: "هو دكتور أصلًا".

وسام بـ يستخدم اللغة الإنجليزية كثير فى كلامه وده ممكن يخسره عدد من شعبيته على اعتبار أن فيه قطاع من المشاهدين ممكن ما يفهمش المصطلحات اللى بـ يقولها ودي نصيحة بـ نقولها لوسام فى ودنه.

هو كمان بـ يحب يطبخ لأصحابه وأخواته وأولادهم، وعلى طول بـ يجيب سيرتهم ويتكلم عن أكلة عملها لأصحابه وانبهروا بها.. وسام بصراحة عنده أفكار جديدة وجريئة خارج الصندوق زى مثلاً أنك ممكن تغلى البنجر فـ يبقى عندك مياه حمراء ممكن تعجن بها البيتزا ودي برضه داخلها فكرة إزاى تبهر أصحابك أو ضيوفك، ده غير أكل كثير حلو زى شاورما الفراخ والبيكاتا وعلاج المشاكل اللى بـ تقابلنا كلنا فى عملها.. وإزاى الصوص بتاعها يبقى زى بره وأحلى كمان.

استمروا فى الطبخ ودي الخدمة الجديدة اللى بـ يقدمها وسام وهى إرسال رسالة قصيرة للاستفسار عن أى مشكلة هـ تقابلكم فى الطبخ أو تعلم أى طبخة وهـ توصلكوا رسالة من خلالها نقدر نعرف كيفية إرسال صورة أو فيديو للأكلة اللى باظت.

ولو تكلمنا عن ديكور البرنامج هـ نلاحظ حاجة مهمة جدًا وهى ثبات الشكل تقريبًا فى أغلب البرامج وكأن الديكور ثابت واللون بس هو اللى بـ يختلف.. والشيف عامل لنفسه زى موحد هو عبارة عن "تى شيرت" أسود وتقريبًا ما بـ يتغيرش.. ومن الأكلات الجميلة اللى بـ يعملها فى برنامجه هى: "الكريب.. الشاورما بأنواعها.. البطاطس المقرمشة.. الفراخ فى الفرن.. البيض الأومليت".