الاختيار بين القنوات:

قناة "صدى البلد" على فكرة طورت من أدائها كثير واختلفت عن أول ما ظهرت.. يعنى جودة الصورة واستوديوهات التصوير فى البداية كانوا بـ يخلوا الناس يبعدوا عن القناة.. لأننا فى عصر الصورة والناس زى ما بـ تدور على الخبر الصحيح والتغطية الكاملة والضيوف الجدد.. بـ يدوروا برضه عن الصورة الجيدة والستوديو الجديد والديكور المتميز.. الناس فى عصر الاختيار بين القنوات بقى عندها القدرة على تخطى أى قناة والاهتمام باللى يحترم عين المشاهد وعقله.. وبصراحة قناة صدى البلد تطورت فى الفترة الأخيرة بشكل كبير وطورت من برامجها وناسها.

 

الراديو زمان:

عارفين أنه برنامج تليفزيونى.. وعارفين أنه بـ ييجى فى قناة صدى البلد.. بس ما قدرناش نمنع نفسنا من الكلام عن الراديو زمان لما كانت الناس تصطبح بأغنية "يا صباح الخير يا اللى معانا" وقرآن رفعت.. ويسمعوا الأخبار ويبدأوا يومهم من بدرى.. الشكل ده تقريبًا اختفى وبقيت الناس بـ تصحى على برامج متنوعة فى كل القنوات أغلبها بـ يبدأ باسم "صباح....." والنهاردة معانا برنامج منهم وهو "صباح البلد".. وتعالوا نقول لكم إيه بقى...

 

إيه بقى البرنامج:

صباح البلد برنامج يومى بـ يعرض من الساعة 9 صباحًا لحد الساعة 11 ظهرًا والإعادة بـ تبقى الساعة 2 صباحًا.. وبـ يقدم البرنامج خدمة للمشاهدين وهى محاولة تجميع كل الأحداث والتعرف عليها، وده بـ يبقى من خلال الفقرات المتنوعة واللى فيها مناقشة أهم القضايا والأخبار.. واستضافة ضيوف يحللوا أو ضيوف متخصصين فى السياسة والمجتمع والأدب والفن والسياسة،وكمان بـ يقدم تقارير خدمية للمشاهدين علشان الناس تعرف أسعار السلع وبـ ينزلوا الأسواق يعملوا تقارير من هناك.. أهو لو رايح تشترى حاجة برضه تبقى عارف قبل ما تنزل.. والمميز كمان فى البرنامج هو تقرير حركة المرور وكلنا عارفين طبعًا أهمية التقرير ده فى المرحلة اللى إحنا فيها.. برضه تعرف لو فيه اعتصام هنا.. ولا مسيرة هناك.. ولا تجمع أو حتى قلق فى منطقة معينة.. وما أكثر ده فى مصر اليومين دول.. وربنا يعديها على خير.. المهم البرنامج بـ يقدمه المذيعتين المتألقتين مايسة ماهر ودينا رامز.

 

عن مايسة ماهر نتحدث:

هى خريجة سياسة واقتصاد من الجامعة الأمريكية.. وبـ تحب القراءة والرياضة،كانت مذيعة ورئيس تحرير فى قناة النيل الدولية وهى كمان مترجمة فورية من الفرنسية والإنجليزية.. وعملت قبل كده برنامج "اقرأ دستورك" على قناة صدى البلد.

 

وعن دينا رامز نكمل الحديث:

تركيبة مختلفة من صغرها.. لأنها كانت بـ تتدرب على عروض الأزياء مع بنت عمها الفنانة "شيرين رضا" ولما كبرت بدأت عملها الإعلامي بالتليفزيون المصري وحققت الشهرة فى برنامج "بدون مونتاج" وبعدين اشتغلت فى قنوات الأوربت وبعدين روتانا.. وبعدين رجعت إلى التليفزيون المصري وتولت رئاسة قناة "نايل لايف".. وأخيرًا بقيت بـ تقدم برنامج "صباح البلد"، مشوار برضه أكيد أثر فى شخصيتها وحياتها وطريقة عملها وخبرتها وكل ده بـ يظهر فى البرنامج.