أغلب برامج الطبخ في القنوات المصرية تقريبًا تقليدية ومافيش جديد ولما شوفنا قناة طبخ مصرية تفائلنا لكن للأسف طلعت بـ تقلد قناة منافسة بكل تفاصيل البرامج وإمكانيات التصوير (ما فيش جديد؟!). 

برنامج النهارده هو برنامج الطبخ على قناة الحياة 2 بعنوان "سفرة دايمة" من تقديم الشيف محمد فوزي (البرنامج كان من تقديم شيف آخر وتغير من فترة)، مقدم البرنامج من الشيفات الشاطرين لكن للأسف ما كانش واخد حقه في الشهرة وكان له برنامج سابق على أكثر من قناة قبل كده، اتبسطنا قوي لما عرفنا أنه هـ يقدم البرنامج وتوقعنا مستوى مش أقل من مستوى برامجه السابقة.

مقدمة البرنامج مليانة بالألوان والموسيقى المرحة، بعدها بـ تعرض الكاميرا منظر واسع يضم المطبخ بشكل عام والشيف أمامه الترابيزة بتجهيزاتها والبوتاجاز والمقادير وغيره، أما في ظهره بـ يكون فيه فرنين على يمينه وشماله، يبدأ الشيف في عرض الأكلات اللي هـ يطبخها في الحلقة بشكل عام، بعدها يبدأ في عرض مقادير أول أكلة مع ظهور المكونات على الشاشة، ويبدأ في شرح اللي هـ يعمله مع تركيز الكاميرا على طريقة خلط وطبخ المكونات، كمان متابعة الكاميرا وقت ما الشيف بـ يتحرك ويحط أكلة في الفرن وشكل الأكل وهي لسه طالع من الفرن أو حتى من البوتاجاز، ساعات الكاميرا بـ تتأخر وتكون في وادي والشيف بـ يتكلم عن حاجة ثانية خالص (وإحنا بـ نتفرج كنا عاملين زي ماتشات الكورة "فين الصورة يا عم")، كمان فيه قلة تواصل بين الشيف وفريق الإعداد والإخراج في تأخر الرد لدرجة أنه كان بـ ينتظر ردهم هـ يقولوا إيه لما بـ يسألهم "إيه الأسئلة؟" وده بـ يدل أن المتابعة مع المداخلات التليفونية مش في أحسن حالاتها، خلال الحلقة ما يخلاش الكلام من هزار ظريف وكلمة الشيف المشهور "فاصل صغير قد كده" مع كل خروج لفاصل إعلاني، خبرة ومهارة الشيف في المطبخ هـ تلاحظوها من معلوماته ونصائحه القيمة جدًا.

من أهم مميزات برنامج "سفرة دايمة" هو الشيف ذات نفسه اللي بـ يعرف "ما شاء الله" يعمل أي حاجة يعني مثلًا استغربنا لما عرفنا أن ممكن حد يتصل يسأل "أعمل اللانشون إزاي؟" أو "طريقة عمل الجبنة الرومي!!" واستغربنا أكثر لما الشيف عرف يجاوب وقال الطريقة وفي حلقة من الحلقات خبز مخبوزات زي "العيش الفينو" و"العيش البيتي بان".

برنامج "سفرة دايمة" مستواه ما اختلفش كثير عن مستواه مع الشيف السابق، كمان مستوى الشيف الجديد لا يقل عن مستوى السابق في المهارة والتمكن والخبرة، لكن يا ريت يكون فيه متابعة وتواصل أكثر من كده بين الشيف وفريق الإعداد والتحكم.