"ذات مرة كنت قاعد مع ذات نفس البنت اللى أنا قعدت معاها قبل كده.. والبنت دى بالذات مختلفة جدًا".. ها حلوة الجملة اللى فاتت؟ شوفتم إحنا بـ نستخدم "ذات" قد إيه فى كلامنا؟.. هنا بقى ذات الموضوع اللى هـ نتكلم عنه هو مسلسل "ذات"، لكن قبل المسلسل..

"لو علمتم الغيب لاخترتم الواقع" دى النصيحة اللى بـ ننصحكم بها.. عيش حياتك وما تخليش حاجة تتسرق منك بالذات عمرك، وترجع تقول "ليت الشباب يعود يومًا".. واللى خلانا نقول لكم ده أن لما اتفرجنا على مسلسل ذات للمبدعة نيللى كريم وشفنا طريقة عرضهم السهلة والجميلة لفترة الستينيات.. قلنا: "الله كان زمان جميل" لكن الأكيد الأكيد هما كمان كانوا بـ يقولوا كده وبـ يتمنوا أن الفترة دى تخلص والزمن يجرى بهم.

المسلسل أحداثه قديمة شوية بداية مع 23 يوليو 1952 يعنى يوم الثورة وده كان يوم ولادة ذات واللى سماها والدها كده علشان تبقى ّ"ذات الثورة" وهو كان رجل وطنى جدًا.. هـ تدور الأيام بنا فى حكم عبد الناصر وتأميم القناة وخطبه الرنانة وأيامه والإصلاح الزراعى والنكسة والحروب وموت عبد الناصر وحكم السادات والحرب والانتصار اللى حصل فى أكتوبر وفرحة الناس وحزنهم وحاجات كثير.. وجنب كل الأحداث الكبيرة فيه أحداث ثانية لذات وعائلتها، أحداث بـ توصف شكل المجتمع كان عامل إزاى.

أجمل حاجة فى المسلسل أنه توثيقى يعنى مش بـ يذكر الأحداث لا ده كمان بـ يوثق لمراحل تاريخية مهمة فى عمر مصر.. زى جنازة عبد الناصر مثلًا أو حدث جنازة "عبد الحليم" وجنازة "أم كلثوم" واللى خرجت مصر تودعهم وكأنهم أبطال بالفعل وكمان المميز فى المسلسل أنه بـ يجيب لقطات تسجيلية تعيشك فى الحالة.

الخلطة الأساسية اللى أعطت طعم للمسلسل هى خلطة الإخراج لأن المخرج عنده مقدرة أنه يوصل لك حالة كل فترة بالضبط من خلال اللقطات التسجيلية أو الأغانى وبالمناسبة الأغانى اللى هـ تسمعها فى التمثيلية هـ تفكرك بمرحلة ما فى حياتك لأنها أغانى اشتهرت فى أوقات مختلفة لحسن الأسمر وعدوية وغيرهم.

وعلشان نبقى منصفين لازم نقول أن الفضل مش بـ يرجع للمخرج بس لكن كمان لعم صنع الله إبراهيم الروائى العبقرى اللى كتب رواية "ذات" واللى منها اتعمل المسلسل.

صنع الله إبراهيم معروف بتميزه فى مدرسة خاصة جدًا فى كتابة الرواية اسمها "الرواية التسجيلية" وفكرتها بـ تعتمد على إدخال المعلومات والأرقام والإحصائيات وقصاصات الجرائد والأخبار الحقيقية عن الفترة اللى بـ يتكلم فيها وكل ده علشان يخدم الخط الدرامى اللى بـ يحكى فيه ويعطيك كمان حالة من الواقعية الشديدة جدًا وأنت بـ تستمتع بها.