avant titres:

المكان: كواليس الستوديو.

الزمان: السبت قبل الحلقة الأولى من البرنامج.

إبراهيم الهلالي متوتر عاوز يفتح الموبايل.. عاوز يبص على صفحته على الفيسبوك أو على تويتر.. يفتكر اللى أخذه مع "محمد الجعبري" فى الدورة، اوعى تبص على حاجة قبل الحلقة بتاعتك انفصل عن أى حاجة وركز بس فى البرنامج.. يظهر محمد الجعبرى فى الكواليس يعدل عمامة الهلالى ويقول له: واثق أنك هـ تبدع اليوم.

 

تتر:

ليه الكلام ما نزلش من فوق الورق بقى يمشى وسط الناس

الهم أنواع يا عم جاهين

هم اللى سارى فى الدروب ألوان والخطى واحد

هم اللى بـ يسبح بحمده رغم انكسار الخبز فى المواجير

هم اللى عايش فوق انعدام الوزن

تحت بير القدرة فى الحارة

 أو فى المنطقة الفاصلة بين الحياة والموت

وهم اللى عايش فى القبور يرتجى طعم الحياة

الهم أشياء يا عم جاهين بس البكا واحد

 

كلاكيت:

بدأ الموسم الثانى من برنامج "أمة المطر" مع أ/ محمد الجعبرى وأ/ إبراهيم الهلالى وأ/ سامى الجميل وهو مسؤول مواقع التواصل الاجتماعى الداعمة للبرنامج.. والبرنامج هدفه الناس وقائم على الناس ورايح للناس.. بـ يحاول مع قوافل "اقرأ" الإنسانية يدور عن من "لا يسألون الناس إلحافًا" أو اللى بـ يحسبهم الجاهل أغنياء من التعفف.. يعنى الفكرة خيرية فى المقام الأول بـ تدور على الفقراء المتعففين وتساعدهم بكل الأشكال.. هنا لازم وقفة.

 

وقفة:

مثل أمتى كالمطر لا يدرى أوله من آخره.. هى دى فكرة البرنامج اللى قامت مع شركاء الخير للبرنامج "المنتدى الإسلامى" وكمان التبرعات اللى بـ تيجى للبرنامج وبـ تبين قد إيه الخير موجود فى الأمة العربية بشكل كبير.. من أهم الحاجات اللى هـ تشدك للبرنامج هى الديكور الهادى وغير المفتعل واعتماده على التواصل مع الناس عن طريق مواقع التواصل والتقارير الخارجية والاتصالات التليفونية.. وكمان الضيوف اللى بـ يتم اختيارهم بعناية للتفاعل مع موضوع الحلقة ومع التشكيلة اللى فاتت بـ تدور التروس.

 

التروس:

الدرس الكبير من الحلقات اللى لازم تطلع به وأنت بـ تتفرج على البرنامج هو فكرة "الماكينة" واللى علشان تشتغل صح يبقى لازم كل التروس اللى فيها تشتغل صح.. وده اللى بـ يصحيه فيك البرنامج.. بـ يحرك الترس اللى جواك.. وبـ يطلع بك بره فكرة الوطن المحدد بجغرافيا وسياسة لأفق ثانى مختلف فيه الحياة ألوان عربية وإنسانية.. فيه بـ تتعلم أن الفقر فى كل مكان وأن المسلم أخو المسلم مهما كان بعيد.. تقدر تساعده وتوصل له.. وترسم الضحكة على الشوارع والحوارى والبيوت الغلبانين.

 

ضحك وبكا:

من البرامج القليلة اللى ممكن تخليك تضحك وتبكى فى نفس الحلقة.. تبكى لما تشوف الفقراء فى مصر ومخيمات اللاجئين السوريين فى الأردن وفلسطين وتركيا.. لما تعرف أن الفقر ما يعرفش حدود أو أوطان.. وأن الاحتياج حالة إنسانية كبيرة ممكن طفل يموت لنقص الطعام أو عدم توافر الدواء.. وتضحك لما تشوف الابتسامة مرسومة على وجه السعداء بوصول الإغاثة لهم.. أمة المطر برنامج يعرفك يعنى إيه خير باتساع الخلق.