كبداية كأنك بـ تتفرج على فيلم قديم بـ ينزل فيه المغنى أحمد فهمى من عربية لكنها مش قديمة هى عربية "BMW" ويروح لحد البيت علشان يشوف حبيبته الفنانة رزان ويرقصوا مع بعض تانجو.. ويبدأ البرنامج.. لكن قبل ما نتكلم عن البرنامج لازم نسأل سؤال مهم.

هو إحنا ليه عندنا ثقافة القطيع مفقوسة قوى كده؟

يعنى الواحد يتعب ويفكر فى اسم وشكل البرنامج والباقى يقلده، وخذ عندك مثلًا برنامج "البرنامج" لباسم يوسف اللى كان بـ يهاجم الأخوان (من غير زعل) والأخوان نفسهم فى قنواتهم عملوا برامج زى البرنامج ده بالضبط..

برنامج "دارك" لأشرف عبد الباقى نجح جدًا يعنى المذيع ممثل وكوميديان محبوب والبرنامج سمع قوى مع الناس، ولما حصل كده كان التقليد زى "مسا الجمال مع ميرفت ودلال" وبرنامج "البيت" و"الدار" وكلهم نفس الفكرة ونفس التقليد لكن يبقى الأصل أكيد هو المهم لأن اللى بـ ييجى بعد كده مش بـ يزود على الفكرة الأساسية ويبنى عليها.. لأ هو بـ يغيَّر المذيع واسم البرنامج والباقى عادى بقى.

أما برنامج "هى ولا هو" فهو خالى من أى نوع من أنواع الابتكار.. ونقدر نقول أن أول مرة هـ تشوف فيها البرنامج بالذات لو شوفته من نصفه هـ تقول أنهم بـ يعيدوا حلقات برنامج دارك لأشرف عبد الباقى.. لكن بعد كده ما تلاقيش أشرف.. تقريبًا نفس ترتيب فقرات البرنامج ونفس الضيوف (اللى هما الممثلين المعروفين).

الستوديو عبارة عن مطبخ ومكان للألعاب ومكان عبارة عن جلسة يعنى تقدروا تقولوا عليه مكان للحوار أو الصالة بتاعة البيت يعنى علشان كلهم يتكلموا مع بعض.. وطبعًا لازم نقول أن فيه فرق برضه موجود أن هناك اثنين مذيعين مش مذيع واحد وأن ديكور "هو ولا هى" أكثر تكلفًا بس شيك صراحة ما حدش يقدر يقول حاجة، وكمان فيه حالة اندماج بين المذيع أحمد فهمى والمذيعة رزان مغربى اللى لهجتها اللبنانية بـ تعطى جو مختلف للبرنامج والاثنين بـ يحاولوا مع بعضهم يعملوا شكل جديد.

ومن الجو الجديد اللى بـ يعملوه برضه فيلم قصير بـ يصوروه مع بعض فى بداية بعض الحلقات يوصلوا به فكرة: "يا ترى مين السبب فى المشاكل هو ولا هى؟".. "يا ترى مين اللى يقدر يخلى الحياة الزوجية أحسن هو ولا هى؟".. والحكم فى النهاية للجمهور هو اللى يقدر يقول يا ترى هو اللى عنده القدرة على حل المشاكل وعلى كل الكلام الجميل.. ولا هى اللى تقدر تخلى البيت أحلى والحياة أفضل.. تقدروا تشوفوا البرنامج وتحكموا بنفسكم.

هو اللى أحسن.. لأ هى اللى أحسن.. هو اللى بـ يقدم أحسن.. لأ هى اللى بـ تعمل كده.. هو اللى واكل الجو منها.. هى اللى بـ تقابل الضيوف.. هو اللى متقدم فى الغناء.. هى اللى متقدمة فى التمثيل.. هو اللى .... هى اللى ..... الحكم بعد المداولة أو لكم بعد ما تشوفوا البرنامج.