زى المتوقع بالضبط من اسم المسلسل.. ظهرت إيمى سمير غانم بنت غريبة الشكل زى ما الكل بـ يوصفها.. قبيحة جدًا لكن معاها مؤهلات دراسية جبارة، تؤهلها لأعلى المناصب.. لكن بسبب شكلها فضلت فترة طويلة عاطلة.. لحد ما بـ يحصل إيه؟

إعلان من شركة كبيرة للموضة والأزياء.. شركة "إيكو موضة" تعلن عن حاجتها لوظيفة سكرتيرة، ومن كثر يأسها من أنها تشتغل بمؤهلاتها قررت تقدم فى الوظيفة.. هنا بـ تحصل المعجزة.. وبـ تشتغل فعلاً فى الشركة.

لو تكلمنا عن شكل إيمى لازم نقول أن المكياج له دور كبير فى المسلسل لأنها غيرت كثير من شكلها وظهرت قبيحة بالفعل، يعنى مركبة سنتين زيادة ووزنها زايد، والشعر سلك مواعين لكن يا ترى هـ تفضل كده لحد آخر المسلسل.. سؤال الموضوع المرة دى؟.. تفتكروا هـ تفضل إيمى كده على شكلها ولا هـ تتغير؟

منتظرين رأيكم.. مع أننا شايفين أنها تفضل على حالتها لأن ده هـ يعطى أمل لفئة كبيرة من البنات أن النجاح بـ ييجى على أساس الاجتهاد مش الشكل بس.

المسلسل مأخوذة فكرته من مسلس أجنبي بعنوان "Ugly Betty".. ولو حبينا نوصفه هـ نقول عليه عائلى كوميدى خفيف.. عاوز يوصل رسالة مهمة وهى فكرة العمل مش مرتبط بشكلك بس.. لكن له مؤهلات ثانية كثير زى التعليم اللى لازم كلنا نهتم به، وقدرة الإنسان على التفكير والإبداع وعلى تنظيم وقته وعلى اجتهاده فى العمل وعلى معرفة نوعية الشغل وتطوير نفسه باستمرار.

زى ما قولنا المكياج عامل شغل عالى فى المسلسل سواء مع البنات الجميلة أو مع هبة.. والديكور متماشى جدًا مع المسلسل يعنى ديكور الشركة عالى جدًا وفيه فخامة، وكمان بيت هبة مبين حالتها الاجتماعية وديكور بيت "أدهم النشؤاتى" عالى جدًا ومبين جدًا الحالة الاجتماعية العالية اللى عايش فيها.. ووالده رئيس مجلس إدارة الشركة.

ومن المهم أننا نقول أن رؤية المخرج فى اختيار الشخصيات وتجسيدها جاية فى وضعها المناسب.. يعنى مش لازم يبقى الديكور مبين أن الشقة مبهدلة علشان نصور أن العائلة فقيرة.. لكن التصوير تم فى شقة أثاثها متوسط الحال ومبين الحالة فعلاً وده تطور يحسب لرؤية المخرج.. وكمان طريقة التمثيل مافيهاش أداء مبالغ فيه.. الكل بـ يتكلم على طبيعته.. علشان يبان الموضوع حقيقى وهنا يظهر المخرج الشاطر من المخرج اللى بـ يعمل سبوبة.

هبة رجل الغراب بـ تقع فى مشاكل كثير مع المدير اللى يعتبر (زير نساء) وبـ تحاول تدارى عليه.. وكمان بـ تحاول تخليه يكمل علاقته مع خطيبته بشكل جيد، وأحيانًا بـ تدارى عليه اللى بـ يعمله.. ده هـ يكون فى صالحه ولا لأ.. المسلسل هـ يمشى فى أى اتجاه خلونا نتابع ونعرف.. رجل الغراب هـ تبقى (يمامة غنية) ولا هـ يفضل رجل الغراب ملازمها طوال عمرها؟