الخطية الأولى:

بـ يقولوا أن لما النبى آدم والسيدة حواء أخطأوا وأكلوا من شجرة التفاح المحرمة ظهرت التفاحة فى زور البنى آدم مننا، وهى معروفة باسم تفاحة آدم برضه أو الحنجرة اللى على شكل التفاحة يعنى مصدر الصوت عند الإنسان على شكل الخطية الأولى، يعنى المفروض كل ما تتكلم تفتكر الخطية الأولى وأول إنسان خالف أمر ربنا وأول إنسان برضه استغفر وتقبل الله منه.

 

الشرطة:

فيه مشاكل فى الشرطة، بس برضه هي بـ تعانى من مشاكل وده هـ يبان فى مسلسلنا تفاحة آدم اللى هـ نعرف فيه لو واحد بس من المسؤولين عن الشرطة أصبح مرتشى الدنيا ممكن تتبهدل بمنتهى السهولة.. وهـ نفهم كمان قد إيه لو فيه تسريب حصل فى الجهاز يبقى أمن البلد كله فى خطر.. أما بقى لو التسريب ده لصالح المتدينين واللى بـ نكتشف مع الوقت أنهم "جماعة الإخوان" يبقى الدنيا باظت خالص.

 

الإخوان:

المشكلة بقى فى إيه؟ نقول لكم أن دائمًا الدعاة لازم يبقوا أخوان ولازم يكونوا بـ يقولوا أن الستات فتنة ولازم يكونوا بـ يحبوا الستات ولازم يكونوا على الشاشة حاجة وعلى الواقع حمادة ثانى خالص.. يعنى مشايخ نص كم وصراحة مش عارفين ليه.. لأن أكيد فيه مشايخ محترمة برضه.. ولا إيه الكلام؟

 

آدم:

فى وسط كل الزخم ده بـ نتخبط بالنجم خالد الصاوى فى أول حلقة وهو عامل دور كهربائى علشان يسجل لقاء ما بين ضابط مرتشى وواحد من مشايخ الفضائيات يتبع جماعة المقطم.. ويقتحم عليهم قعدتهم ويبين له أنه مسجل كل حاجة وينهار الشرطى فى النهاية علشان نكتشف كلنا أصلًا أن خالد الصاوى اللى هو "آدم" أصلًا نصاب كبير وهو اللى عامل الموضوع ده كله علشان بـ يخطط لموضوع كبير وبـ يحاول يعوض حاجة عنده هـ نفهمها بعدين فى المسلسل.

 

الناس والخطية:

كل الناس بـ تغلط والأخطاء لما تيجى من نصاب كبير وبـ يعملها بإتقان بـ يبقى فيها لذة ما وحاجة كده تخليك متابع الموضوع وعاوز تعرف إيه اللى هـ يحصل بعد كده.. المهم مع كل الآثار اللى بـ تتهرب والشرطة اللى بـ تدور على حد يكشف الخيانة فين والنصاب العالمى والبنوتة مبدعة التكنولوجيا والشرطى الشريف اللى عنده مشاكل عائلية.. بـ يطل علينا المسلسل بديكوراته العالية قوى والمعمولة بشكل قد يكون مبالغ فيه زى مشاهد الحفلات أو الفيلات أو بيوت الضباط اللى تحسسنا أنهم من كبار رجال الأعمال وبـ يتوه الكل فى فكرة الخطايا، يا إما ضدها يا إما معاها.. فكر وشوف هـ تأكل أنهى تفاحة خطية فى الدنيا وتقلد الإنسان الأول.

 

علشان تعرف مواعيد وقنوات عرض "تفاحة آدم" زور "دليل كايرو 360 للتليفزيون فى رمضان".