دليل كايرو 360 لمسلسلات رمضان 2015 - تليفزيون Feature - كايرو 360
 







دليل كايرو 360 لمسلسلات رمضان 2015
دليل كايرو 360 لمسلسلات رمضان 2015
اصدرت في: 16/06/2015

كل سنة وأنتم فرحانين ومع بعض مبسوطين، رمضان على الأبواب، شهر مليان من كل حاجة، متع روحانية ومادية بلا حصر، الكل بـ يجتهد فيه علشان يقدم كل حاجة وكمان يأخذ كل حاجة، عبادة وأكل واجتماعيات ودراما وخروج، صناع المسلسلات بـ يعتبروا ده الموسم بتاعهم وبـ يقدموا كل أنواع المسلسلات اللي ممكن تخطر على بالكم، لو على التشويق كلنا بـ نبقي عاوزين نشوفهم كلهم، لكن في النهاية علشان الشهر يكون متوازن محتاجين تاخدوا قرار بمشاهدة مسلسل أو اثنين وتأجلوا الباقي في العروض الثانية بعد رمضان..

كايرو 360 بـ تحاول تساعدكم من خلال دليل مسلسلات رمضان 2015، المعلومات علينا.. والقرار لكم.

 

تشويق

ظرف أسود:

كعادة الممثل الموهوب عمرو يوسف، السنة دي بـ يقدم شخصية يوسف، اللي بـ يفقد أسرته ومستقبله فجأة في ظروف مأساوية، بـ يكره الدنيا وبـ يبقى خلاص على وشك مفارقتها، لكن فجأة بـ يقتحم حياته ظرف أسود يقلب حياته ويدخله في دوامة وعوالم كابوسية إلى مالا نهاية، بـ يشاركه البطولة درة، صلاح عبد الله، إنجي المقدم، محمود البزاوي، تأليف وإخراج أحمد مدحت.

يعرض على قنوات Ten ونايل دراما والمصرية وقناة المصرية الأولى.

 

أستيفا:

بـ يقوم خلال المسلسل النجم عباس أبو الحسن (ضابط شرطة) بالتحقيق في مجموعة من الجرائم للوصول للجاني، المسلسل 30 حلقة منفصلة وكل حلقتين بـ تدور حول جريمة واحدة، وبـ يشارك في المسلسل عدد ضخم من الممثلين كضيوف منهم كندة علوش، عمرو سعد، خالد الصاوي، منى زكي، منة شلبي، نيللي كريم، نيكول سابا، المسلسل من تأليف عزة شلبي، وإخراج حسام علي وشريف البنداري.

العرض حصري على قناة القاهرة والناس لأن المنتج هو مالكها طارق نور.

 

بعد البداية:

من بطولة طارق لطفي، درة، خالد سليم، روجينا والنجم الكبير فاروق الفيشاوي، بـ يلعب خلاله طارق لطفي شخصية عمر الصحفي اللي بـ يكتب عن عدد من قضايا الفساد، لكن علشان فتش في عش الدبابير تعرض لمحاولة اغتيال، صحيح ما ماتش لكن الغريب أنه ثاني يوم لقى خبر وفاته في جرنال قومي، المسلسل من تأليف عمرو سمير عاطف، وإخراج أحمد خالد موسى.

يعرض على قناة النهار وART حكايات.

 

ذهاب وعودة:

بـ يلعب خلاله النجم أحمد السقا شخصية خالد اللي بـ يمتلك شركة كبيرة للاستيراد والتصدير، حياة هادية ومثالية مع زوجته، لكن بـ تنقلب فجأة ويقع في أزمة بعد ما بـ يتخطف ابنه، والكارثة أن الخاطفين عصابة بـ تتاجر في الأعضاء البشرية، المسلسل من تأليف الروائي والمؤلف عصام يوسف، وإخراج أحمد شفيق.

يعرض على قنوات MBC مصر، والمستقبل اللبنانية.

 

لعبة إبليس:

إذا ذكر التشويق ذكر يوسف الشريف، قصة المسلسل السنة دي حول أخين توأم بـ يقدمهم الاثنين يوسف الشريف، الأول ناجح وله مكانة اجتماعية كبيرة والثاني ساحر له في الشعوذة والتواصل مع المخلوقات الشيطانية بـ يصطدموا ببعض ويبدأ الصراع.

يعرض على قناة الحياة الحمرا.

 

وش تاني:

بـ يرجع النجم كريم عبد العزيز بمسلسل مع حسين فهمي، عن الفروق الطبقية البشعة وتركز المال والسلطة في أيد مجموعة ناس، القصة بـ تدور عن حسين فهمي رجل الأعمال اللي بـ ياخد فلوسه ويهرب بره البلد، والحارس الغلبان بتاعه كريم عبد العزيز اللي دايخ علشان يصرف على أخواته وأبوه.

يعرض حصريًا على قناة الحياة المصرية.

 

اجتماعي

الكابوس:

السنة دي بـ تقدم غادة عبد الرازق دور مختلف لواحدة ست عايشة في حي شعبي، عندها مقلب زبالة، بـ يسبب لها مشاكل وتعقيدات بـ تدخلها في صراعات وقصص على مدار المسلسل، بـ يشاركها البطولة آيتن عامر، وأحمد راتب، المسلسل تأليف الكاتبة هالة الزغندى، وإخرج إسلام خيري.

يعرض على قنوات cbc، وOSN المشفرة.

 

حواري بوخاريست:

أمير كرارة بـ يقدم دور سيد جاد الله المشهور بـ "سيد بوخاريست" اللى بـ يمارس لعبة الملاكمة بحرفية، لكن رغم كده ما بـ يقدرش يتجوز حبيبته اللى مرتبط بها من طفولته، بـ يسافر بره البلد علشان يحقق حلمه ومن هنا بـ تتوالى الأحداث.

يعرض على قنوات روتانا مصرية والنهار، ودريم وقنوات النيل المتخصصة.

 

طريقي:

بطولة شيرين عبد الوهاب، بـ تدور أحداثه حول فنانة طفولتها سيئة جدًا لكنها بـ تصر على حلمها أنها تكون مطربة مشهورة، وبـ تطلع من الصفر للقمة، في الطريق بـ تواجهها عقبات كثير على المستويين المهني والشخصي، لكنها بـ تنجح في التغلب عليها، المسلسل من تأليف تامر حبيب، وإخراج محمد شاكر، بـ يشاركها البطولة محمود الجندي.

يعرض على قنوات cbc وOSN.

 

حق ميت:

مسلسل بطولة جماعية لحسن الرداد، ودلال عبد العزيز، وإيمي سمير غانم، قصته عن الشاب نادر، اللي بـ يحاول يعيش حياة طبيعية ويتجوز البنت اللي بـ يحبها لكن بـ يتعرض لظلم كبير وبـ يتسجن في جريمة ما عملهاش.

يعرض على قناة الحياة.

 

مولانا العاشق:

سلطان (مصطفى شعبان) سواق ميكروباص وبـ يموت في جارته في الحي الشعبي، لكنها بـ تبص لفوق دايمًا وبـ تفضل عليه واحد أغنى منه، لكنه بـ يحاول ينقذها من نفسها ومن أفكارها وبـ يبدأ في رحلة من المشاكل والمواقف هو وابن عمه شحتة.

المسلسل حصري على قناة mbc.

 

حارة اليهود:

المسلسل ده بقى بـ يلعب في المحظور وبـ يناقش قضية مش كثير اتجرأوا على مناقشتها وهي علاقة المصريين من ديانات مختلفة ببعض بعد ثورة 23 يوليو، ولحد العدوان الثلاثي، من خلال قصة حب بـ تجمع البطلة اليهودية (منة شلبي) بالضابط المسلم (إياد نصار).

يعرض على قنوات cbc وTen والحياة ودريم والقاهرة والناس وبانوراما دراما وشبكة أوربيت وقنوات النيل المتخصصة.

 

تحت السيطرة:

مسلسل من بطولة نيللي كريم، ومحمد فراج، وأحمد وفيق، بـ يدور حول البنت اللي كانت بـ تربطها صداقات برجالة مدمنين في مصر، قبل ما تسافر دبي وتعيش هناك، بـ تقرر فجأة ترجع مصر وبـ تبدأ كل علاقاتها القديمة تطاردها وتطارد أصحابها وتبدأ المشاكل والحكايات اللي بـ تعرض للمشاهد عالم المدمنين عن قرب.

يعرض على قنوات cbc، وTen، والمحور والقاهرة والناس ودريم وصدى البلد.

 

حالة عشق:

مسلسل هادي عن مذيعة (مي عز الدين) بـ تحب زميلها (حازم سمير) شاب من نفس مستواها البسيط، لكن فجأة أمها بوسي بـ ييجي لها فرصة جواز وفعلاً بـ تتجوز والحالة بـ تنتقل تمامًا، ومن هنا بـ تبدأ المشاكل بين البنت وحبيبها واختلاف المستوى الاجتماعي.

يعرض على قنوات النهار والحياة، وArt.

 

مريم:

من بطولة هيفاء وهبي، وبـ تقوم فيه بدورين لشخصية أختين توأم الأولى مريم بنت بسيطة خرساء، والثانية ملك، سيدة أعمال بـ ترجع من بره علشان تباشر أعمالها، الأمور مش بـ تمشي على ما يرام بين الأختين وبـ تبدأ المواقف والحكايات.

يعرض على قنوات النهار وlbc اللبنانية.

 

ولي العهد:

بـ يموت الجد (عبد الرحمن أبو زهرة) وبـ يكتب كل حاجة ملكه لابنه خالد، باقي الأخوات بـ يعيشوا في معاناة وحالة من الشعور بالثأر مع أخوهم اللي أخد كل حاجة بطريقة مريبة، المسلسل من بطولة حمادة هلال وإدوارد.

يعرض حصريًا على mbc مصر.

 

الصعلوك:

بطولة النجم خالد الصاوي، بـ يقدم من خلاله شخصية شيال فقير في حارة عشوائية مع الوقت بـ يتنقل يشتغل في سرايا واحد من الأغنياء (حسن حسني)، وكالعادة بـ تقع بنت الباشا في حب الشاب الفقير، لكن الجديد المرة دي أنها متجوزة ومن هنا بـ تبدأ عقدة المسلسل والأحداث تسخن.

يعرض على النهار ودريم وصدى البلد وبانوراما دراما والنيل المتخصصة.

 

بين السرايات:

مسلسل بـ يدور عن المنطقة الشهيرة أمام جامعة القاهرة، بـ يحاول يقدم إزاي العملية التعليمية بقيت تتلخص في مجرد ملزمة وشوية ورق متصورين وخلاص، المسلسل من بطولة باسم سمرة.

يعرض على الحياة وcbc وقنوات النيل المتخصصة وأوربيت.

 

مولد وصاحبه غايب:

ثاني مسلسل لهيفاء وهبي الموسم ده، بـ تقدم من خلاله شخصية بنت غلبانة من حي فقير، جمالها بـ يخليها تغري مجموعة من رجال الأعمال اللي بـ يدخلوها العالم بتاعهم ومن هنا بـ تبدأ تتعرف عن قرب على فساد عصر الرئيس الأسبق محمد حسني مبارك.

يعرض على الحياة وقناة Ten.

 

كوميديا

يوميات زوجة مفروسة أوي:

بطولة داليا البحيري وسمير غانم، عن اثنين صحفيين متجوزين وبـ يشتغلوا مع بعض في نفس المؤسسة، بـ تقوم الثورة وبـ يحصل اختلاف كبير بينهم بسبب مواقفهم المختلفة، المسلسل دمه خفيف وبـ يركز على حالة الانقسام اللي حصلت في بيوت كثير بسبب وجهات النظر السياسية.

يعرض على قنوات روتانا مصرية والحياة وصدى البلد والنيل المتخصصة.

 

أستاذ ورئيس قسم:

بطولة الزعيم عادل إمام، قصته بـ تدور حول دكتور جامعي له ميول يسارية، بـ يدرس للطلبة في كلية الزراعة، ومش عاجبه الأوضاع السياسية قبل ثورة 25 يناير، فجأة بـ تقوم الثورة وبـ يقرر هو كمان يثور مع الثوار مش بس على حكومته ورئيسه لكن كمان على حياته الشخصية وزوجته، من تأليف يوسف معاطي، وإخراج وائل إحسان، بـ يشاركه نجوى إبراهيم وأحمد بدير.

يعرض على قنوات MBC مصر وواحد، والنهار.

 

يا أنا يا أنتي:

جولة جديدة بين ممثلتين لقوا كيميا مع بعضهم فيفي عبده وسمية الخشاب، سلسلة من المواقف الكوميدية بين الأثنين مشبعة بكيد النسا ومحاولات التفوق المستمرة في الأنوثة والظهور، واحدة من حي شعبي والثانية من مجتمع ارستقراطي والاثنين أصدقاء من الطفولة.

يعرض على قناة cbc وART.

 

لهفة:

مسلسل دمه خفيف من بطولة دنيا سمير غانم، ما أخدش حظه من الإعلانات كفاية، بـ تدور قصته حول بنت طموحة، نفسها تمثل طوال حياتها، بـ تحاول توصل من خلال خالها الريجيسير للي نفسها فيه، ومن خلال محاولات تضحك بـ تحاول تتفادى مصير والدها الكومبارس.

يعرض على قنوات النيل المتخصصة.

 

الكبير أوي (الجزء 5):

للسنة الخامسة على التوالي بـ يقدم النجم أحمد مكي مسلسله الكوميدي الشهير الكبير أوي، المسلسل له شعبية كبيرة، وشخصياته المميزة حازت على حب ناس كثير، بعد ما ظهر لجوني والكبير الأخ الثالث حزلقوم، السنة دي هـ يظهر لهم أخ رابع سوداني، يرجع لهم الأزاريطة وتبدأ المفارقات المضحكة مع دكتور القرية وهدية، وباقي الأبطال.

يعرض على قناة cbc وشبكة OSN.

 

خيالية

العهد (الكلام المباح)

ده بقى من المسلسلات الجذابة جدًا لأنه من المسلسلات الخيالية النادرة في تاريخ الدراما العربية، التيمة الأساسية فيها هي الصراع الإنساني على السلطة، المسلسل من بطولة غادة عادل وكندة علوش وآسر يس وأروى جودة وهنا شيحة، من تأليف محمد أمين راضي، وإخراج خالد مرعي، بـ يعرض على قنوات MBC دراما، وقناة النهار، وشبكة ART.

 

ألف ليلة وليلة:

مسلسل خيالي عن عالم ألف ليلة وليلة مأخوذ من الكتاب الأصلي، أبطاله شريف منير (شهريار)، ونيكول سابا (شهرزاد)، وأمير كرارة وعدد من النجوم، البروموهات المعروضة بـ تقول أنه مسلسل شيق وفيه شغل تقني كبير جدًا وإمتاع كبير.

يعرض على mbc، وقنوات ثانية مش مصرية زي السومرية وتليفزيون الكويت والجزائر.

 

أوراق التوت:

من بطولة صابرين وأحمد ماهر، خيالي لأبعد الحدود في شخصياته وقصته وكل حاجة، بـ يدور حول مملكتين خياليتين، الأول اسمها "درامهان" الحاكمة فيها ست وثنية اسمها "ليلانتا" والمملكة الثانية اسمها "شارنقاه" والإمبراطورة الحاكمة فيها اسمها "ديوسسوس" بـ يوصل طبيب مسلم اسمه "ابن أحمد" للملكة الوثنية وبـ يبدأ صراع كبير وقصص واخدة طابع ديني وخيالي وأسطوري في الوقت نفسه.

يعرض على قناة صدى البلد والمحور والنيل المتخصصة.

 

كارتون

بكار:

من جديد بـ يرجع مسلسل الأطفال بكار لمحبيه، ومتابعيه اللي ما بقوش أطفال صحيح لكن وحشهم، صحيح المخرجة الأصلية توفيت الله يرحمها لكن المؤلف مازال موجود عمرو سمير عاطف مكمل.

يعرض على قناة النهار وقت الفطار.

 

قصص الآيات في القرآن الكريم:

النجم يحيى الفخراني والمخرج الموهوب مصطفى الفرماوي بـ يكملوا تعاونهم للسنة الخامسة على التوالي وبـ يقدموا السنة دي قصص الآيات في القرآن الكريم، بـ يتناول قصص القرآن وأسباب نزولها.

يعرض حصريًا على mbc مصر.

 

ترددات القنوات:

mbc مصر 2: 11823 v (عمودي) 27500 5/6

قناة Ten tv: تردد 11430 v (عمودي) 27500 3/4

نايل دراما: 11843 h (أفقي) 27500 5/6

Cbc دراما: 11488 v (عمودي) 27500 ¾

صدى البلد: 11823 v (عمودي) 27500 ¾

دريم: 11900 v (عمودي) 27500 ¾

المحور: 11823 v (عمودي) 27500 ¾

القاهرة والناس: 11765 h (أفقي) 27500 5/6

الحياة: 10892 h (أفقي) 27500 ¾

النهار: 11488 h (أفقي) 27500 ¾

mbc مصر: 11470 v (عمودي) 27500 5/6

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
16/06/2015
-